കാറും കോളും മാഞ്ഞു. മലയാളസിനിമ വീണ്ടും കുതിപ്പിന്‍റെ പാതയിൽ. കുറുപ്പിൽ തുടങ്ങിയ കുതിപ്പ് ആർത്തലച്ചു മുന്നേറുകയാണ്. അതുകൊണ്ടുതന്നെ തിയറ്ററിലും ഒടിടി പ്ലാറ്റ്ഫോമിലുമായി ഒരുപിടി വന്പൻ ചിത്രങ്ങളാണ് ക്രിസ്മസിന് കാഴ്ചയുടെ വിരുന്നൊരുക്കാനെത്തുന്നത്. മുന്പ് ഫെസ്റ്റിവൽ സീസണുകളിൽ തിയറ്ററുകളിൽ മാത്രമായിരുന്നു പ്രധാന റിലീസുകളെങ്കിൽ ഇത്തവണ അത് ഒടിടി പ്ലാറ്റ്ഫോമുകളിലേക്കും പങ്കിട്ടുകഴിഞ്ഞു.
പുതിയ വിപണിസാധ്യത സിനിമാ മേഖലയ്ക്കും ഗുണകരമായി മാറിയിരിക്കുന്നു. ഒരുപിടി ചിത്രങ്ങൾ തിയറ്റർ വിജയം നേടുന്പോൾ നെറ്റ്ഫ്ളിക്സ്, ആമസോണ് പ്രൈം, ഡിസ്നി ഹോട്ട്സ്റ്റാർ തുടങ്ങിയ ലോകോത്തര ഒടിടി പ്ലാറ്റ്ഫോമുകളിലും മലയാള സിനിമയ്ക്കു കച്ചവടം സാധ്യത കൂടിവരുന്നതാണ് ക്രിസ്മസ് റിലീസുകൾ സൂചിപ്പിക്കുന്നത്. നേരിട്ടുള്ള ഒടിടി റിലീസുകൾക്കൊപ്പം മലയാളത്തിലെ മൂന്നു സൂപ്പർ താരചിത്രങ്ങളും ആഫ്റ്റർ തിയറ്റർ റിലീസുകളായി ഒടിടിയിൽ എത്തുന്നുണ്ട്.
ദുൽഖർ സൽമാന്‍റെ കുറുപ്പ് നെറ്റ്ഫ്ളിക്സിലും മോഹൻലാലിന്റെ ബ്രഹ്മാണ്ഡ ചിത്രം മരയ്ക്കാർ: അറബിക്കടലിന്‍റെ സിംഹം ആമസോണ് പ്രൈമിലും റിലീസായിട്ടുണ്ട്. സുരേഷ് ഗോപി ആക്ഷൻ ഹീറോയായി എത്തിയ കാവൽ ഈ വാരം നെറ്റ്ഫ്ളിക്സിൽ റിലീസാകുന്നു. ക്രിസ്മസിനു കാഴ്ചയുടെ ആഘോഷം നിറയ്ക്കാനെത്തുന്ന ഒരുപിടി സിനിമാ വിശേഷങ്ങളിലേക്ക്...
മിന്നൽ മുരളി
മലയാളത്തിൽ നിന്നുള്ള ആദ്യത്തെ സൂപ്പർ ഹീറോ എന്ന ടാഗോടെ എത്തുന്ന ബിഗ് ബജറ്റ് ചിത്രമാണ് മിന്നൽ മുരളി. ടൊവിനോ തോമസിനെ പ്രധാന കഥാപാത്രമാക്കി ബേസിൽ ജോസഫ് സംവിധാനം ചെയ്യുന്ന ചിത്രം മിന്നൽ മുരളി എന്ന അമാനുഷിക നായകന്‍റെ കഥ പറയുന്നു. ടൊവിനോയുടെ കരിയറിലെ നിർണായക കഥാപാത്രമാണിത്.
