ലണ്ടൻ: വേൾഡ് മലയാളി കൗൺസിൽ യൂറോപ്പ് റീജിയൺ ഒരുക്കിയ ക്രിസ്മസ് പുതുവത്സരാഘോഷം വൈവിധ്യമാർന്ന വിവിധ കലാപരിപാടികളോടെ സമുചിതമായി ആഘോഷിച്ചു.
ഡിസംബർ 30ന് വൈകുന്നേരം നാലിന് (ഇന്ത്യൻ സമയം രാത്രി 8.30) വെർച്ചൽ പ്ലാറ്റ് ഫോമിലൂടെ നടന്ന ആഘോഷം ഷീജ ഷിൽഡ്കാമ്പിന്റെ ഈശ്വര പ്രാർഥനയോടെ തുടങ്ങി. വേൾഡ് മലയാളി കൗൺസിൽ യൂറോപ്പ് റീജിയൺ പ്രസിഡന്റ് ജോളി എം. പടയാട്ടിൽ എല്ലാവരെയും സ്വാഗതം ചെയ്തു.
വേൾഡ് മലയാളി കൗൺസിൽ യൂറോപ്പ് റീജൻ നടത്തിക്കൊണ്ടിരിക്കുന്ന കലാസാംസ്കാരിക വേദിയുടെ അടുത്ത സമ്മേളനം ജനുവരി 27നായിരിക്കുമെന്നും അദ്ദേഹം അറിയിച്ചു.
സീറോ മലബാർ സഭയുടെ യൂറോപ്പിലെ അപ്പോസ്റ്റോളിക് വിസിറ്റേറ്ററായ ബിഷപ് മാർ സ്റ്റീഫൻ ചിറപ്പണത്തും പ്രശസ്ത സാമൂഹ്യ പ്രവർത്തകനും ആത്മീയ ഗുരുവും ശാന്തിഗ്രാം ആശ്രമം ജനറൽ സെക്രട്ടറിയുമായ സ്വാമി ഗുരുരത്ന ജ്ഞാനതപസിയും ചേർന്നു ഭദ്രദീപം തെളിയിച്ചു ഉദ്ഘാടനം ചെയ്തു.
നിസഹായരായ സഹജീവികളുടെ ജീവിതത്തിലേക്ക് കാരുണ്യ പ്രവർത്തനങ്ങളിലൂടെ കടന്നു വരണമെന്നും വേൾഡ് മലയാളി കൗൺസിൽ അത് നന്നായി ചെയ്യുന്നുണ്ടെന്നാണ് താൻ മനസിലാക്കുന്നതെന്നും സ്വാമി ഗുരുരത്ന ജ്ഞാനതപസി പറഞ്ഞു.
ലോകമെമ്പാടുമുള്ള മലയാളികളെ ഒരുമിപ്പിച്ചു കൊണ്ടുവരുവാൻ വേൾഡ് മലയാളി കൗൺസിൽ പോലെയുള്ള സംഘടനകൾക്ക് കഴിയുവെന്നും ജ്ഞാനതപസി പറഞ്ഞു. വേൾഡ് മലയാളി കൗൺസിലിന്റെ സജീവ പ്രവർത്തകനും എൻആർകെ പ്രസിഡന്റുമായ അബ്ദുൾ ഹാക്കിയുമായുള്ള ദീർഘകാലമായ സൗഹൃദമാണ് തനിക്ക് വേൾഡ് മലയാളി കൗൺസിലിനെപ്പറ്റി കൂടുതൽ അറിയുവാൻ കഴിഞ്ഞതെന്നു അദ്ദേഹം പറഞ്ഞു.
ആകാശത്തു കൂടി പോകുന്ന വിമാനത്തെ നോക്കി ഒരു കൊച്ചുകുട്ടി ഇത് ചെറുതാണെന്നു പറയുകയും എന്നാൽ വിമാനം അടുത്തു കണ്ടപ്പോൾ ഇത്രയും വലിപ്പമുള്ള വിമാനമാണോ ആകാശത്തു കൂടി പോയതെന്നു അദ്ഭുതത്തോടെ തന്റെ പിതാവിനോടു പറയുന്നതുപോലെയാണ് നാം ദൈവത്തിൽ നിന്ന് അകലുമ്പോൾ ഈശ്വരനെ കാണുന്നതെന്നും എന്നാൽ ദൈവത്തോടു കൂടുതൽ അടുത്തു നിൽക്കുമ്പോൾ അതിന്റെ ശക്തി നമുക്കു മനസിലാകുമെന്നും ബിഷപ് മാർ സ്റ്റീഫൻ ചിറപ്പണത്ത് പറഞ്ഞു.
ആഗോളതലത്തിലുള്ള മലയാളികൾക്കായി വേൾഡ് മലയാളി കൗൺസിൽ യൂറോപ്പ് റീജൻ നടത്തിക്കൊണ്ടിരിക്കുന്ന കലാസാംസ്കാരിക വേദിയുടെ ഒന്പതാം സമ്മേളനമാണ് ക്രിസ്മസ് പുതുവത്സര ആഘോഷമായി കൊണ്ടാടിയത്.
