മലപ്പുറം: നിലമ്പൂര്‍ ഉപതെരഞ്ഞെടുപ്പില്‍ വോട്ടെടുപ്പ് പുരോഗമിക്കുന്നതിനിടെ പരസ്പരം കണ്ടുമുട്ടി സ്ഥാനാര്‍ഥികള്‍. വിവിധ ബൂത്തുകളിലൂടെ സഞ്ചരിച്ച് വോട്ടര്‍മാരെ കാണുന്നതിനിടെയായിരുന്നു അപ്രതീക്ഷിത കണ്ടുമുട്ടല്‍.
യുഡിഎഫ് സ്ഥാനാര്‍ഥി ആര്യാടന്‍ ഷൗക്കത്തും എല്‍ഡിഎഫ് സ്ഥാനാര്‍ഥി എം.സ്വരാജും രാഷ്ട്രീയം മറന്ന് പരസ്പരം കെട്ടിപ്പിടിച്ചു. ഇരുവരും ആശംസകള്‍ അറിയിച്ച ശേഷമാണ് മടങ്ങിയത്.
ഷൗക്കത്തും പി.വി.അന്‍വറും ഇടയ്ക്ക് കണ്ടുമുട്ടിയെങ്കിലും തന്നെ കെട്ടിപ്പിടിക്കേണ്ടെന്ന് അന്‍വര്‍ ആവശ്യപ്പടുകയായിരുന്നു. തന്‍റെ തോളില്‍ പിടിക്കരുതെന്നും അന്‍വര്‍ പറഞ്ഞു.
സ്ഥാനാര്‍ഥികള്‍ തമ്മില്‍ സൗഹൃദം വേണം, പക്ഷേ അത് ആത്മാര്‍ഥമാകണമെന്ന് അന്‍വര്‍ പിന്നീട് പ്രതികരിച്ചു. ധൃതരാഷ്ട്രാലിംഗനത്തിന്‍റെ ആളാണ് ഷൗക്കത്തെന്നും അത് തനിക്ക് വേണ്ടെന്നും അന്‍വര്‍ കൂട്ടിച്ചേര്‍ത്തു.