ഈ മീൻകറി റൊമ്പ ടേസ്റ്റായിറുക്ക്....

Home |

Editorial |

Leader Page Article |

Local News |

Review

ഈ മീൻകറി റൊമ്പ ടേസ്റ്റായിറുക്ക്....

പച്ചമലയാളത്തിൽ പറഞ്ഞാൽ മീൻകറിയും മൺചട്ടിയും എന്നാണ് മീൻകുഴമ്പും മൺപാനയുമെന്നതിന്റെ അർഥം. ഈ ചിത്രവും ഈപേരും തമ്മിലുള്ള ബന്ധം എന്താണെന്നല്ലേ... മീൻ കറിയ്ക്ക് വേണ്ട കൂട്ടെല്ലാം കൃത്യമായില്ലേൽ അതു കഴിക്കാൻ ഒരു രുചിയും ഉണ്ടാകില്ല. അതിപ്പോൾ ഉപ്പോ മുളകോ കുറഞ്ഞാലും കൂടിയാലും അതു തന്നെയാണ് അവസ്‌ഥ. സിനിമയിലും അതുപോലെ തന്നെയാണ് ചേരുവകളെല്ലാം കൃത്യമായി ചേർന്നില്ലേൽ ആകെ മൊത്തം കുളമാകും.

എന്നാൽ ഈ പേരിനെ ഈ സിനിമയോട് ബന്ധപ്പിച്ച് ഒരു താരപുത്രന് നായക നടനിലേക്കുള്ള എൻട്രി കൊടുക്കാൻ പാകത്തിനുള്ള ഒരു ഒന്നാന്തരം കൂട്ടൊരുക്കിയിരിക്കുകയാണ് സംവിധായകൻ അമുതേശ്വർ മീൻകുഴമ്പും മൺപാനയും എന്ന ചിത്രത്തിലൂടെ. നന്മയുള്ള കഥ, ഇടിക്ക് ഇടി, ഡാൻസിന് ഡാൻസ്, റൊമാൻസിന് റൊമാൻസ് അങ്ങനെയെല്ലാം കൊണ്ടും ഒരു കിടിലൻ എൻട്രി തന്നെയാണ് നടൻ ജയറാമിന്റെ മകൻ കാളിദാസിന് തമിഴകത്ത് കിട്ടിയത്.

മലേഷ്യയിൽ മീൻകുഴമ്പും മൺപാനയും എന്ന പേരിൽ റെസ്റ്റോറന്റ് നടത്തുന്ന അണ്ണാമലൈയുടെയും (പ്രഭു) മകൻ കാർത്തിക്കിന്റെയും (കാളിദാസ്) കഥയാണ് ചിത്രം പറയുന്നത്. അച്ഛൻ–മകൻ സ്നേഹബന്ധത്തിന്റെ കഥ ഒരുപാട് കണ്ടിട്ടുള്ളവരുടെ മുന്നിലേക്ക് സംവിധായകൻ വീണ്ടും ഇതേ വിഷയവുമായി കടന്നു വരുമ്പോൾ കണ്ടേക്കാവുന്ന ക്ലീഷേ രംഗങ്ങളെല്ലാം ഈ ചിത്രത്തിലും കടന്നുവരുന്നുണ്ട്. എന്നാൽ പ്രഭുവിന്റെയും കാളിദാസിന്റെയും അഭിനയമികവിലൂടെ ഒരുപരിധി വരെ ഈ ചിത്രത്തിന് ഒരു പുതിയ മുഖം ഉണ്ടാക്കിയെടുക്കുന്നതിൽ സംവിധായകൻ വിജയിച്ചുവെന്നു തന്നെ പറയാം.

കോളജ് കുമാരനായ കാർത്തിക്കിന്റെ പ്രണയവും കുറുമ്പുമെല്ലാം കാട്ടി ഡാൻസും പാട്ടുമായി മുന്നോട്ടു പോകുന്നിടത്തേക്ക് അച്ഛൻ മകൻ ബന്ധത്തിന്റെ അകൽച്ച കാട്ടാനായി സംവിധായകൻ കൂടുതൽ സമയം വിനിയോഗിക്കുന്നിടത്താണ് ചിത്രത്തിന് ഇഴച്ചിൽ അനുഭവപ്പെടുന്നത്. ക്ലീഷേയിലേക്ക് ചിത്രം കൂപ്പുകുത്തുന്നു എന്നു തോന്നിപ്പിച്ച ശേഷം ഒന്നാം പകുതിക്ക് തൊട്ടുമുമ്പായി കടന്നു വരുന്ന ഒരു ട്വിസ്റ്റ് ചിത്രത്തിന്റെ മുഖം ആകെ മൊത്തം മാറ്റുന്നുണ്ട്. ഈ മാറ്റം തന്നെയാണ് ചിത്രത്തിന്റെ പ്ലസ് പോയിന്റ്. ഒന്നാം പകുതിയിലെ വേഗക്കുറവിനെ രണ്ടാം പകുതിയിലെ വേഗക്കൂടുതൽ കൊണ്ട് സംവിധായകൻ സമരസപ്പെടുത്തിയപ്പോൾ ചിത്രം കൃത്യമായ താളം കണ്ടെത്തുകയായിരുന്നു.

