ബിഎസ്സി കംപ്യൂട്ടർ സയൻസും ബാച്ച്‌ലർ ഓഫ് കംപ്യൂട്ടർ ആപ്ലിക്കേഷൻസും സമാന സ്വഭാവമുള്ള പ്രോഗ്രാമുകളാണോ? ഇവയുടെ പ്രത്യേകതകളും വ്യത്യാസങ്ങളും വിശദമാക്കാമോ?
ജയകുമാർ, ചാവക്കാട്
ബിഎസ്സി കംപ്യൂട്ടർ സയൻസും ബാച്ചിലർ ഇൻ കംപ്യൂട്ടർ ആപ്ലിക്കേഷനും കംപ്യൂട്ടർ മേഖലയിലെ ബിരുദ കോഴ്സുകളാണെങ്കിലും അവയുടെ സിലബസിലും പരീക്ഷ രീതികളിലുമൊക്കെ വ്യത്യാസം പുലർത്തുന്നതാണ്.
താഴെപ്പറയുന്ന പ്രത്യേകതകളാണ് ഈ രണ്ടു പ്രോഗ്രാമിനും സവിശേഷമായുള്ളത്.
1.കോഴ്സിന്റെ ഘടനയും ഉള്ളടക്കവും ബിസിഎ ബിസിഎ ഒരു ആപ്ലിക്കേഷൻഓറിയന്‍റഡ് പ്രോഗ്രാമായി ക്രമപ്പെടുത്തിയിട്ടുള്ളതാണ്.അതായത്, കംപ്യൂട്ടർ ആപ്ലിക്കേഷനുകൾ, സോഫ്റ്റ്വേർ ഡെവലപ്മെന്‍റ്, ഡാറ്റാബേസ് മാനേജ്മെന്റ്, വെബ് ടെക്നോളജികൾ തുടങ്ങിയ പ്രായോഗിക വശങ്ങൾക്കാണ് ബിസിഎ ബിരുദ പ്രോഗ്രാം ഊന്നൽ നൽകുന്നത്.
സി, സി++ ജാവ, പൈത്തണ്‍ പോലുള്ള പ്രോഗ്രാമിംഗ് ഭാഷകൾ, ഡാറ്റാബേസ് മാനേജ്മെന്റ് സിസ്റ്റങ്ങൾ, വെബ് ഡെവലപ്മെന്‍റ്, നെറ്റ്‌വർക്കിംഗ്, ഓപ്പറേറ്റിംഗ് സിസ്റ്റംസ്, സോഫ്റ്റ്വേർ എൻജിനിയറിംഗ് എന്നിവ ഈ പ്രോഗ്രാമിൽ പഠിപ്പിക്കുന്നു.
കംപ്യൂട്ടർ മേഖലയിൽ പ്രായോഗികമായ അറിവ് നേടാനും വേഗത്തിൽ ഐടി വ്യവസായത്തിൽ പ്രവേശിക്കാനും താത്പര്യമുള്ളവർക്ക് കൂടുതൽ തൊഴിൽ സാധ്യത തുറന്നു നൽകുന്നതാണ് ഈ പ്രോഗ്രാം. 12ാം ക്ലാസിൽ മാത്സ് വിഷയമായി പഠിച്ചിരിക്കണമെന്ന നിർബന്ധം പല കോളജുകൾക്കും ഉണ്ടാകില്ല, ചില യൂണിവേഴ്സിറ്റികൾക്ക് ബിസിഎ പ്രവേശനം ലഭിക്കണമെങ്കിൽ ഗണിതശാസ്ത്രം നിർബന്ധമായും പന്ത്രണ്ടാം ക്ലാസിൽ പഠിച്ചിട്ടുണ്ടാകണം.
ബിഎസ്സി കംപ്യൂട്ടർ സയൻസ് ബിഎസ്സി കംപ്യൂട്ടർ സയൻസ് ഒരു തിയറിഓറിയന്‍റഡ് കോഴ്സാണ്. പ്ലസ് ടുവിൽ ഗണിതശാസ്ത്രം നിർബന്ധമായി പഠിച്ചിക്കണം. കംപ്യൂട്ടർ സയൻസിന്‍റെ അടിസ്ഥാനപരമായ തത്വങ്ങൾ, അൽഗോരിതങ്ങൾ, ഡാറ്റാ സ്ട്രക്ചറുകൾ, കംപ്യൂട്ടർ ആർക്കിടെക്ചർ, ഓപ്പറേറ്റിംഗ് സിസ്റ്റംസിന്‍റെ ആഴത്തിലുള്ള പ്രവർത്തനം, ഗണിതശാസ്ത്രപരമായ കംപ്യൂട്ടിംഗ് എന്നിവയ്ക്ക് ഇത് കൂടുതൽ പ്രാധാന്യം നൽകുന്നു.
