ബിബിഎ, ബിസിഎ പ്രവേശനം ഇനിമുതൽ ഏകജാലകം വഴി
തിരുവനന്തപുരം: സംസ്ഥാനത്തെ ബിബിഎ, ബിസിഎ കോഴ്സുകളിലേയ്ക്കുള്ള പ്രവേശനത്തിന് ഈ അധ്യയനവർഷം മുതൽ ഏകജാലക പ്രവേശന നടപടിക്രമങ്ങൾ നടപ്പാക്കുന്നു.
എൽബിഎസ് സെന്‍റർ ആണ് ബിബിഎ, ബിസിഎ കോഴ്സുകളിലേക്കുള്ള പ്രവേശനം നടത്തുക. ഇതിനായി പ്രത്യേക വെബ്സൈറ്റ് തയാറാക്കി.
ഈ അധ്യയന വർഷം മുതൽ ബിബിഎ, ബിസിഎ കോഴ്സുകൾക്ക് എഐസിടിഇ അംഗീകാരം നിർബന്ധമാണ്. സാങ്കേതിക സർവകലാശാലയുടെ കീഴിലുള്ള കോളജുകളിലെ ബിബിഎ, ബിസിഎ പ്രവേശനത്തിനാണ് ഇപ്പോൾ അപേക്ഷ ക്ഷണിച്ചിരിക്കുന്നത്.
മുൻകാലങ്ങളിൽ വിദ്യാർഥികൾക്ക് വ്യത്യസ്ത കോളജുകളിലേക്ക് പ്രവേശനത്തിനായി അതാത് കോളജുകളിൽ അപേക്ഷകൾ സമർപ്പിക്കേണ്ട സ്ഥിതിയായിരുന്നു. ഇതിനാണ് ഇപ്പോൾ മാറ്റം വരുന്നത്.
ബിബിഎ പ്രവേശനത്തിന് അപേക്ഷകർ പ്ലസ് ടു യോഗ്യതാ പരീക്ഷയിലോ തത്തുല്യമായ മറ്റു യോഗ്യതാപരീക്ഷയിലോ 45 ശതമാനം മാർക്കോടെ പാസായിരിക്കണം.
ബിസിഎ പ്രവേശനത്തിന് അപേക്ഷകർ പ്ലസ് ടു യോഗ്യതാപരീക്ഷയിലോ തത്തുല്യമായ മറ്റു യോഗ്യതാപരീക്ഷയിലോ പാസായവരോ, അംഗീകരിക്കപ്പെട്ട മറ്റു യോഗ്യതാപരീക്ഷയിലോ 45 ശതമാനം മാർക്കോടെ പാസായിരിക്കണം.
എസ്‌സി, എസ്ടി വിഭാഗക്കാർക്ക് അഞ്ചുശതമാനം മാർക്ക് ഇളവുണ്ട്. എൽബിഎസ് സെന്‍റർ നടത്തുന്ന പ്രവേശന പരീക്ഷ വിജയിക്കുന്നവർക്ക് മാത്രമേ മെറിറ്റ് സീറ്റിലേക്ക് പ്രവേശനം ലഭിക്കുള്ളു. എന്ന വെബ് സൈറ്റ് വഴി ഓണ്‍ലൈനായി ഈ മാസം 25 വരെ അപേക്ഷിക്കാം.
കൂടുതൽ വിവരങ്ങൾക്ക് 04712324396, 2560361, 2560327 എന്നീ നന്പറുകളിൽ ബന്ധപ്പെടുക.