ശുദ്ധ പാശ്ചാത്യ സംഗീതം ആസ്വദിക്കുന്നവരുടെ ആത്മാവിന്റെ ഉള്ളറകളെ തേൻകൊണ്ടു നിറച്ച ഗായകനായിരുന്നു ജിം റീവ്സ്
ലോകോത്തര നിലവാരമുള്ള ഗായകരിൽ വെൽവെറ്റ് ശബ്ദത്തിൽ ഗാനമാലപിക്കുന്നതാര് എന്നു ചോദിച്ചാൽ ഉത്തരം ജിം റീവ്സ് എന്നായിരിക്കും. ശുദ്ധ പാശ്ചാത്യ സംഗീതം ആസ്വദിക്കുന്നവരുടെ ആത്മാവിന്റെ ഉള്ളറകളെ തേൻകൊണ്ടു നിറച്ച ഗായകനായിരുന്നു ജിം റീവ്സ്.
ചെവികൾകൊണ്ടു മാത്രം ഗാനാസ്വാദനം നടത്തുന്നവർ ജിം റീവ്സിനോടു പൊറുക്കുക. അദ്ദേഹത്തിന്റെ ഗാനങ്ങൾ അത്തരക്കാർക്കുള്ളതല്ല! ഹൃദയത്തിന്റെ ലോലതന്ത്രികളെ തൊട്ടുണർത്തി ആസ്വാദനത്തിന്റെ സ്വർഗീയ നിമിഷങ്ങൾ സൃഷ്ടിക്കുക എന്നതായിരുന്നു ജിം റീവ്സിന്റെ രീതി.
നഷ്ടപ്രണയം
നഷ്ടപ്രണയത്തിന്റെ വിഷാദ ദളങ്ങൾ ആസ്വാദകന്റെ ഉള്ളിൽ വിരിയിക്കുന്ന നിരവധി ഗാനങ്ങൾ ജിം റീവ്സിന്റേതായി ഉണ്ട്. ഹി വിൽ ഹാവ് ടു ഗോ, വെൻ യു ആർ ഗോണ്, ബ്ലൂ സൈഡ് ഓഫ് ലോണ്സം, ഗിൽറ്റി, ഐ വോണ്ട് ഫൊർഗെറ്റ് യു തുടങ്ങിയ ഗാനങ്ങൾ ജിം റീവ്സ് തന്റെ ബാരിറ്റോണ് (താഴ്ന്ന ശ്രുതിയിലുള്ള ശബ്ദം)കൊണ്ട് ഹൃദയസ്പർശിയാക്കി.
ജിം റീവ്സിന്റെ ഇത്തരം ഗാനങ്ങൾ ജനഹൃദയങ്ങളെ തെല്ലൊന്നുമല്ല ആർദ്രമാക്കിയിട്ടുള്ളത്. വീ താങ്ക് ദീ, ടെയ്ക് മൈ ഹാൻഡ് പ്രെഷസ് ലോർഡ് തുടങ്ങിയവ ജിം റീവ്സ് ആലപിച്ച ഗോസ്പൽ ഗാനങ്ങളാണ്. ജിംഗിൾ ബെൽസ്, ഓ കം ഓൾ യീ ഫെയ്ത്ത്ഫുൾ, സൈലന്റ് നൈറ്റ് ഹോളി നൈറ്റ്, മേരീസ് ബോയ് ചൈൽഡ് തുടങ്ങി ക്രിസ്മസ് ഗാനങ്ങളുടെ ഒരു നിരതന്നെയുണ്ട് ജിം റീവ്സിന്റേതായി.
തുടക്കം റേഡിയോ ഷോ
അമേരിക്കയിലെ ടെക്സസിലെ ഗാലോവേ എന്ന ചെറുപട്ടണത്തിൽ ജനിച്ച ജിം റീവ്സിന്റെ മുഴുവൻ പേര് ജയിംസ് ട്രാവിസ് റീവ്സ് എന്നായിരുന്നു. ജനിച്ചു പത്താംമാസത്തിൽ കൊച്ചുജിമ്മിനു തന്റെ പിതാവിനെ നഷ്ടമായി. ഒൻപതു മക്കളുള്ള കുടുംബം പുലർത്താൻ ജിം റീവ്സിന്റെ അമ്മ തെരഞ്ഞെടുത്തത് കൃഷിയായിരുന്നു. ചെറുപ്രായത്തിൽ റീവ്സ് തന്റെ സഹോദരന്റെ ഗ്രാമഫോണിൽ ജിമ്മി റോജേഴ്സ് എന്ന ഗായകന്റെ ഗാനങ്ങൾ ധാരാളം കേട്ടിരുന്നു.
അവ അവനിൽ സംഗീതത്തോടുള്ള അഭിനിവേശം വളർത്തി. 12-ാം വയസിൽ കൊച്ചുറീവ്സ് ഷ്രീവ് പോർട്ട് എന്ന സ്ഥലത്ത് ഒരു റേഡിയോ ഷോയിൽ പാടി. പ്രഫഷണൽ ബെയ്സ് ബോൾ കളിക്കാരനായിത്തീർന്ന റീവ്സ് മുട്ടിനു പറ്റിയ പരിക്കിനുശേഷം സംഗീതത്തിൽ കൂടുതൽ ശ്രദ്ധ ചെലുത്തി. തന്റെ സ്വരമാധുര്യത്തെ ബ്രോഡ്കാസ്റ്റിംഗിൽ വിദഗ്ധമായി ഉപയോഗിക്കാൻ റീവ്സിനു കഴിഞ്ഞിരുന്നു.