ഒരു നോണ് പ്രഫഷണൽ ഡിഗ്രി പ്രോഗ്രാമിന്റെ സ്വഭാവത്തോടെയും ക്രമത്തോടെയും സർവകലാശാലകൾ നടത്തുന്നതാണ് ബിഎസ്സി കംപ്യൂട്ടർ സയൻസ്.
ഈ പ്രോഗ്രാമിൽ പ്രധാനമായും ഉൗന്നൽ നൽകി ഉൾപ്പെടുത്തിയിട്ടുള്ള വിഷയങ്ങൾകോർ കംപ്യൂട്ടർ സയൻസ് വിഷയങ്ങളായ ഡിസ്ക്രീറ്റ് മാത്തമാറ്റിക്സ്, ഓട്ടോമാറ്റ തിയറി, കംപൈലർ ഡിസൈൻ, ഓപ്പറേറ്റിംഗ് സിസ്റ്റം ആർക്കിടെക്ചർ, അൽഗോരിതം അനാലിസിസ്, ഡാറ്റാ സയൻസ്, ആർട്ടിഫിഷ്യൽ ഇന്‍റലിജൻസ് എന്നിവയ്ക്ക് ഉൗന്നൽ നൽകുന്നു.
കംപ്യൂട്ടർ സയൻസിന്‍റെ അടിസ്ഥാന തത്വങ്ങളെക്കുറിച്ച് ആഴത്തിൽ പഠിക്കാനും ഗവേഷണം, ഡാറ്റാ സയൻസ്, എഐ/എംഎൽ, സൈബർ സെക്യൂരിറ്റി പോലുള്ള ഉയർന്ന തലത്തിലുള്ള മേഖലകളിൽ പ്രവേശിക്കാനും താത്പര്യമുള്ളവർക്ക് ബിസിഎ പഠിക്കുന്നതിനേക്കാൾ ഗുണപ്രദവും ഉപകാരപ്രദവും ഉപരിപഠന പഠനസാധ്യതയും ഉറപ്പാക്കുന്നത് ബിഎസ്്സി കംപ്യൂട്ടർ സയൻസ് ആണ്.
2. തൊഴിൽ സാധ്യതകൾ രണ്ട് കോഴ്സുകൾക്കും ഐടി ഇൻഡസ്ട്രിയുമായി ബന്ധപ്പെട്ട ധാരാളം തൊഴിൽ അവസരങ്ങൾ ഉണ്ട്. എന്നാൽ, രണ്ടു പ്രോഗ്രാമുകളുടെയും ജോബ് റോളുകൾ വ്യത്യസ്തമാണ്.
ബിസിഎ കോഴ്‌സ് ചെയ്തവരുടെ ജോബ് റോൾ സോഫ്റ്റ്വേർ ഡെവലപ്പർ, വെബ് ഡെവലപ്പർ, മൊബൈൽ ആപ്ലിക്കേഷൻ ഡെവലപ്പർ, ടെസ്റ്റർ, ഡാറ്റാബേസ് അഡ്മിനിസ്ട്രേറ്റർ, സിസ്റ്റംസ് അനലിസ്റ്റ്, ടെക്നിക്കൽ സപ്പോർട്ട് എക്സിക്യൂട്ടീവ്. സോഫ്റ്റ്വേർ ആക്ടിവിറ്റികൾ നടക്കുന്ന കന്പനികളായ ടിസിഎസ്, ഇൻഫോസിസ്, വിപ്രോ, കോഗ്നിസന്റ് പോലുള്ള വലിയ ഐടി സർവീസ് എന്നിവിടങ്ങളിലെ എൻട്രി കേഡറുകളിലേക്ക് ആണ് തൊഴിൽ ലഭിക്കുക.
ബിഎസ്സി കംപ്യൂട്ടർ സയൻസ്: പഠനത്തിനുശേഷം ധാരാളം ഉപരിപഠന സാധ്യതകൾ ഉണ്ട്.
ജോബ് റോളുകൾ: സോഫ്റ്റ്വേർ എൻജിനിയർ, ഡാറ്റാ സയന്‍റിസ്റ്റ്, സൈബർ സെക്യൂരിറ്റി അനലിസ്റ്റ്, എഐ / മെഷീൻ ലേണിംഗ് എൻജിനിയർ, നെറ്റ്‌വർക്ക് അഡ്മിനിസ്ട്രേറ്റർ, റിസർച്ച് അസിസ്റ്റന്‍റ് എന്നിവയാണ്.
തൊഴിൽ ലഭിക്കുന്ന സ്ഥാപനങ്ങളും ഇൻഡസ്ട്രിയും ബിസിഎയിൽനിന്നും വ്യത്യസ്തമാണ്. ഗവേഷണ കേന്ദ്രങ്ങൾ, ഉന്നത സാങ്കേതിക സ്ഥാപനങ്ങൾ, ഡാറ്റാ അനലിറ്റിക്സ് കന്പനികൾ, ആർ & ഡി (റിസർച്ച് & ഡെവലപ്മെന്‍റ്) വിഭാഗങ്ങളുള്ള സ്ഥാപനങ്ങൾ.
