സ്കൂൾ വിദ്യാർഥികൾക്കായി സർവകലാശാലയിൽ ബാഡ്മിന്റണ് പരിശീലനം
തേഞ്ഞിപ്പലം: കായിക വിഭാഗത്തിലെ സൗകര്യങ്ങൾ പൊതുസമൂഹത്തിന് കൂടി ഉപയോഗപ്പെടുത്തുകയെന്ന ലക്ഷ്യത്തോടെ കാലിക്കട്ട് സർവകലാശാലയിൽ ബാഡ്മിന്റണ് അക്കാഡമി തുടങ്ങുന്നതായി കായിക പഠനവകുപ്പ് ഡയറക്ടർ ഡോ.വി.പി. സക്കീർ ഹുസൈൻ അറിയിച്ചു.
സുവർണ ജൂബിലി ആഘോഷങ്ങളുടെ ഭാഗമാണ് പദ്ധതി. എട്ട് മുതൽ 13 വരെ പ്രായക്കാരായ കുട്ടികൾക്ക് ആഴ്ചയിൽ അഞ്ച് ദിവസം വൈകുന്നേരം 5.30 മുതൽ 8.30 വരെ പരിശീലനം നൽകും. നവീകരിച്ച സിന്തറ്റിക് ഇൻഡോർ സറ്റേഡിയം, ജിംനേഷ്യം എന്നിവിടങ്ങളിൽ വെച്ച് സർവകലാശാലയുടെ കോച്ചുമാരാണ് പരിശീലനം നൽകുക. താത്പ്പര്യമുള്ളവർ 20ന് മുന്പ് കായിക പഠനവകുപ്പിൽ രജിസ്റ്റർ ചെയ്യണം. ഫോണ്: 9847185293, 0494 2407501. ചെറുപ്രായത്തിൽ തന്നെ പ്രതിഭകളെ കണ്ടെത്തി അന്താരാഷ്ട്ര നിലവാരത്തിൽ ബാഡ്മിന്റണ് താരങ്ങളെ വാർത്തെടുക്കുകയാണ് പദ്ധതിയുടെ ലക്ഷ്യം.
റൂം ബോയ്: വാക്ഇൻഇന്റർവ്യൂ
തേഞ്ഞിപ്പലം: കാലിക്കട്ട് സർവകലാശാലാ ഗസ്റ്റ് ഹൗസിൽ ദിവസവേതനാടിസ്ഥാനത്തിൽ റൂം ബോയ് കം ബെയററെ നിയമിക്കുന്നതിന് 10ന് രാവിലെ പത്തിന് ഭരണവിഭാഗത്തിൽ വാക്ഇൻഇന്റർവ്യൂ നടത്തും. യോഗ്യത: എഴുതാനും വായിക്കാനുമുള്ള കഴിവ്. കാലിക്കട്ട് സർവകലാശാലാ ഗസ്റ്റ് ഹൗസിലോ, സമാനസ്ഥാപനങ്ങളിലോ റൂം ബോയ് കം ബെയററായി അഞ്ച് വർഷത്തിൽ കുറയാത്ത പരിചയവും ഉണ്ടായിരിക്കണം.
ഇംഗ്ലീഷിലും ഹിന്ദിയിലും സംസാരിക്കാനുള്ള കഴിവ് അഭിലഷണീയം. പ്രായം 2017 ജനുവരി ഒന്നിന് 36 വയസ് കവിയരുത്. സംവരണ വിഭാഗത്തിന് അർഹമായ ഇളവ്. താത്പര്യമുള്ളവർ യോഗ്യത, പ്രായം, ജാതി, പരിചയം എന്നിവ തെളിയിക്കുന്ന സർട്ടിഫിക്കറ്റുകൾ സഹിതം ഹാജരാകണം.
ബോട്ടണി വിദ്യാർഥികൾ "എന്റെ മരം’ നട്ടു
തേഞ്ഞിപ്പലം: സുവർണ ജൂബിലി "എന്റെ മരം’ പദ്ധതിയുടെ ഭാഗമായി കാലിക്കട്ട് സർവകലാശാലാ കാന്പസിൽ ബോട്ടണി പഠനവകുപ്പിൽ പുതുതായി പ്രവേശനം നേടിയ വിദ്യാർഥികൾ നാട്ടുമാവിൻ തൈകൾ നട്ടു.
വൈസ് ചാൻസലർ ഡോ.കെ. മുഹമ്മദ് ബഷീർ തൈകൾ കൈമാറി. പ്രശാന്ത് പി. പ്രഭു ആണ് ആദ്യ തൈ നട്ടത്. പ്രോവൈസ് ചാൻസലർ ഡോ.പി. മോഹൻ, ഡോ. ജോണ് ഇ. തോപ്പിൽ, ഡോ. സന്തോഷ് നന്പി തുടങ്ങിയവർ പങ്കെടുത്തു.