ഡോ. സൂര്യ കൃഷ്ണമൂർത്തിക്കും വിനോദ് മങ്കരക്കും സ്വീകരണം നൽകി
Saturday, June 18, 2022 6:48 AM IST
രഞ്ജിത് നായർ
ഹൂസ്റ്റൺ: നാടക രചയിതാവും ആസ്വാദകനും കലാ ഉപാസകനുമായ ഡോ. സൂര്യ കൃഷ്ണമൂർത്തിക്കും ചലച്ചിത്രസംവിധായകനും മാധ്യമപ്രവർത്തകനും എഴുത്തുകാരനുമായ വിനോദ് മങ്കരക്കും മലയാളി നോർത്ത് അമേരിക്കൻ ഹിന്ദുസി (മന്ത്ര) ന്‍റെ നേതൃത്വത്തിൽ സ്വീകരണം നൽകി.

ഹൂസ്റ്റ‌ണിൽ നടന്ന ചടങ്ങിൽ ഡോ. സുനന്ദ നായർ അതിഥികളെ സദസിനു പരിചയപ്പെടുത്തി .
ദൈവദത്തമായ കല വില്പന ചരക്കാക്കി മാത്രം ഉപയോഗിക്കുന്നവരെ തിരസ്ക്കരിക്കേണ്ട സമയം അതിക്രമിച്ചു എന്ന് സൂര്യ കൃഷ്‍ണമൂർത്തി അഭിപ്രായപ്പെട്ടു . പുരാതന കലാരൂപങ്ങളെ സംരക്ഷിക്കാൻ നമുക്ക് ഒത്തൊരുമിച്ചു ശ്രമിക്കാം. നാട്ടിൽ കലാകാരന്മാരെ ആദരിക്കുന്നതിൽ അസമത്വം നില നിൽക്കുന്നുണ്ട്. ദൃശ്യ മാധ്യമങ്ങളിലെ കലാകാരന്മാർക്ക് അമിത പ്രാധാന്യം ലഭിക്കുമ്പോൾ ,കലാ ജീവിതം തപസ്യ ആക്കി മാറ്റിയ ഒരു പാട് കലാകാരന്മാർ അവഗണിക്കപ്പെടുന്നുണ്ടെന്നും അദ്ദേഹം ഓർമിപ്പിച്ചു

സമൂഹത്തിനു ഊർജം പകർന്നു നൽകുന്ന യഥാർഥ കലാകാരൻമാരെ തിരിച്ചറിഞ്ഞു പ്രോത്സാഹിപ്പിക്കണമെന്ന് വിനോദ് മങ്കര പറഞ്ഞു .സംസ്കൃത ഭാഷയുടെ പ്രാധാന്യത്തെ ക്കുറിച്ചും അത് കാലഹരണെപെട്ടു പോകാതെ നോക്കേണ്ടത് കാലഘട്ടത്തിന്‍റെ ആവശ്യമാണെന്നും അദ്ദേഹം അഭിപ്രായപ്പെട്ടു .

2023 ജൂലൈയിൽ ഹൂസ്റ്റണിൽ നടക്കുന്ന വിശ്വ ഹിന്ദു കൺവൻഷനിലേക്കു രണ്ടു പേരുടേയും സാന്നിധ്യം കാംക്ഷിക്കുന്നതായി പ്രസിഡന്‍റ് ഹരി ശിവരാമൻ അറിയിച്ചു. ക്ഷണം സ്വീകരിക്കുന്നതിൽ സന്തോഷമേയുള്ളൂ എന്ന് ഇരുവരും അറിയിച്ചു .

സംസ്കൃത ഭാഷയുടെ പ്രചാരണത്തിന് മുന്നിട്ടിറങ്ങാൻ മന്ത്ര തയാർ ആണെന്ന് ട്രസ്റ്റി ചെയർ ശശിധരൻ നായർ അറിയിച്ചു .ചടങ്ങുകൾക്കു മന്ത്ര സെക്രെട്ടറി അജിത് നായർ നേതൃത്വം നൽകി.
കൺവൻഷൻ ചെയർ ഗിരിജാ കൃഷ്ണൻ നന്ദി പറഞ്ഞു.
Copyright @ 2022 , Rashtra Deepika Ltd.