ബിസിഎ പഠനത്തിൽ നിന്ന് വ്യത്യസ്തമായി കംപ്യൂട്ടർ സയൻസ് പഠിക്കുന്നവരെ സംബന്ധിച്ചിടത്തോളം ഗവേഷണ പ്രാധാന്യമുള്ള ഇടങ്ങളിൽ തൊഴിലവസരങ്ങളുടെ സാധ്യത തുറക്കുന്നു എന്നതാണ് ഇതിന്‍റെ പ്രത്യേകത.
3. ഉപരിപഠനസാധ്യതകൾ ബിസിഎ എംസിഎ, എംബിഎ തുടങ്ങിയ കോഴ്സുകൾ പഠിക്കാം; ക്ലൗഡ് കംപ്യൂട്ടിംഗ്, ഡാറ്റ സയൻസ്, സൈബർ സെക്യൂരിറ്റി, വെബ് ഡിസൈൻ അടക്കമുള്ള വിഷയ ങ്ങളിൽ ഡിപ്ലോമ പ്രോഗ്രാമുകളും സർട്ടിഫിക്കറ്റ് പ്രോഗ്രാമുകളുമായി ആഡോണ് സ്കിൽ നേടാം.
ബിഎസ്സി കംപ്യൂട്ടർ സയൻസ്
എംഎസ്‌സി കംപ്യൂട്ടർ സയൻസ്, എംസിഎ, എംഎസ്‌സി ഡാറ്റ സയൻസ്, എംഎസ് സി ആർട്ടിഫിഷ്യൽ ഇന്‍റലിജൻസ്, എംഎസ്‌സി സൈബർസെക്യൂരിറ്റി. പിഎച്ച്ഡി പ്രോഗ്രാം ചെയ്യുന്നതിനും ബിഎസ്സി കംപ്യൂട്ടർ സയൻസ് സയൻസ് ബേസിക് ബിരുദമായി പഠിച്ച് ഉപരിപഠനം ചെയ്യുന്നവർക്ക് എംബിഎ തുടങ്ങിയ മാസ്റ്റേഴ്സ് ബിരുദങ്ങൾക്കും ചേരാം.
4. ശന്പളം തുടക്ക ശന്പളം കോളജ്, നിങ്ങളുടെ കഴിവുകൾ, ജോലി ചെയ്യുന്ന കന്പനി എന്നിവയെ ആശ്രയിച്ചിരിക്കും. പൊതുവായി ബിസിഎ ബിരുദധാരികൾക്ക്: തുടക്കത്തിൽ ഏകദേശം 2.5 ലക്ഷം രൂപ മുതൽ 5 ലക്ഷം രൂപ വരെ വാർഷിക ശന്പളം പ്രതീക്ഷിക്കാം. പ്രായോഗിക കഴിവുകൾ വർധിപ്പിച്ച് പരിചയം നേടുന്നതിനനുസരിച്ച് ഇത് വർധിക്കും.
* ബിഎസ് സി കംപ്യൂട്ടർ സയൻസ് ബിരുദധാരികൾക്ക്: തുടക്കത്തിൽ ഏകദേശം 3 ലക്ഷം രൂപ മുതൽ 6 ലക്ഷം രൂപ വരെ വാർഷിക ശന്പളം പ്രതീക്ഷിക്കാം. ഡാറ്റാ സയൻസ്, എഐ/എംഎൽ, സൈബർ സെക്യൂരിറ്റി പോലുള്ള ഉയർന്ന ഡിമാൻഡുള്ള മേഖലകളിൽ ശന്പളം ഇതിലും കൂടുതലായിരിക്കും.
5. വിദേശത്ത് ഉപരിപഠനം/തൊഴിൽ സാധ്യതകൾ ബിഎസ്സി കംപ്യൂട്ടർ സയൻസ് : വിദേശ യൂണിവേഴ്സിറ്റികളിൽ മാസ്റ്റർ ഓഫ് സയൻസ് ഇൻ കംപ്യൂട്ടർ സയൻസ് അല്ലെങ്കിൽ മറ്റ് സ്പെഷലൈസ്ഡ് എംഎസ് പ്രോഗ്രാമുകൾക്ക് അപേക്ഷിക്കാൻ ബിഎസ്സി കംപ്യൂട്ടർ സയൻസ് കൂടുതൽ അനുയോജ്യമാണ്. വികസിത രാജ്യങ്ങളിലെ പല സർവകലാശാലകളും കംപ്യൂട്ടർ സയൻസ് എന്ന അക്കാദമിക് ബിരുദത്തിനാണ് കൂടുതൽ അംഗീകാരം നൽകുന്നത്.
