പാരാമെഡിക്കൽ/ഫാർമസി കോഴ്സ്: അംഗീകാരം ഉറപ്പാക്കണം
തിരുവനന്തപുരം: പാരാമെഡിക്കൽ/ഫാർമസി അനുബന്ധ കോഴ്‌സുകളിൽ പ്രവേശനം നേടാൻ ആഗ്രഹിക്കുന്ന വിദ്യാർഥികൾ കോഴ്‌സുകളിൽ ചേരുന്നതിനു മുൻപ് കോഴ്‌സുകൾക്കും സ്ഥാപനങ്ങൾക്കും കേരള ആരോഗ്യ സർവകലാശാല/ മെഡിക്കൽ വിദ്യാഭ്യാസ ഡയറക്‌ടറേറ്റ്/ ബന്ധപ്പെട്ട കൗൺസിൽ എന്നിവയുടെ അംഗീകാരം ഉണ്ടോ എന്ന് ഉറപ്പുവരുത്തണമെന്ന് മെഡിക്കൽ വിദ്യാഭ്യാസ ഡയറക്‌ടർ അറിയിച്ചു.
കേരള ആരോഗ്യ സർവകലാശാലയുടെയും സംസ്ഥാനത്തെ മറ്റ് അംഗീകൃത സർവകലാശാലകൾക്കു കീഴിലും [Kerala, MG, Calicut, Kannur & Amritha (Deemed Uty)] നടത്തപ്പെടുന്ന പാരാമെഡിക്കൽ ഡിഗ്രി/പിജി കോഴ്‌സുകൾക്കും മെഡിക്കൽ വിദ്യാഭ്യാസ ഡയറക്‌ടറേറ്റിന്‍റെ കീഴിൽ നടത്തപ്പെടുന്ന വിവിധ പാരാമെഡിക്കൽ ഡിപ്ലോമ കോഴ്‌സുകൾക്കും ആരോഗ്യവകുപ്പ് ഡയറക്‌ടറുടെ കീഴിൽ നടത്തപ്പെടുന്ന ഡിഎച്ച്ഐ കോഴ്‌സിനും മാത്രമാണ് നിലവിൽ സംസ്ഥാനത്ത് മെഡിക്കൽ വിദ്യാഭ്യാസ വകുപ്പിന്‍റെയും കേരള പാരാമെഡിക്കൽ കൗൺസിലിന്‍റെയും അംഗീകാരം ഉള്ളത്. സർക്കാർ സ്ഥാപനങ്ങളിലും പിഎസ്‌സി വഴിയുള്ള പാരാമെഡിക്കൽ അനുബന്ധ നിയമനങ്ങളിലും പാരാമെഡിക്കൽ കൗൺസിൽ/ ഡെന്‍റൽകൗൺസിൽ/ ഫാർമസി കൗൺസിൽ രജിസ്‌ട്രേഷൻ നിർബന്ധമാണ്.
സംസ്ഥാന സർക്കാർ സ്ഥാപനങ്ങളിലും സ്വകാര്യസ്വാശ്രയ സ്ഥാപനങ്ങളിലും കേരള ആരോഗ്യ സർവകലാശാലയുടെ കീഴിലുമായി നടത്തപ്പെടുന്ന അംഗീകാരമുള്ള പാരാമെഡിക്കൽ ഡിഗ്രി/പിജി കോഴ്‌സുകളുടെയും അവ നടത്തപ്പെടുന്ന സ്ഥാപനങ്ങളുടെയും പട്ടിക കേരള ആരോഗ്യ സർവകലാശാലയുടെ www.kuhs.ac.in ലും, സംസ്ഥാന സർക്കാർ/ മെഡിക്കൽ വിദ്യാഭ്യാസ ഡയറക്‌ടറേറ്റ്/ കേരള പാരാമെഡിക്കൽ കൗൺസിൽ/ ഫാർമസി കൗൺസിൽ അംഗീകരിച്ച വിവിധ പാരാമെഡിക്കൽ ഡിപ്ലോമ/ ഡിഫാം /ഡിഎച്ച്ഐ കോഴ്സുകളും അവ നടത്തപ്പെടുന്ന സ്ഥാപനങ്ങളുടെയും പട്ടിക മെഡിക്കൽ വിദ്യാഭ്യാസ ഡയറക്‌ടറേറ്റിന്‍റെ www.dme.kerala.gov.in ലും ലഭ്യമാണെന്നും ഡയറക്‌ടർ അറിയിച്ചു.