ചിക്കൻ ബിരിയാണി
ആവശ്യമുള്ള സാധനങ്ങൾ
കോഴിയിറച്ചി - ഒരു കിലോ
കയമ അരി - ഒരു കിലോ
സവാള - അര കിലോ
ഡാൽഡ - 250 ഗ്രാം
ഇഞ്ചി ചതച്ചത് - ഒരു ടേബിൾ സ്പൂണ്
വെളുത്തുള്ളി ചതച്ചത് - ഒരു ടേബിൾ സ്പൂണ്
പച്ചമുളക് ചതച്ചത് - രണ്ട് ടേബിൾ സ്പൂണ്
മഞ്ഞൾപ്പൊടി - ഒരു നുള്ള്
കസ്കസ് - അര ടീസ്പൂണ്
കറുവപ്പട്ട - നാല് കഷ്ണം
ഏലക്ക - ആറെണ്ണം
ജാതിക്ക(ചെറുത്)- ഒരെണ്ണം
അണ്ടിപ്പരിപ്പ് - 50 ഗ്രാം
ഉണക്ക മുന്തിരി - 50 ഗ്രാം
പെരുംജീരകം - ഒരു ടീസ്പൂണ്
ചെരുനാരങ്ങാ നീര് - ഒരു ടേബിൾ സ്പൂണ്
തൈര് - ഒരു കപ്പ്
തക്കാളി(വലുത്) - മൂന്നെണ്ണം
മല്ലിയില അരിഞ്ഞത് - കാൽ കപ്പ്
പുതിനയില അരിഞ്ഞത് - കാൽ കപ്പ്
ഉപ്പ് - പാകത്തിന്
നെയ്യ് - 50 ഗ്രാം
ഗരം മസാലപ്പൊടി - അര ടീസ്പൂണ്
ജാതിപത്രി - മൂന്നെണ്ണം
മൈദ - മൂന്ന് കപ്പ്
തയാറാക്കുന്നവിധം
കോഴിയിറച്ചി വൃത്തിയാക്കി കഴുകി പാകത്തിന് കഷണങ്ങളാക്കുക. അരി നന്നായി കഴുകി കറുവാപ്പട്ട കഷണങ്ങൾ ചേർത്ത് പാകത്തിന് ഉപ്പും വെള്ളവും ചെറുനാരങ്ങാനീരും ചേർത്ത് വേവിക്കുക. പകുതി വേവാകുന്പോൾ വാങ്ങി കുട്ടയിൽ ഉൗറ്റി വയ്ക്കുക. ഉണക്ക മുന്തിരി, കശുവണ്ടി, സവാള അരിഞ്ഞതിന്റെ പകുതി എന്നിവ ചീനച്ചട്ടിയിൽ നെയ്യും കുറച്ചു ഡാൽഡയും ഒഴിച്ച് ചൂടാക്കി വറുത്തു കോരുക. ഈ നെയ്യിൽ ബാക്കി വന്ന സവാള വഴറ്റുക. അതിലേക്ക് മല്ലിയില, പുതിനയില എന്നിവ ചേർത്ത് ചെറുതീയിൽ വീണ്ടും വഴറ്റി മാറ്റിവയ്ക്കുക.
കോഴിയിറച്ചി കഷണങ്ങൾ തൈര്, പാകത്തിന് ഉപ്പ്, മഞ്ഞൾപ്പൊടി എന്നിവയും തക്കാളി ചെറുതായി മുറിച്ചതും ചേർത്ത് നന്നായി തിരുമ്മി മാറ്റിവയ്ക്കുക. വഴറ്റിവച്ചിരിക്കുന്ന സവാളയിലേക്ക് കോഴിയിറച്ചി മിശ്രിതം ചേർത്തിളക്കുക. വെളുത്തുള്ളി ചതച്ചതും ഇഞ്ചി ചതച്ചതും കസ്കസ്, ജാതിക്കാ, പെരുംജീരകം, ഏല ക്കാ, ജാതിപത്രി എന്നിവ പൊടിച്ചതും ചേർത്തിളക്കുക. പാകമായി വന്നാൽ അടിപരന്ന പാത്രത്തിൽ അല്പം നെയ്യൊഴിച്ച് ഇറച്ചി അടിയിൽ നിരത്തുക.