ക്രിസ്മസിന് ചിത്രം നെറ്റ്ഫ്ളിക്സിൽ മാത്രമായി ലോകമെന്പാടും പ്രീമിയർ ചെയ്യും. തമിഴ്, തെലുങ്ക്, കന്നഡ, ഹിന്ദി, ഇംഗ്ലീഷ് ഭാഷകളിലാണ് ചിത്രം എത്തുന്നത്. വീക്കെൻഡ് ബ്ലോക്ക്ബസ്റ്റേഴ്സിന്റെ ബാനറിൽ സോഫിയ പോൾ നിർമിക്കുന്ന ചിത്രത്തിൽ ഗുരു സോമസുന്ദരം, ഹരിശ്രീ അശോകൻ, അജു വർഗീസ്, ബിജുക്കുട്ടൻ, മാമുക്കോയ, ബൈജു സന്തോഷ്, ജൂഡ് ആന്‍റണി ജോസഫ് തുടങ്ങിയ താരങ്ങളും എത്തുന്നു.
പുതുമുഖം ഫെമിന ജോർജാണ് നായികയാകുന്നത്. ബ്രൂസ് ലി ബിജി എന്ന കഥാപാത്രമാണ് ഫെമിനയുടേത്. എ.ആർ. അരുണ്‍, ജസ്റ്റിൻ മാത്യൂസ് എന്നിവരാണ് കഥ, തിരക്കഥ, സംഭാഷണമെഴുതുന്നത്. മനു മഞ്ജിത്തിന്‍റെ വരികൾക്ക് ഷാൻ റഹ്മാൻ, സുഷിൻ ശ്യാം എന്നിവർ സംഗീതം പകരുന്നു.സമീർ താഹീറാണ് ഛായാഗ്രഹണം.
മ്യാവ്യൂ
സൗബിൻ ഷാഹിർ, മംമ്ത മോഹൻദാസ് എന്നിവരെ പ്രധാന കഥാപാത്രങ്ങളാക്കി ലാൽജോസ് സംവിധാനം ചെയ്യുന്ന മ്യാവൂ ക്രിസ്മസിനു തിയറ്ററിലെത്തും. അറബിക്കഥ, ഡയമണ്ട് നെക്ലേസ്, വിക്രമാദിത്യൻ എന്നീ സൂപ്പർഹിറ്റ് വിജയ് ചിത്രങ്ങൾ ശേഷം ലാൽജോസിനുവേണ്ടി ഡോ. ഇക്ബാൽ കുറ്റിപ്പുറം തിരക്കഥ എഴുതുന്ന ചിത്രമാണിത്. തോമസ് തിരുവല്ല നിർമിക്കുന്ന ചിത്രം എൽജെ ഫിലിംസ് തിയറ്ററിലെത്തിക്കും.
സലിംകുമാർ, ഹരിശ്രീ യൂസഫ് തുടങ്ങിയവർക്കൊപ്പം രണ്ടു കുട്ടികളും ഒരു പൂച്ചയും ചിത്രത്തിൽ പ്രധാന കഥാപാത്രങ്ങളാണ്. ഗൾഫിൽ ജീവിക്കുന്ന ഒരു സാധാരണ കുടുംബത്തിന്‍റെ കഥ പറയുന്ന മ്യാവു പൂർണമായും യുഎഇയിലാണ് ചിത്രീകരിച്ചിരിക്കുന്നത്. ഛായാഗ്രഹണം അജ്മൽ സാബു നിർവഹിക്കുന്നു. സുഹൈൽ കോയയുടെ വരികൾക്ക് ജസ്റ്റിൻ വർഗീസ് സംഗീതം പകരുന്നു. ലൈൻ പ്രൊഡ്യുസർ: വിനോദ് ഷൊർണൂർ, എഡിറ്റർ: രഞ്ജൻ ഏബ്രാഹം.
