കുപ്രസിദ്ധ പിടികിട്ടാപ്പുള്ളി സുകുമാരക്കുറുപ്പിന്‍റെ ജീവിതത്തെ ആസ്പദമാക്കി ഒരുക്കുന്ന കുറുപ്പ് , കരിയറിൽ ആദ്യത്തെ മുഴുനീള പോലീസ് കഥാപാത്രത്തെ അവതരിപ്പിക്കുന്ന സല്യൂട്ട് എന്നീ ചിത്രങ്ങളിലൂടെ സ്റ്റൈലിഷ് വേഷങ്ങളിലാണ് ദുൽഖർ ഇനി പ്രേക്ഷകർക്കു മുന്നിലെത്തുന്നത്....
ദുൽഖർ സൽമാന്‍റെ രണ്ടു സ്റ്റൈലിഷ് കഥാപാത്രങ്ങളാണ് ഇനി പ്രേക്ഷകർക്കു മുന്നിലേക്കെത്തുന്നത്. ഒരാൾ വില്ലനെങ്കിൽ മറ്റൊരാൾ നായകൻ.
കേരളത്തിലെ കുപ്രസിദ്ധ പിടികിട്ടാപ്പുള്ളി സുകുമാരക്കുറുപ്പിന്‍റെ ജീവിതത്തെ ആസ്പദമാക്കി ശ്രീനാഥ് രാജേന്ദ്രൻ സംവിധാനം ചെയ്യുന്ന കുറുപ്പാണ് ഇതിൽ ആദ്യം എത്തുന്ന ചിത്രം. സുകുമാരക്കുറുപ്പായി വേറിട്ട ഗെറ്റപ്പുകളിലാണ് താരം വെള്ളിത്തിരയിലെത്തുന്നത്. ഇതിനു പിന്നാലെ ഒരുങ്ങുന്ന സല്യൂട്ടിൽ കരിയറിൽ ആദ്യത്തെ മുഴുനീള പോലീസ് കഥാപാത്രത്തെയാണ് ദുൽഖർ അവതരിപ്പിക്കുന്നത്.
ബോബി സഞ്ജയുടെ തിരക്കഥയിൽ റോഷൻ ആൻഡ്രൂസ് സംവിധാനം ചെയ്യുന്ന സല്യൂട്ടിൽ ബോളിവുഡ് താരവും മോഡലുമായ ഡയാന പെന്‍റിയാണ് നായിക. മനോജ് കെ. ജയൻ, അലൻസിയർ, ബിനു പപ്പു, വിജയകുമാർ, ലക്ഷ്മി ഗോപാലസ്വാമി തുടങ്ങിയവർ മറ്റു പ്രധാന വേഷങ്ങളിൽ എത്തുന്നു. വേഫെയറർ ഫിലിംസിന്‍റെ ബാനറിൽ ദുൽഖർ തന്നെയാണ് ചിത്രം നിർമിക്കുന്നത്.
ദുൽഖറും റോഷൻ ആൻഡ്രൂസും ഒരുമിക്കുന്ന ആദ്യ ചിത്രമാണിത്. വേഫെയറർ ഫിലിംസിന്‍റെ ബാനറിൽ നിർമിക്കുന്ന അഞ്ചാമത്തെ ചിത്രം കൂടിയാണിത്. കൊല്ലം, കാസർഗോഡ് എന്നിവടങ്ങളാണ് പ്രധാന ലൊക്കേഷൻസ്. അസ്ലം കെ. പുരയിൽ ഛായാഗ്രഹണം. എഡിറ്റിംഗ് ശ്രീകർ പ്രസാദ്. തെന്നിന്ത്യയിലെ പ്രശസ്ത സംഗീത സംവിധായകൻ സന്തോഷ് നാരായണനാണ് ചിത്രത്തിനു സംഗീതമൊരുക്കുന്നത്.
പിസ, ജിഗർതണ്ട, മദ്രാസ്, കബാലി, കാല, പരിയേറും പെരുമാൾ, വട ചെന്നൈ തുടങ്ങിയ ഹിറ്റ് ചിത്രങ്ങളിലൂടെ ശ്രദ്ധേയനായ സംഗീത സംവിധായകനായ സന്തോഷ് നാരായണന്‍റെ ആദ്യ മലയാള ചിത്രമാണിത്. പൃഥ്വിരാജിനെ നായകനാക്കി ഒരുക്കിയ മുംബൈ പോലീസിനു ശേഷം ബോബി സഞ്ജയ്- റോഷൻ ആൻഡ്രൂസ് ടീം വീണ്ടും ഒന്നിക്കുന്ന ത്രില്ലർ ചിത്രമാണ് സല്യൂട്ട്.
പ്രേക്ഷകർ ഏറെ കാത്തിരിക്കുന്ന ചിത്രമാണ് കുറുപ്പ്. ദുൽഖറിന്‍റെ ആദ്യ ചിത്രം സെക്കൻഡ് ഷോയ്ക്കു ശേഷം സംവിധായകൻ ശ്രീനാഥുമായി വീണ്ടും ഒന്നിക്കുന്ന ചിത്രമാണിത്. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിലാണ് കുറുപ്പ് പ്രേക്ഷകരിലേക്കെത്തുക. ‘36 വർഷങ്ങൾ, ആയിരത്തിലധികം യാത്രകൾ, എല്ലാം ഒരേയൊരു ആൾക്കായി.. സുകുമാരക്കുറുപ്പ്...’ എന്ന സംഭാഷണത്തോടെ എത്തിയ ചിത്രത്തിന്‍റെ ട്രെയിലറിനു ഗംഭീര സ്വീകരണമാണ് സമൂഹ മാധ്യമങ്ങളിൽ ലഭിച്ചത്.
40 കോടിയിലധികം രൂപ മുതൽ മുടക്കി എം സ്റ്റാർ ഫിലിംസിന്‍റെയും വേഫെയറർ ഫിലിംസിന്‍റെയും ബാനറിൽ നായകനായ ദുൽഖർ തന്നെയാണ് സിനിമ നിർമിച്ചിരിക്കുന്നത്. ജിതിൻ കെ. ജോസ് കഥ ഒരുക്കിയിരിക്കുന്ന ചിത്രത്തിന്‍റെ തിരക്കഥയും സംഭാഷണവും ഡാനിയേൽ സായൂജ് നായരും കെ.എസ്. അരവിന്ദും ചേർന്നാണ് എഴുതിയിരിക്കുന്നത്.
നിമിഷ് രവി ഛായാഗ്രഹണവും സുഷിൻ ശ്യാം സംഗീത സംവിധാനവും നിർവഹിക്കുന്നു. മൂത്തോൻ ഫെയിം ശോഭിത ധുലിപാലയാണ് ചിത്രത്തിലെ നായിക. ഇന്ദ്രജിത് സുകുമാരൻ, സണ്ണി വെയ്ൻ, ഷൈൻ ടോം ചാക്കോ, വിജയരാഘവൻ, പി. ബാലചന്ദ്രൻ, സുരഭി ലക്ഷ്മി, ശിവജിത് പദ്മനാഭൻ തുടങ്ങിയവരും ചിത്രത്തിൽ അഭിനയിക്കുന്നുണ്ട്. ചിത്രം മേയ് അവസാനത്തോടെ തിയറ്ററിലെത്തും.