അച്ഛനും മകനും തമ്മിലുള്ള പ്രശ്നങ്ങൾ പരിഹരിക്കാനായി കണ്ടെത്തിയ മാർഗം ചിത്രത്തിന് വേഗം കൂട്ടിയപ്പോൾ ഒന്നാം പകുതിയേക്കാൾ പക്വതയാർന്ന പ്രകടനമാണ് രണ്ടാം പകുതിയിൽ കാളിദാസ് കാഴ്ചവെച്ചത്. നായകന്റെ കാമുകിയായി ഒരു പ്രണയത്തിലുണ്ടായേക്കാവുന്ന ഇണക്കങ്ങളും പിണക്കങ്ങളുമെല്ലാം പവിത്രയായി ചിത്രത്തിൽ എത്തിയ അഷ്ന സവേരി കൈയടക്കത്തോടെ ചെയ്തു. അതിൽ കൂടുതലൊന്നും നായികയായ അഷ്നയ്ക്ക് ചെയ്യാൻ ഉണ്ടായിരുന്നില്ലായെന്നു സാരം.

മലേഷ്യയിലെ കാഴ്ചകളത്രയും പുതുമയോടു കൂടി തന്നെ ഛായാഗ്രാഹകൻ ലക്ഷ്മൺ കാമറയിലേക്ക്് പകർത്തിയപ്പോൾ ഒരു കളർഫുൾ എഫക്ട് തന്നെ ചിത്രത്തിന് ലഭിച്ചു. മെലഡിയും ഡപ്പാംകൂത്തുമെല്ലാമായി അഞ്ചു പാട്ടുകൾ ചിത്രത്തിലുണ്ട്. ഡി. ഇമാനൊരുക്കിയ ഡപ്പാംകൂത്ത് പാട്ടുകൾ അത്രയും യുവാക്കളെ പിടിച്ചിരുത്തുന്ന വിധത്തിലുള്ളതായിരുന്നു. മലയാളി സാന്നിധ്യമായി ഉർവശിയും ചിത്രത്തിലുണ്ട്. രണ്ടാം പകുതിയിൽ പ്രഭുവും കാളിദാസന്റെയും മേക്കോവറുകൾ തന്നെയാണ് ചിത്രത്തിന്റെ ഹൈലൈറ്റ്. അതിഥി വേഷത്തിൽ ഉലകനായകൻ കമൽ ഹാസനും ചിത്രത്തിലെത്തുന്നുണ്ട്.അദ്ദേഹം ചിത്രത്തിന് നല്കിയ ഉണർവ് എത്രത്തോളമെന്ന് നിങ്ങൾ തിയറ്ററിൽ പോയി തന്നെ കണ്ടറിയുക.

കാളിദാസിന്റെ കുട്ടിക്കാലത്തെ ബിഗ്സ്ക്രീൻ പ്രകടനം ഏവരേയും അമ്പരിപ്പിച്ചിട്ടുണ്ട്. അന്നെല്ലാവരും മനസിൽ പറഞ്ഞിട്ടുണ്ടാവണം നടൻ ജയറാമിന്റെയല്ലേ മകൻ, അച്ഛന്റെ ഗുണം മകനു കിട്ടാതിരിക്കുമോയെന്ന്... പ്രഭുവിന്റെയും കമൽ ഹാസന്റെയും ആശീർവാദത്തോടെ മീൻകുഴമ്പും മൺപാനയിലും ആ പയ്യൻ നായകനായി എത്തിയപ്പോഴും ആ പല്ലവിക്ക് ഇളക്കം തട്ടാത്ത വിധമുള്ള പ്രകടനമാണ് കാളിദാസ് കാഴ്ചവച്ചിട്ടുള്ളത്.

(ടിക്കറ്റെടുക്കാം, പ്രഭുവിന്റെയും കാളിദാസന്റെയും രസക്കൂട്ട് കാണാനായി..)

വി. ശ്രീകാന്ത്

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.