രാഷ്ട്രീയ ഗോദയിലെ യമൻ

Home |

Editorial |

Leader Page Article |

Local News |

Review

രാഷ്ട്രീയ ഗോദയിലെ യമൻ

കണക്കുകൂട്ടലുകളുടെ കളിയാണ് യമൻ. ആരും ആർക്കും എപ്പോൾ വേണമെങ്കിലും അന്തകനായി മാറാമെന്നുള്ള അറിവിന്‍റെ ഉള്ളിൽ നിന്നുള്ള കഥപറച്ചിൽ. കഥയും തിരക്കഥയും സംവിധാനവും ഛായാഗ്രഹണവുമെല്ലാം ജീവ ശങ്കർ തന്നെ നിർവഹിച്ചിരിക്കുന്ന ചിത്രത്തിന്‍റെ നട്ടല്ലെന്നു പറയുന്നത് കഥ തന്നെയാണ്. പഞ്ചുള്ള ഡയലോഗുകളേക്കാൾ അവതരണത്തിന് മുൻതൂക്കം കൊടുത്തുകൊണ്ട് കഥാഗതിയെ പ്രേക്ഷകന്‍റെ മനസിൽ കുരുക്കിയിടാനുള്ള സംവിധായകന്‍റെ ശ്രമം ഒരുപരിധി വരെ വിജയിച്ചു.

പൊളിറ്റിക്കൽ ത്രില്ലറെന്ന ടാഗ് ലൈനിലെത്തിയ ചിത്രത്തിൽ വിജയ് ആന്‍റണിയാണ് നായകൻ. ഓരോ സിനിമ കഴിയുന്തോറും മികവേറുന്ന നടനെ വിജയ് ആന്‍റണിയിൽ കാണാമെങ്കിലും എവിടെയെല്ലാമോ ചില പാകപ്പിഴകൾ ഈ നടനെ വിടാതെ പിൻതുടരുന്നുണ്ട്. ആ തുടർച്ച യമനിലും തെളിഞ്ഞുനിൽപ്പുണ്ട്. തന്ത്രശാലിയായ രാഷ്ട്രീയ നേതാവിന്‍റെ വേഷം വിജയ് ആന്‍റണിയിൽ വേണ്ടത്ര ഭദ്രമല്ലെങ്കിലും ഒറ്റത്തവണ കണ്ടിരിക്കാൻ പാകത്തിനുള്ള ചേരുവകളെല്ലാം യമനിൽ കൂട്ടിയിണക്കിയിട്ടുണ്ട്.

ധനുഷ് ഇരട്ടവേഷത്തിലെത്തിയ കൊടിയ്ക്ക് ശേഷം തമിഴകത്ത് നിന്നും എത്തുന്ന മറ്റൊരു പൊളിറ്റിക്കൽ ത്രില്ലറാണ് യമൻ. രാഷ്ട്രീയത്തിലെ നിലനിൽപ്പിനെ ഉൗന്നിയുള്ള കഥപറച്ചിലിൽ കൊടിക്കും യമനും ചില സാദൃശ്യങ്ങൾ തോന്നാമെങ്കിലും കഥ പറച്ചിലിന്‍റെ രീതിയും പശ്ചാത്തലവുമെല്ലാം രണ്ടു ചിത്രങ്ങളെയും രണ്ടു ധ്രുവങ്ങളിൽ നിർത്തുന്നു. രാഷ്ട്രീയ കൊലപാതകങ്ങളും അഴിമതിയുമെല്ലാം സർവസാധാരണ കാഴ്ചയായി മാറുന്ന ഈ കാലയളവിൽ യമനിലെ കാഴ്ചകൾ ചില തിരിച്ചറിവുകളിലേക്ക് വഴിതിരിച്ച് വിടുന്നുണ്ട്. അഴിയുന്തോറും മുറുകുന്ന കുരുക്കാണ് രാഷ്ട്രീയം. ആ മേലാപ്പ് ഒരു തവണ എടുത്ത് അണിഞ്ഞാൽ പിന്നെ അതിൽ കടിച്ച് തൂങ്ങാനുളള വ്യഗ്രത കൂടുകയെയുള്ളുവെന്നാണ് യമനിലൂടെ സംവിധായകൻ പറയാൻ ശ്രമിക്കുന്നത്.