ഒരിക്കൽ ജിം റീവ്സ് ഹോസ്റ്റ് ചെയ്തിരുന്ന ലൂസിയാന റൈഡ് പ്രോഗ്രാമിൽ എത്താമെന്നേറ്റിരുന്ന ഹാൻക് വില്യംസിന് എത്തിച്ചേരാൻ കഴിഞ്ഞില്ല. സന്ദർഭത്തിനൊത്തുയർന്ന റീവ്സ് ചില ഗാനങ്ങൾ ആലപിക്കുന്നു, അവ ശ്രദ്ധിക്കപ്പെടുന്നു. മെക്സിക്കൻ ജോ എന്ന ഗാനം 1953-ലെ ടോപ് ഓഫ് ദി ചാർട്ട് ആയിരുന്നു. അതേ വർഷം ഇറങ്ങിയ ബിംബോ അദ്ദേഹത്തിന് കണ്ട്രി ആൻഡ് വെസ്റ്റേണ് ഗായകൻ എന്ന ലേബൽ നൽകി.
ശാന്തം, ഗംഭീരം
ചുണ്ടുകൾ മൈക്കിനോട് വളരെ അടുപ്പിച്ച് താഴ്ന്ന ശ്രുതിയിൽ ആലപിക്കുക- ഇതായിരുന്നു ജിം റീവ്സ് അവലംബിച്ച രീതി. തന്റെ ഗാനങ്ങളിൽ അദ്ദേഹം വയലിനുകളുടെ നേർത്ത സ്വരത്തെ രസസാന്ദ്രമായി കൂട്ടിച്ചേർത്ത് കണ്ട്രി മ്യൂസിക്കിന് പുതിയ ഭാവതലം സൃഷ്ടിച്ചു. അതുവരെ കണ്ട്രി മ്യൂസിക് ഗായകൻ ജീൻസും ജാക്കറ്റും തൊപ്പിയും ആയിരുന്നു സ്റ്റേജിൽ അണിഞ്ഞിരുന്നത്. പകരം സ്യൂട്ടണിഞ്ഞ് മെയ്ക്ക് ഓവർ നടത്തിയ ജിം റീവ്സ് ജന്റിൽമാൻ ജിം എന്ന പേരു നേടിയെടുത്തു.
ലോകമെങ്ങും ആരാധകർ
ലോകമെന്പാടുമുള്ള മിക്ക രാഷ്ട്രങ്ങളിലും ജിം റീവ്സിന് ആരാധകരുണ്ട്. നമ്മുടെ ഗാനഗന്ധർവൻ യേശുദാസ് കേൾക്കാൻ ഏറെ ഇഷ്ടപ്പെടുന്നവയാണ് ജിം റീവ്സ് ഗാനങ്ങൾ.
വിമാനാപകടം
1964 ജൂലൈ 31.
കരിയറിൽ ആകാശത്തോളം ഉയർന്ന ആ ഗായകൻ ചെറുവിമാനത്തിൽ ആകാശത്തിലൂടെ പറക്കുന്നു. യാത്ര പൂർത്തിയാക്കുംമുൻപ് ആ കൊച്ചുവിമാനം അപകടത്തിൽപ്പെട്ടു നിലംപൊത്തി. ആ മാസ്മരിക മധുരഗാനം നിലച്ചു! ലോകമെന്പാടുമുള്ള ആരാധകർക്ക് തങ്ങളുടെ മാനസഗായകനെ നഷ്ടപ്പെടുകയായിരുന്നു.
മേരി റീവ്സ്
റീവ്സിന്റെ ഭാര്യ മേരി റീവ്സ് അദ്ദേഹത്തിന്റെ റിലീസ് ചെയ്യപ്പെടാത്ത ഗാനങ്ങൾ പിന്നീടുള്ള നിരവധി വർഷങ്ങളിൽ ഇറക്കിക്കൊണ്ടിരുന്നു.
ഐ നോ, ദാറ്റ് ഐ വോണ്ട് ഫൊർഗെറ്റ് യു, ഫോർ ഐ ഹാവ് ലവ്ഡ് യു ടു മച്ച് ഫോർ ടൂ ലോംഗ്, ദൗ യൂ ഡോണ്ട് വോണ്ട് മീ നൗ, ഐ വിൽ സ്റ്റിൽ ലൗവ് യു... ടിൽ ദ ബ്രെത്ത് ഇൻ മൈ ബോഡി ഈസ് ഗോണ്. (ജിം റീവ്സ് ഗാനത്തിൽനിന്ന്)എനിക്കറിയാം, നിന്നെ മറക്കാനെനിക്കു കഴിയില്ലെന്ന്, എന്തെന്നാൽ, നിന്നെ ഞാൻ ദീർഘകാലം ഗാഢമായി പ്രണയിച്ചിരുന്നു. ഇപ്പോൾ നീയെന്നിൽ നിന്നകന്നെങ്കിലും ഞാൻ നിന്നെ പ്രണയിച്ചിരിക്കും. എന്നിലെ ശ്വാസം നിലയ്ക്കുന്നതുവരെയും.
ഏതോ അജ്ഞാതകാമുകി ജിം റീവ്സിന്റെ ഈ വരികൾ കേൾക്കാൻ ഇപ്പോഴും കാതോർത്തിരിക്കുന്നുണ്ടാകുമോ?
റാഫി തോട്ടാൻ