വേൾഡ് മലയാളി കൗൺസിൽ ഗ്ലോബൽ ചെയർമാൻ ഗോപാലപിള്ള, ഗ്ലോബൽ പ്രസിഡന്റ് ജോൺ മത്തായി, ഗ്ലോബൽ ജനറൽ സെക്രട്ടറി പിന്റോ കന്നമ്പിള്ളി, യൂറോപ്പ് റീജൻ ചെയർമാൻ ജോളി തടത്തിൽ എന്നിവർ നവവത്സര സന്ദേശം നൽകി സംസാരിച്ചു.
വേൾഡ് മലയാളി കൗൺസിൽ ഗ്ലോബൽ വൈസ് പ്രസിഡന്റ് തോമസ് അറമ്പൻകുടി, എൻആർകെ പ്രസിഡന്റ് അബ്ദുൾ ഹാക്കിം, ഗ്ലോബൽ വിമൻസ് ഫോറം പ്രസിഡന്റ് പ്രഫസർ ഡോ. ലളിത മാത്യു, ഗ്ലോബൽ ഹെൽത്ത് ഫോറം പ്രസിഡന്റ് ഡോ. ജിമ്മി ലോനപ്പൻ, അമേരിക്കൻ റീജൻ പ്രസിഡന്റ് ജോൺസൻ തലശല്ലൂർ, ദുബായി പ്രൊവിൻസ് പ്രസിഡന്റ് കെ. എ. പോൾസൻ, ജർമൻ പ്രൊവിൻസ് പ്രസിഡന്റ് ജോസ് കുമ്പിളുവേലിയിൽ, യൂറോപ്പ് റീജൻ സെക്രട്ടറി ബാബു തോട്ടപ്പിള്ളി, യുകെ നോർത്ത് വെസ്റ്റ് പ്രൊവിൻസ് പ്രസിഡന്റ് ജോസഫ് സെബാസ്റ്റ്യൻ തുടങ്ങിയവർ ആശംസകൾ നേർന്നു സംസാരിച്ചു.
പ്രവാസി ഗായകരായ സിറിയക്ക് ചെറുകാട് (ഓസ്ട്രിയ), സോബിച്ചൻ ചേന്നങ്കര (ജർമനി), ജെയിംസ് പാത്തിക്കൽ (ജർമനി), ജോമി വിൽസൻ (അജ്മൻ പ്രൊവിൻസ്) എമ്മ റോബിൻ (യുഎസ്എ) തുടങ്ങിയവരുടെ ശ്രവണസുന്ദരമായ ഗാനങ്ങളും ആലപിച്ചു.
പ്രഫസർ ഡോ. അന്നക്കുട്ടി ഫിൻഡെ ആലപിച്ച ചിന്താദീപ്തമായ സ്നേഹം എന്ന കവിതയും അമേരിക്കയിലെ നോർത്തു ടെക്സസിൽ നിന്നുള്ള ആൻജെലിൻ ഷാജി, ആഷ്ലിൻ ഷാജി, എലിന്റ് സന്യ, ഡെബി കരോട്ടെ, ലെയ കരോട്ടെ, ലിനു ജോസഫ്, ലിതാ അനിഷ്, സൗമ്യ ആന്റണി, സുനിത സന്തോഷ് തുടങ്ങിയ നർത്തകിമാരുടെ നയനാന്ദകരമായ ക്രിസ്മസ് ഡാൻസും അരങ്ങേറി.
വേൾഡ് മലയാളി കൗൺസിൽ ഗ്ലോബൽ വൈസ് ചെയർമാനും വാഗ്മിയും കലാ സാംസ്കാരിക രംഗത്ത് നിറഞ്ഞു നിൽക്കുന്ന ഗ്രിഗറി മേടയിലും യുകെയിൽ പഠിച്ചു കൊണ്ടിരിക്കുന്ന നർത്തകിയും പ്രാസംഗികയുമായ അന്ന ടോമും ചേർന്നാണ് ഈ കലാസാംസ്കാരിക വേദി മോഡറേറ്റ് ചെയ്തത്. ഗ്രിഗറി മേടയിൽ കൃതജ്ഞത പറഞ്ഞു.
എല്ലാ മാസത്തിന്റെയും അവസാനത്തെ ശനിയാഴ്ച നടക്കുന്ന ഈ കലാസാംസ്കാരിക വേദിയിൽ എല്ലാ പ്രവാസി മലയാളികൾക്കും അവർ താമസിക്കുന്ന രാജ്യങ്ങളിൽ നിന്നുകൊണ്ടുതന്നെ ഇതിൽ പങ്കെടുക്കുവാനും അവരുടെ കലാസൃഷ്ടികൾ അവതരിപ്പിക്കുവാനും ആശയവിനിമയങ്ങൾ നടത്തുവാനും അവസരം ഉണ്ടായിരിക്കുന്നതാണ്.
എല്ലാ പ്രവാസി മലയാളികളേയും ഈ കലാസാംസ്കാരിക കൂട്ടായ്മയിലേക്ക് വേൾഡ് മലയാളി കൗൺസിൽ യൂറോപ്പ് റീജിയൺ സ്വാഗതം ചെയ്യുന്നതായി അറിയിച്ചു.
|