കുഞ്ഞുനാളിലെ തന്നെ വേണ്ടപ്പെട്ടവർക്ക് യമനായി മാറിയ തമിഴ് അരസനായാണ് വിജയ് ചിത്രത്തിൽ വേഷമിടുന്നത്. മുൻ ചിത്രങ്ങളിൽ കണ്ടിട്ടുള്ള സ്ഥായി ഭാവത്തിൽ നിന്നും അല്പ സ്വല്പം മാറാൻ വിജയ് ആന്‍റണി ശ്രമിച്ചിട്ടുണ്ടെങ്കിലും ആരോ അതിന് അനുവദിക്കാത്തവണ്ണം വീണ്ടും പഴയഭാവം നടന്‍റെ മുഖത്ത് പ്രത്യക്ഷപ്പെടുന്നത് സ്ക്രീനിൽ കാണാം. ഒരു ത്രില്ലറൊക്കെ അല്ലേ, പൊടിക്ക് പഞ്ചുള്ള സംഭാഷണങ്ങൾ കൂടി നായകന് നൽകിയിരുന്നെങ്കിൽ വിജയ് ആന്‍റണിയെ ഒരു പരീക്ഷണ കൂട്ടിലിടാമായിരുന്നു. എന്തുകൊണ്ടോ സംവിധായകൻ അതിന് മുതിർന്നില്ല.

ഒരു അപകടവുമായി ബന്ധപ്പെട്ട കേസിൽപ്പെട്ട് ജയിലിൽ പോകുന്ന തമിഴ് അരസൻ രാഷ്ട്രീയക്കാരനാകുന്ന കഥയാണ് യമൻ പറയുന്നത്. മലയാളി പെൺകൊടി മിയയാണ് ചിത്രത്തിൽ നായികയായി എത്തുന്നത്. നായിക പ്രാധാന്യമുള്ള കഥയല്ലാത്തതിനാൽ തന്നെ പേരിനൊരു നായിക എന്നതനിപ്പുറത്തൊന്നും മിയക്ക് ചിത്രത്തിൽ ചെയ്യാനുണ്ടായിരുന്നില്ല.

പ്രധാനപ്പെട്ട രണ്ട് രാഷ്ട്രീയ കക്ഷികൾക്കിടയിൽപ്പെട്ട് ഞെരിഞ്ഞമരുമെന്ന് കരുതുന്നിടത്ത് നിന്നും പടിപടിയായി തമിഴ് അരസൻ ഉയർന്നുവരുന്ന കാഴ്ചയെ ചതുരംഗ കളിയിലെ സൂക്ഷ്മമായ നീക്കങ്ങൾ പോലെയാണ് സംവിധായകൻ അവതരിപ്പിച്ചിരിക്കുന്നത്. രാഷ്ട്രീയം കുതികാൽവെട്ടിന്‍റെ അങ്കത്തട്ടാണെന്നുള്ള അറിവിൽ നിന്നുമുള്ള തമിഴ് അരസന്‍റെ നീക്കങ്ങൾ സംവിധായകൻ മികവോടെ പകർത്തിയിട്ടുണ്ട്. പൊളിറ്റിക്കൽ ത്രില്ലറിൽ കടന്നുകൂടിയ ഇഴച്ചിലിൽ നിന്നും പ്രേക്ഷകനെ രക്ഷിക്കുന്നത് പശ്ചാത്തലസംഗീതമാണ്. ചിത്രത്തിലെ പാട്ടുകളും നായകന്‍റെ ഡാൻസും നിലവാരത്തിന് ഒത്തുയർന്നില്ല എന്നതും തിരിച്ചടിയാണ്. ത്യാഗരാജനും ജി.മാരിമുത്തുവും സ്വാമിനാഥനും ഉൾപ്പടെയുള്ള താരനിര ചിത്രത്തിന് മുതൽക്കൂട്ടാകുന്നുണ്ടെങ്കിലും പറഞ്ഞ് പഴകിയ രാഷ്ട്രീയ കഥകളുടെ തുടർച്ച മാത്രമായി യമൻ ഒതുങ്ങിപ്പോകുന്നുണ്ട്.

തമിഴ് അരസൻ ആർക്കെല്ലാം യെമനായി മാറുന്നുവെന്നതിനപ്പുറം രാഷ്ട്രീയത്തിലെ കള്ളനാണയങ്ങൾക്കു നേരുള്ള വിരൽ ചൂണ്ടലാണ് സിനിമ. പൊളിറ്റിക്കൽ ത്രില്ലർ ശ്രേണിയിലേക്ക് യമന്‍റെ പേരുകൂടി എഴുതി ചേർക്കാമെങ്കിലും മികച്ച ത്രില്ലറാണ് ചിത്രമെന്ന് പറയാനാവില്ല.

(മാറ്റം ആഗ്രഹിക്കുന്ന നടനെ ചിത്രത്തിൽ കാണാനാവുമെങ്കിലും വിജയ് ആന്‍റണി ഇനിയും മാറിയിട്ടില്ല.)

വി.ശ്രീകാന്ത്

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.