ഡിജിറ്റൽ ടോക്കിംഗ് പുസ്തക നിർമാണ ശിൽപശാല ആരംഭിച്ചു
തേഞ്ഞിപ്പലം: കാഴ്ചവൈകല്യമുള്ളവർക്കായുള്ള പുസ്തക നിർമാണ രംഗത്തെ നൂതന സാങ്കേതിക വിദ്യയായ ഇ പബ് 3 (e pub 3) പ്രോട്ടോക്കോൾ ഉപയോഗിച്ച് ഡിജിറ്റൽ ടോക്കിംഗ് പുസ്തകങ്ങൾ നിർമിക്കുന്നതിനുള്ള മൂന്നു ദിവസത്തെ പരിശീലനം കാലിക്കട്ട് സർവകലാശാലയിൽ ആരംഭിച്ചു. ഉദ്ഘാടനം രജിസ്ട്രാർ പ്രഫ.എം. മനോഹരൻ നിർവഹിച്ചു.
ബുക്ക് ഷെയർ ഏഷ്യാ തലവൻ ഡോ. ഹോമിയാർ മൊബേദ്ജി, അബ്ദുൾ വാസിദ് എന്നിവരാണ് ശിൽപശാലക്ക് നേതൃത്വം നൽകുന്നത്. ഉദ്ഘാടന ചടങ്ങിൽ സർവകലാശാല ലൈബ്രേറിയൻ ഡോ. ടി.എ. അബ്ദുൾ അസീസ് അധ്യക്ഷനായിരുന്നു. ഡോ. വി.എം. വിനോദ്, ഡോ. മുഹമ്മദ് ഹനീഫ, സി.എച്ച്. മാരിയത്ത് എന്നിവർ പ്രസംഗിച്ചു. സി.എച്ച്.എം.കെ ലൈബ്രറിയുടെ ആഭിമുഖ്യത്തിലാണ് ശിൽപശാല.
പിഎസ് സി ഫെസിലിറ്റേഷൻ സെന്റർ ഇന്ന് ഉദ്ഘാടനം ചെയ്യും
തേഞ്ഞിപ്പലം: കാലിക്കട്ട് യൂണിവേഴ്സിറ്റി എംപ്ലോയ്മെന്റ് ഇൻഫർമേഷൻ ആൻഡ് ഗൈഡൻസ് ബ്യൂറോയിൽ ആരംഭിക്കുന്ന പിഎസ് സി ഫെസിലിറ്റേഷൻ സെന്ററിന്റെ ഉദ്ഘാടനം ഇന്ന് നടക്കും. ഗാന്ധി ചെയർ ഹാളിൽ രാവിലെ പത്തിന് പ്രോവൈസ് ചാൻസലർ പ്രഫ. പി. മോഹൻ ഉദ്ഘാടനം ചെയ്യും. വണ്ടൈം രജിസ്ട്രേഷൻ, സർട്ടിഫിക്കറ്റ് അപ്ലോഡിംഗ്, റാങ്ക് ലിസ്റ്റ്/ഷോർട്ട് ലിസ്റ്റ് എന്നിവ പരിശോധിക്കുന്ന വിധം തുടങ്ങിയ സേവനങ്ങളെക്കുറിച്ച് അവബോധം നൽകുകയെന്നതാണ് കേന്ദ്രത്തിന്റെ ലക്ഷ്യം. ഉദ്ഘാടനത്തോടനുബന്ധിച്ച് ഉദ്യോഗാർഥികൾക്കായി ബോധവത്കരണ ക്ലാസ് ഉണ്ടാകും.