കൊച്ചി: ഫോര്‍ട്ട് കൊച്ചിയില്‍ യുവാവിനെ കടയില്‍ കയറി കുത്തിക്കൊലപ്പെടുത്തിയ സംഭവത്തിന്‍റെ സിസിടിവി ദൃശ്യങ്ങള്‍ പുറത്ത്. ഫോര്‍ട്ട് കൊച്ചി സ്വദേശി ബിനോയ് സ്റ്റാന്‍ലിയാണ് മരിച്ചത്.
ഇയാളുടെ അയല്‍വാസിയായ അലന്‍ കടയിലെത്തി നിരവധി തവണ കുത്തുന്നതിന്‍റെ സിസിടിവി ദൃശ്യങ്ങള്‍ പുറത്തുവന്നു. പ്രതിക്കായുള്ള അന്വേഷണം പോലീസ് ഊര്‍ജിതമാക്കിയിട്ടുണ്ട്.
ബുധനാഴ്ച രാത്രി 7:45ഓടെയാണ് സംഭവം. കടയില്‍ ആരുമില്ലാത്ത സമയത്ത് ഇവിടെയെത്തിയ പ്രതി ബിനോയിയുമായി വാക്ക് തര്‍ക്കത്തില്‍ ഏര്‍പ്പെട്ടു. ഇതിനിടെ കൈയില്‍ കരുതിയിരുന്ന കത്തി ഉപയോഗിച്ച് പലതവണ കുത്തുകയായിരുന്നു.
സംഭവത്തിന് പിന്നാലെ അലന്‍ ഓടി രക്ഷപെടുകയായിരുന്നു. പിന്നാലെ ഇവിടെയെത്തിയ ആളുകളാണ് ബിനോയിയെ കുത്തേറ്റ നിലയില്‍ കണ്ടെത്തിയത്. ആശുപത്രിയിലേക്ക് കൊണ്ടുപോയെങ്കിലും വഴിമധ്യേ മരിച്ചു.
അയല്‍വാസികളായ ബിനോയിക്കും അലനും ഇടയില്‍ നേരത്തേയും തര്‍ക്കങ്ങള്‍ ഉണ്ടായിരുന്നു. അലന്‍ മറ്റ് കേസുകളില്‍ പ്രതിയാണെന്നും പോലീസ് അറിയിച്ചു.