കുഞ്ഞെൽദോ
ആസിഫ് അലിയെ പ്രധാന കഥാപാത്രമാക്കി മാത്തുക്കുട്ടി തിരക്കഥയെഴുതി സംവിധാനം ചെയ്യുന്ന കുഞ്ഞെൽദോ സെഞ്ച്വറി ഫിലിംസ് തിയറ്ററുകളിലെത്തിക്കുന്നു. കൽക്കിക്കു ശേഷം ലിറ്റിൽ ബിഗ് ഫിലിംസിന്‍റെ ബാനറിൽ സുവിൻ കെ. വർക്കി, പ്രശോഭ് കൃഷ്ണ എന്നിവർ നിർമിക്കുന്ന ചിത്രത്തിൽ പുതുമുഖം ഗോപിക ഉദയൻ നായികയാവുന്നു.
സുധീഷ്, സിദ്ധിഖ്, അർജുൻ ഗോപാൽ, നിസ്താർ സേട്ട്, രാജേഷ് ശർമ്മ, കോട്ടയം പ്രദീപ്, മിഥുൻ എം. ദാസ് തുടങ്ങിയവരാണ് പ്രമുഖ താരങ്ങൾ. റേഡിയോ, ടെലിവിഷൻ അവതാരകനായി പരിചിതനായ മാത്തുക്കുട്ടി ആദ്യമായി സംവിധാനം ചെയ്യുന്ന ചിത്രമാണിത്. കുടുംബാന്തരീക്ഷത്തിൽ ഒരുക്കുന്ന ചിത്രം കുഞ്ഞെൽദോയുടെ ജീവിതത്തിലെ കുറച്ചധികം സംഭവങ്ങളെയാണ് ദൃശ്യവൽക്കരിക്കുന്നത്. സ്വരുപ് ഫിലിപ് ഛായാഗ്രഹണം നിർവഹിക്കുന്നു.
സന്തോഷ് വർമ്മ, അശ്വതി ശ്രീകാന്ത്, അനു എലിസബത്ത് ജോസ് എന്നിവരുടെ വരികൾക്ക് ഷാൻ റഹ് മാൻ സംഗീതം പകരുന്നു. ക്രിയേറ്റീവ് ഡയറക്ടറായി നടനും സംവിധായകനുമായ വിനീത് ശ്രീനിവാസനും ചിത്രത്തിലെത്തുന്നു. എഡിറ്റർ: രഞ്ജൻ ഏബ്രാഹം.
അജഗജാന്തരം
ആന്‍റണി വർഗീസ്, അർജുൻ അശോകൻ, ചെന്പൻ വിനോദ് എന്നിവരെ പ്രധാന കഥാപാത്രങ്ങളാക്കി ടിനു പാപ്പച്ചൻ സംവിധാനം ചെയ്യുന്ന അജഗജാന്തരം തിയറ്ററിലെത്തും. സാബുമോൻ, സുധി കോപ്പ, കിച്ചു ടെല്ലസ്, ടിറ്റോ വിത്സൽ, സിനോജ് വർഗീസ്, രാജേഷ് ശർമ്മ, ലുക്ക്മാൻ, ജാഫർ ഇടുക്കി, വിനീത് വിശ്വം, ബിറ്റോ ഡേവീസ് തുടങ്ങിയവരാണ് മറ്റു താരങ്ങൾ. സെൻട്രൽ പിക്ചേഴ്സ് റിലീസ് പ്രദർശനത്തിനെത്തിക്കുന്നു.
സിൽവർ ബേ സ്റ്റുഡിയോസിന്റെ ബാനറിൽ ഇമ്മാനുവൽ ജോസഫ്, അജിത് തലപ്പിള്ളി എന്നിവർ നിർമിക്കുന്ന ചിത്രത്തിന്‍റെ ഛായാഗ്രഹണം ജിന്‍റോ ജോർജ് നിർവഹിക്കുന്നു. കിച്ചു ടെല്ലസ്, വിനീത് വിശ്വം എന്നിവരാണ് തിരക്കഥയും സംഭാഷണവും.
ഒരു ഉത്സവ പറന്പിലേക്ക് ആനയും പാപ്പാനും ഒരു കൂട്ടം യുവാക്കളും എത്തുകയും പിന്നീട് 24 മണിക്കൂറിനുള്ളിൽ അവിടെ നടക്കുന്ന സംഭവങ്ങളുമാണ് ഇതിവൃത്തം. വന്പൻ ആക്ഷൻ രംഗങ്ങളാണ് ചിത്രത്തിൽ ഒരുക്കിയിരിക്കുന്നത്. സംഗീതം ജേക്സ് ബിജോയും എഡിറ്റിംഗ് ഷമീർ മുഹമ്മദും നിർവഹിക്കുന്നു.