ഇതിനു മുകളിൽ മസാല കൂട്ട് ചേർക്കണം. വേവിച്ചുവച്ച പകുതി ചോറെടുത്ത് മസാലയ്ക്ക് മുകളിൽ നിരത്തുക. ആദ്യം വറുത്ത് മാറ്റിവച്ച സവാള, ഉണക്കമുന്തിരി, അണ്ടിപ്പരിപ്പ് എന്നിവ ചേർത്ത് മുകളിൽ നിരത്തണം. അതിനു മുകളിൽ വീണ്ടും ബാക്കി ചോറ് നിരത്തിയശേഷം മീതെ നെയ്യൊഴിക്കണം. പാത്രം ഒരു പരന്ന മൂടികൊണ്ട് അടച്ചശേഷം പാത്രവും മൂടിയും വരുന്ന ഭാഗം ഒട്ടും ഇടവില്ലാതെ മൈദ കുഴച്ച മാവ് ചേർത്ത് അടയ്ക്കണം. ഏകദേശം ഒരു മണിക്കൂർ കനലിൽ നന്നായി വേവിക്കുക. മൈദ മാവിന്റെ വിടവിലൂടെ ബിരിയാണിയുടെ മണം പരന്നാൽ പാകമായി. ദം ബിരിയാണി റെഡി.
കൂണ് ബിരിയാണി
ആവശ്യമുള്ള സാധനങ്ങൾ
ചിപ്പി കൂണ് - ഒരു കപ്പ്
ബസുമതി അരി - ഒരു കപ്പ്
സവാള - ഒരെണ്ണം
ഗ്രാന്പൂ - മൂന്നെണ്ണം
ഏലക്കായ - മൂന്നെണ്ണം
കുരുമുളക് - നാലെണ്ണം
ഗരം മസാലപ്പൊടി - ഒരു ടീസ്പൂണ്
പെരുംജീരകം - അര ടീസ്പൂണ്
അണ്ടിപ്പരിപ്പ് - 10 എണ്ണം
കിസ്മിസ് - 10 എണ്ണം
എണ്ണ - അഞ്ച് ടേബിൾ സ്പൂണ്
വെള്ളം - രണ്ട് കപ്പ്
ഉപ്പ് - പാകത്തിന്
തയാറാക്കുന്നവിധം
അരി കഴുകി വെള്ളം വാലാൻ വയ്ക്കുക. പരന്ന പാത്രത്തിൽ എണ്ണ ഒഴിച്ച് ചൂടാകുന്പോൾ പെരുംജീരകം, കുരുമുളക്, ഗ്രാന്പൂ, ഏലക്ക എന്നിവ ചേർക്കുക. അതിനുശേഷം സവാള ചേർത്ത് വീണ്ടും വഴറ്റുക. ഇതിലേക്ക് കൂണ് ചേർത്ത് നന്നായി ഇളക്കുക. പാകത്തിന് ഉപ്പും ചേർത്ത് അഞ്ച് മിനിറ്റ് മൂടിവച്ച് ചെറുതീയിൽ വേവിക്കുക. ഇതിലേക്ക് അരിയും ഗരം മസാലയും വെള്ളവും ചേർത്തിളക്കുക. ആവശ്യമെങ്കിൽ ഉപ്പ് ചേർക്കാം. വീണ്ടും അടച്ചുവച്ച് വെള്ളം വറ്റും വരെ ചെറുതീയിൽ വേവിക്കുക. അണ്ടിപ്പരിപ്പും കിസ്മിസും ചേർത്തിളക്കി വിളന്പാം.