പഞ്ചാബിന് ചരിത്ര ജയം |

കോൽക്കത്ത: ഐപിഎല്ലിൽ പഞ്ചാബ് കിംഗ്സിന് ചരിത്ര ജയം. കോൽക്കത്ത നൈറ്റ് റൈഡേഴ്സിനെ എട്ട് വിക്കറ്റിന് പരാജയപ്പെടുത്തിയാണ് പഞ്ചാബ് ചരിത്രം കുറിച്ചത്. ട്വന്‍റി-20 ചരിത്രത്തിലെ ഏറ്റവും വലിയ ചെയ്സിനാണ് ഇന്ന് ഈഡൻ ഗാർഡൻ സാക്ഷ്യം വഹിച്ചത്. സ്കോർ:- കോൽക്കത്ത 261-6 (20), പഞ്ചാബ് 262-2 (18.4)

ജോണി ബെയർസ്റ്റോയുടെ സെഞ്ചുറി പ്രകടനവും ശശാങ്ക് സിംഗിന്‍റെ വെടിക്കെട്ടുമാണ് പഞ്ചാബിനെ ചരിത്രത്തിലെത്തിച്ചത്. പ്രബ്സിമ്രാൻ സിംഗ്-ജോണി ബെയർസ്റ്റോ ഓപ്പണിംഗ് സഖ്യം വെടിക്കെട്ടിനു തിരികൊളുത്തുകയായിരുന്നു. 20 പന്തിൽ 54 റണ്‍സാണ് പ്രബ്സിമ്രാൻ അടിച്ചു കൂട്ടിയത്. ഇരുവും ചേർന്ന് 93 റണ്‍സാണ് നേടിയത്. റിലീ റോസോവ് 26 റണ്‍സും നേടി.

നോസോവിനു പിന്നാലെ കളത്തിലെത്തിയ ശശാങ്ക് കളിയുടെ ഗതിതന്നെ മാറ്റിമറിച്ചു. ബെയർസ്റ്റോയുടെ ഒപ്പം ചേർന്ന് പന്തുകൾ ഗ്യാലയിലേക്ക് പറപ്പിച്ചു. 28 പന്തിൽ പുറത്താകാതെ ശശാങ്ക് എട്ട് സിക്സും രണ്ട് ഫോറും ഉൾപ്പെടെ 68 റണ്‍സെടുത്തു. ബെയർസ്റ്റോ 48 പന്തിൽ അഞ്ച് സിക്സും നാല് ഫോറും ഉൾപ്പെടെ 108 റണ്‍സുമായി പുറത്താകാതെ നിന്നു.

ടോസ് നഷ്ടപ്പെട്ട് ക്രീസിലെത്തിയ കോൽക്കത്ത നൈറ്റ് റൈഡേഴ്സിനായി ഫിൽ സാൽട്ടും സുനിൽ നരെയ്നും ക്രീസിൽ തല്ലിത്തകർത്ത് മുന്നേറി. ഇവരുടെ കടന്നാക്രമണത്തിൽ പഞ്ചാബ് കിംഗ്സ് ബൗളർമാർക്ക് മറുപടിയില്ലായിരുന്നു. 37 പന്തിൽ ആറ് സിക്സും ആറ് ഫോറും അടക്കം ഫിൽ സാൾട്ട് 75 റണ്‍സ് നേടി. 32 പന്തിൽ നാല് സിക്സും ഒന്പത് ഫോറും അടക്കം സുനിൽ നരെയ്ൻ 71 റണ്‍സ് അടിച്ചു. 10.2 ഓവറിൽ 138 റണ്‍സ് സ്കോർബോർഡിൽ എത്തിച്ചശേഷമാണ് ഇവർ പിരിഞ്ഞത്.

പിന്നാലെ എത്തിയവരും കെകെആറിനായി കടന്നാക്രമണം നടത്തി. മൂന്നാം നന്പറായി ക്രീസിലെത്തിയ വെങ്കിടേഷ് അയ്യർ 23 പന്തിൽ 39 റണ്‍സ് സ്വന്തമാക്കി. ആന്ദ്രേ റസൽ (12 പന്തിൽ 24), ക്യാപ്റ്റൻ ശ്രേയസ് അയ്യർ (10 പന്തിൽ 28) എന്നിവരും പഞ്ചാബ് ബൗളർമാരെ തല്ലിത്തകർത്തു. റിങ്കു സിംഗിനു (അഞ്ച്) മാത്രമാണ് ശോഭിക്കാനാകാതെപോയത്. പഞ്ചാബ് ക്യാപ്റ്റൻ സാം കരണിന്‍റെ നാല് ഓവറിൽ 60 റണ്‍സ് പിറന്നു.

പഞ്ചാബിന്‍റെ മൂന്നാം ജയമായിരുന്നു ഇത്. ആറ് പോയിന്‍റുള്ള പഞ്ചാബ് പട്ടികയിൽ എട്ടാം സ്ഥാനത്താണ്. കോൽക്കത്ത പത്ത് പോയിന്‍റുമായി രണ്ടാം സ്ഥാനത്തും.