കോളാന്പി
നിത്യമേനോൻ, രണ്‍ജി പണിക്കർ എന്നിവരെ മുഖ്യ കഥാപാത്രങ്ങളാക്കി ടി.കെ. രാജീവ് കുമാർ കഥയെഴുതി സംവിധാനം ചെയ്യുന്ന കോളാന്പി ഒടിടിയിൽ റിലീസ് ചെയ്യുന്നു. മലയാളത്തിലെ പുതിയ ഒടിടി പ്ലാറ്റ്ഫോമായ എം ടാക്കീയിലൂടെയാണ് റിലീസ്. ദിലീഷ് പോത്തൻ, ബൈജു സന്തോഷ്, സിദ്ധാർത്ഥ് മേനോൻ, സിജു വിത്സൻ, പി. ബാലചന്ദ്രൻ, സുരേഷ് കുമാർ, അരിസ്റ്റോ സുരേഷ്, രോഹിണി, മഞ്ജു പിള്ള, പോളി വത്സൻ, ഷൈനി സാറ തുടങ്ങിയവരാണ് മറ്റു താരങ്ങൾ.
നിർമാല്യം സിനിമയുടെ ബാനറിൽ രൂപേഷ് ഓമന നിർമിക്കുന്ന കോളാന്പിയുടെ ഛായാഗ്രഹണം രവി വർമ്മൻ നിർവഹിച്ചിരിക്കുന്നു. ടി.കെ. രാജീവ് കുമാർ, ഡോ.കെ.എം. വേണുഗോപാൽ എന്നിവർ ചേർന്ന് തിരക്കഥയെഴുതുന്നു. സംഭാഷണം: ഡോ. കെ.എം. വേണുഗോപാൽ. പ്രഭാ വർമ്മ, വിനായക് ശശികുമാർ എന്നിവരുടെ വരികൾക്ക് രമേശ് നാരായണൻ സംഗീതം പകരുന്നു.
മധുരം
ജോജു ജോർജ്, അർജുൻ അശോകൻ, നിഖിലാ വിമൽ, ശ്രുതി രാമചന്ദ്രൻ, ഇന്ദ്രൻസ് എന്നിവർ പ്രധാന കഥാപാത്രങ്ങളാകുന്ന മധുരം സോണി ലൈവിൽ റിലീസ് ചെയ്യുന്നു.
ജൂണ്‍ എന്ന ചിത്രത്തിനു ശേഷം അഹമ്മദ് കബീർ സംവിധാനം ചെയ്യുന്ന ചിത്രം പ്രണയകഥയാണ്. ജോസഫ്, പൊറിഞ്ചു മറിയം ജോസ്, ചോല എന്നീ ചിത്രങ്ങൾക്ക് ശേഷം അപ്പു പാത്തു പപ്പു പ്രൊഡക്ഷൻസിന്റെ ബാനറിൽ ജോജു ജോർജ്, സിജോ വടക്കൻ എന്നിവർ നിർമിക്കുന്ന ചിത്രത്തിന്‍റെ ഛായാഗ്രഹണം ജിതിൻ സ്റ്റാനിസ്ലാസ് നിർവഹിക്കുന്നു.
ആഷിക് ഐമർ, ഫാഹിം സഫർ എന്നിവർ ചേർന്ന് തിരക്കഥ സംഭാഷണമെഴുതുന്നു. വിനായക് ശശികുമാറിന്‍റെ വരികൾക്ക് ഹിഷാം അബ്ദുൾ വഹാബ് സംഗീതം പകരുന്നു. കൊ പ്രൊഡ്യൂസേഴ്സ്: ബാദുഷ, സുരാജ്, എഡിറ്റിംഗ്: മഹേഷ്.