ചോദ്യപേപ്പർ അപാകത: കാലിക്കട്ടിൽ പരീക്ഷകൾ റദ്ദാക്കി
തേഞ്ഞിപ്പലം: ചോദ്യപേപ്പർ അച്ചടിയിലെ അപാകതയെ തുടർന്ന് കാലിക്കട്ട് സർവകലാശാല വിദൂര വിദ്യാഭ്യാസ വിഭാഗം ബിരുദ പരീക്ഷകൾ റദ്ദാക്കി. ഈ മാസം 28ന് തീരുമാനിച്ച മൂന്നാം സെമസ്റ്ററിലെ റീഡിംഗ് അറബിക് ലിറ്ററേച്ചർ, അപ്ലൈഡ് അറബിക് ഗ്രാമർ, റീഡിംഗ് അറബിക് ലിറ്ററേച്ചർ, മീഡിയ പബ്ലിഷിംഗ്, കംപ്യൂട്ടർ ഗ്രാഫിക്സ്, ഡിജിറ്റൽ ഫോട്ടോഗ്രാഫി, കംപ്യൂട്ടർ ഗ്രാഫിക്സ് പരീക്ഷകളാണ് പരീക്ഷാ കണ്ടോളർ ഡോ. സി.സി ബാബുവിന്റെ നിർദേശ പ്രകാരം റദ്ദാക്കിയത്.
തെരഞ്ഞെടുത്ത് ഉത്തരമെഴുതേണ്ട ചോദ്യങ്ങളിൽ ബ്രാക്കറ്റിൽ നൽകിയവയിൽ ശരിയായവ മനസിലാകുന്ന തരത്തിൽ അച്ചടിച്ച് പ്രസിദ്ധീകരിച്ചെന്ന സംശയത്തിന്റെ അടിസ്ഥാനത്തിലാണ് പരീക്ഷകൾ തന്നെ റദ്ദാക്കിയതെന്നാണ് വിവരം. മാറ്റിവച്ച പരീക്ഷകൾ പുതിയ ചോദ്യപേപ്പറുകൾ തയാറാക്കിയ ശേഷം മറ്റൊരു ദിവസം നടത്തും. എന്നാൽ തിയതി പിന്നീട് അറിയിക്കും.
കാലിക്കട്ടിൽ അക്വാറ്റിക് കോംപ്ലക്സ് പ്രവർത്തനം ഡിസംബർ ആദ്യവാരത്തിൽ
തേഞ്ഞിപ്പലം: കാലിക്കട്ട് സർവകലാശാല കാന്പസിൽ അക്വാട്ടിക് കോംപ്ലക്സിന്റെ പ്രവർത്തനം ഡിസംബർ ആദ്യവാരത്തിൽ തുടങ്ങും. ഇതിനു മുന്നോടിയായി അക്വാട്ടിക് കോംപ്ലക്സിൽ നിയമിതരായ വനിത,പുരുഷ കോച്ചുമാർ, ലൈഫ് ഗാർഡ്, മാനേജർ, സ്വീപ്പർമാർ തുടങ്ങിയ ഏഴു ജീവനക്കാർക്കും നീന്തൽക്കുളം ഉപയോഗം സംബന്ധിച്ച കാര്യങ്ങളിൽ പരിശീലനം തുടങ്ങി. നീന്തൽക്കുളത്തിലേക്ക് ആവശ്യമായ റേസിംഗ് ലൈനുകൾ, വാട്ടർ പോളോ ഗോൾ പോസ്റ്റ് , ലൈഫ് ഗാർഡ് സ്റ്റാൻഡ്, ലൈഫ് ജാക്കറ്റ് തുടങ്ങിയ പരിശീലന,സുരക്ഷാ സംവിധാനങ്ങളും തിരുവനന്തപുരത്ത് നിന്നെത്തി.
ദേശീയ മത്സരങ്ങൾക്കും തദ്ദേശീയരായവർക്ക് നീന്തൽ പരിശീലനത്തിനും ഫീസ് മുഖേന അത്യാധുനിക സൗകര്യങ്ങളുള്ള നീന്തൽക്കുളം അനുവദിക്കാനാണ് സർവകലാശാല തീരുമാനം. സർവകലാശാല എൻജിനിയറിംഗ് വിഭാഗം അക്വാട്ടിക് കോംപ്ലക്സിന്റെ മേൽനോട്ട ചുമതല അടുത്ത ദിവസങ്ങളിലായി കായിക വിഭാഗത്തിനു കൈമാറും.