കോവിഡിന്‍റെ നേര്‍ക്കാഴ്ചയുമായി കേരള യാത്ര, മെട്രോ അറ്റ്‌ലാന്‍റാ സ്‌പോണ്‍സേഴ്‌സ്
Monday, January 25, 2021 11:59 AM IST
അറ്റ്‌ലാന്‍റ : കോവിഡ് കാലത്തില്‍ കേരളത്തിന്‍റെ നന്മകളും നൊമ്പരങ്ങളും തൊട്ടറിയാനുള്ള സോഷ്യല്‍ മീഡിയാ ചാനലായ യാത്ര ടെക്ക് ടിവിയുടെ ചരിത്രയാത്ര ജനുവരി 16 ന് കൊല്ലത്തു നിന്നു ആരംഭിച്ചു.

അമേരിക്കയിലെ അറ്റ്‌ലാന്‍റയില്‍ പ്രവര്‍ത്തിക്കുന്ന സാമൂഹ്യ സേവന സംഘടനയായ മെട്രോ അറ്റ്‌ലാന്‍റ്റാ കേരള അസോസിയേഷനാണ് ഈ യാത്രയെ സ്‌പോണ്‍സര്‍ ചെയ്യുന്നത് .

കേരളത്തിലെ 14 ജില്ലകളില്‍ ബൈക്കില്‍ യാത്രചെയ്താണ് മാധ്യമ പ്രവര്‍ത്തകനായ സാന്‍റി സ്റ്റീഫന്‍ ഇതിന്‍റെ ദൃശ്യാനുഭവങ്ങള്‍ പകര്‍ത്തുന്നത്. മലയാളികളുടെ സാമൂഹിക സാംസ്കാരിക തൊഴില്‍ മേഖലയില്‍ ഈ നാളുകള്‍ വരുത്തിയ മാറ്റങ്ങളുടെ അനുഭവങ്ങളാണ് അനേഷിക്കുന്നത് . ഈ ദേശത്തിന്‍റെ മനോഹരമായ ടൂറിസ്റ്റ് പൈതൃക കേന്ദ്രങ്ങളും ഗ്രാമ നഗര സംസ്കാരത്തിന്‍റെ നേര്‍കാഴ്ചയും ഈ യാത്രയില്‍ കാണാം . കൊല്ലം ശക്തികുളങ്ങര ഹാര്‍ബറില്‍ നിന്ന് പുറപ്പെട്ട മത്സ്യ ബന്ധന ബോട്ടില്‍ 4 ദിവസം അറബിക്കടലില്‍ തൊഴിലാളികളോടൊപ്പം ചിലവഴിച്ച് അവരുടെ അനുഭവങ്ങള്‍ തെട്ടറിഞ്ഞു.


യാത്രയ്ക്ക് പിന്തുണ നല്‍ക്കുന്ന മെട്രൊ അറ്റ്‌ലാന്‍റ്റാ ഓള്‍ കേരള അസോസിയേഷനെപറ്റി കൂടുതല്‍ അറിയുവാനും ഈ സംഘടനയില്‍ ചേര്‍ന്നു പ്രവര്‍ത്തിക്കുവാനോ സപ്പോര്‍ട്ട് ചെയ്യുവാനോ തല്‍പര്യമുള്ളവര്‍ makachoice.org എന്ന വെബ്‌സെറ്റുമായി ബന്ധപ്പെടാവുന്നതാണ്.

റിപ്പോർട്ട്: ജോയിച്ചന്‍ പുതുക്കുളം