ബിസിഎ: വിദേശത്ത് ബിസിഎ എന്ന പേരിൽ കോഴ്സുകൾ കുറവായിരിക്കും. പകരം ബിഎസ്സി ഇൻ കംപ്യൂട്ടർ സയൻസ് അല്ലെങ്കിൽ അതുമായി ബന്ധപ്പെട്ട വിഷയങ്ങൾക്കാണ് അവിടെ പ്രാധാന്യം. ബിസിഎ കഴിഞ്ഞവർക്ക് വിദേശത്ത് എംഎസ് പ്രോഗ്രാമുകൾക്ക് അപേക്ഷിക്കാൻ സാധിക്കുമെങ്കിലും ചിലപ്പോൾ അടിസ്ഥാനപരമായ ചില കംപ്യൂട്ടർ സയൻസ് വിഷയങ്ങളിൽ കൂടുതൽ കോഴ്സുകൾ ചെയ്യേണ്ടി വന്നേക്കാം. എന്നിരുന്നാലും, അപ്ലൈഡ് കംപ്യൂട്ടിംഗ് അല്ലെങ്കിൽ ഐടി മാനേജ്മെന്റ് പോലുള്ള കോഴ്സുകൾക്ക് ബിസിഎ ബിരുദം നല്ലതാണ്.
6. ഏതാണ് നിങ്ങൾക്ക് മികച്ചത്? ബിഎസ്സി കംപ്യൂട്ടർ സയൻസ് തെരഞ്ഞെടുന്നതെങ്കിൽ:
കംപ്യൂട്ടർ സയൻസിന്‍റെ സൈദ്ധാന്തിക വശങ്ങളെക്കുറിച്ച് ആഴത്തിൽ പഠിക്കാൻ സാധിക്കും. ഡാറ്റാ സയൻസ്, മെഷീൻ ലേണിംഗ്, ആർട്ടിഫിഷ്യൽ ഇന്‍റലിജൻസ്, സൈബർ സെക്യൂരിറ്റി, ഗവേഷണം തുടങ്ങിയ ഉയർന്ന തലത്തിലുള്ള സാങ്കേതിക മേഖലകളിൽ ഒരു കരിയർ ലക്ഷ്യമിടാം. എംഎസ്‌സി കംപ്യൂട്ടർ സയൻസ് അല്ലെങ്കിൽ പിഎച്ച്ഡി പോലുള്ള അക്കാദമിക് ബിരുദങ്ങൾ ചെയ്യാം.
ബിഎസിഎ തെരഞ്ഞെടുക്കുന്നതെങ്കിൽ:
നേരിട്ട് സോഫ്റ്റ്വേർ ഡെവലപ്മെന്‍റ്, വെബ് ഡിസൈനിംഗ്, ആപ്ലിക്കേഷൻ ഡെവലപ്മെന്‍റ് തുടങ്ങിയ പ്രായോഗിക ജോലികളിൽ പ്രവേശിക്കാം. തിയറിയേക്കാൾ പ്രായോഗികമായ കോഡിംഗിനും ആപ്ലിക്കേഷൻ നിർമാണത്തിനും കൂടുതൽ പ്രാധാന്യം നല്കുന്നു. 12ാം ക്ലാസിൽ മാത്സ് ഒരു വിഷയമായി പഠിച്ചിട്ടില്ലെങ്കിലോ (എങ്കിലും ചില കോളജുകൾക്ക് ഇത് നിർബന്ധമാവാം) എംസിഎ ചെയ്യാൻ ഉദ്ദേശിക്കുന്നുവെങ്കിലോ ഈ കോഴ്‌സ് തെരഞ്ഞെടുക്കാം.
രണ്ട് കോഴ്സുകൾക്കും അതിന്‍റേതായ പ്രാധാന്യവും സാധ്യതകളുമുണ്ട്. നിങ്ങളുടെ വ്യക്തിപരമായ അഭിരുചിയും ഭാവി ലക്ഷ്യങ്ങളും മനസിലാക്കി ഒരു തീരുമാനമെടുക്കുകയാണ് പ്രധാനം. ഏത് കോഴ്‌സ് തെരഞ്ഞെടുത്താലും മികച്ച സ്ഥാപനത്തിൽ പഠിക്കാനും ഏറ്റവും പുതിയ സാങ്കേതിക വിദ്യകളിൽ അറിവ് നേടാനും പ്രോജക്ടുകൾ ചെയ്യാനും കഴിവുകൾ നിരന്തരം മെച്ചപ്പെടുത്താനും ശ്രദ്ധിക്കുക.
അഡ്വ. ബാബു പള്ളിപ്പാട്ട് കരിയർ ഗൈഡ്
(
[email protected])