ന്യൂയോർക്ക്: ജൂലൈ ഒന്പത് മുതൽ 12 വരെ നടക്കുന്ന നോർത്ത് ഈസ്റ്റ് അമേരിക്കൻ ഭദ്രാസന ഫാമിലി ആൻഡ് യൂത്ത് കോൺഫറൻസിനുള്ള ഗായകസംഘം രൂപീകരിച്ചു. മിഡ്‌ലൻഡ്‌ പാർക്ക് സെന്‍റ് സ്റ്റീഫൻസ് ഇടവക വികാരിയും ഗാനരചയിതാവും സംഗീത സംവിധായകനും ഗായകനുമായ ഫാ.ഡോ.ബാബു കെ. മാത്യുവിന്‍റെ നേതൃത്വത്തിലുള്ള ഗായകസംഘം അവസാനഘട്ട പരിശീലനത്തിലാണ്.
കോൺഫറൻസിൽ പങ്കെടുക്കുന്നവർക്ക് ആത്മീയ ഉണർവും പ്രചോദനവും നൽകുകയാണ് ഗായകസംഘത്തിന്‍റെ ലക്ഷ്യം. മിഡ്‌ലൻഡ്‌ പാർക്ക് സെന്‍റ് സ്റ്റീഫൻസ്, മൗണ്ട് ഒലിവ് സെന്‍റ് തോമസ്, ലിൻഡൻ സെന്‍റ് മേരീസ്, ക്ലിഫ്‌ടൺ സെന്‍റ് ഗ്രീഗോറിയോസ്, നോർത്ത് പ്ലെയിൻഫീൽഡ് സെന്‍റ്സ് ബസേലിയോസ്ഗ്രീഗോറിയോസ് എന്നീ ഓർത്തഡോക്സ് ഇടവകകളിൽ നിന്നുള്ള ഗായകർ മലയാളം, ഇംഗ്ലിഷ് എന്നീ ഭാഷകളിലാണ് ഗാനങ്ങൾ ആലപിക്കുന്നത്.
ജൂലൈ ഒന്പത് മുതൽ 12 വരെ കണക്ടിക്കട് ഹിൽട്ടൺ സ്റ്റാംഫർഡ് ഹോട്ടൽ & എക്‌സിക്യൂട്ടീവ് മീറ്റിംഗ് സെന്‍ററിലാണ് കോൺഫറൻസ് നടക്കുന്നത്. റവ. ഡോ. നൈനാൻ വി. ജോർജ് (ഓർത്തഡോക്സ് വൈദിക സംഘം ജനറൽ സെക്രട്ടറി), റവ. ഡോ. റ്റിമത്തി (ടെന്നി) തോമസ് (നോർത്ത് ഈസ്റ്റ് അമേരിക്കൻ ഭദ്രാസന സൺഡേ സ്കൂൾ ഡയറക്ടർ), ഫാ. ജോൺ (ജോഷ്വ) വർഗീസ് (സൗത്ത് വെസ്റ്റ് അമേരിക്കൻ ഭദ്രാസന യൂത്ത് മിനിസ്റ്റർ), റവ. ഡീക്കൻ അന്തോണിയോസ് (റോബി) ആന്‍റണി (ടാൽമീഡോ നോർത്ത് ഈസ്റ്റ് അമേരിക്കൻ ഭദ്രാസന മെൻസ് മിനിസ്ട്രി ഡയറക്ടർ) എന്നിവരാണ് മുഖ്യ പ്രാസംഗികർ.
"നമ്മുടെ പൗരത്വം സ്വർഗത്തിലാണ്, അവിടെനിന്നുള്ള ഒരു രക്ഷകനായ കർത്താവായ യേശുക്രിസ്തുവിനെ ഞങ്ങൾ ആകാംക്ഷയോടെ കാത്തിരിക്കുന്നു' (ഫിലിപ്പിയർ 3:20) എന്ന ബൈബിൾ വാക്യത്തെ അടിസ്ഥാനമാക്കിയുള്ള പരദേശിയുടെ വഴി എന്നതാണ് കോൺഫറൻസിന്‍റെ പ്രമേയം.
ബൈബിൾ, വിശ്വാസം, പാരമ്പര്യം, സമകാലിക വിഷയങ്ങൾ എന്നിവയെ അടിസ്ഥാനമാക്കി കുട്ടികൾക്കും യുവജനങ്ങൾക്കും മുതിർന്നവർക്കും പ്രത്യേകം സംവേദനാത്മക സെഷനുകൾ ഉണ്ടായിരിക്കും. കുടുംബാരാധനയും ബന്ധങ്ങളും ശക്തിപ്പെടുന്നതിന് സമഗ്രമായ പരിപാടികളാണ് കോൺഫറൻസിൽ ആസൂത്രണം ചെയ്തിരിക്കുന്നത്.
കൂടുതൽ വിവരങ്ങൾക്ക്: ഫാ. അബു വർഗീസ് പീറ്റർ, കോൺഫറൻസ് കോഓർഡിനേറ്റർ 914 806 4595, ജെയ്‌സൺ തോമസ്, കോൺഫറൻസ് സെക്രട്ടറി 917 612 8832, ജോൺ താമരവേലിൽ, കോൺഫറൻസ് ട്രഷറർ 917 533 3566.
|