സെനറ്റ് തെരഞ്ഞെടുപ്പ്
ജനുവരി 16ലെ നോട്ടിഫിക്കേഷൻ 145819/ഇലക്ഷൻഅസിസ്റ്റ്1/2017/അഡ്മിൻ (1) പ്രകാരം ഇന്നലെ പ്രസിദ്ധീകരിക്കാനിരുന്ന തദ്ദേശ സ്വയം ഭരണ മണ്ഡലങ്ങളിലെ വോട്ടർപട്ടിക പ്രസിദ്ധീകരണം അഞ്ചിലേക്ക് മാറ്റി. മറ്റ് മണ്ഡലങ്ങളിലെ കരട് വോട്ടർ പട്ടികകൾ ഫെബ്രുവരി 19 മുതൽ 26 വരെയുള്ള തിയതികളിൽ പ്രസിദ്ധീകരിച്ചു. ഇത് സംബന്ധിച്ച തിരുത്തലുകൾക്കും കൂട്ടിചേർക്കലുകൾക്കും മറ്റും 15 ദിവസത്തിനുള്ളിൽ രജിസ്ട്രാർ ആൻഡ് റിട്ടേണിംഗ് ഓഫീസർ, കാലിക്കട്ട് സർവകലാശാല എന്ന വിലാസത്തിൽ അറിയിക്കണം. കരട് വോട്ടർപട്ടികയുടെ പകർപ്പ് വെബ്സൈറ്റിൽ ലഭ്യമാണ്.
ത്രിദിന മനഃശാസ്ത്ര സെമിനാർ മാർച്ച് ഒന്നിന് ആരംഭിക്കും
സർവകലാശാലാ മനഃശാസ്ത്ര പഠനവിഭാഗം സംഘടിപ്പിക്കുന്ന ത്രിദിന മനഃശാസ്ത്ര സെമിനാർ ഇന്ന് ആരംഭിക്കും. സർവകലാശാലാ സെമിനാർ കോംപ്ലക്സിൽ രാവിലെ പത്തിന് വൈസ് ചാൻസലർ ഡോ. കെ. മുഹമ്മദ് ബഷീർ ഉദ്ഘാടനം ചെയ്യും. പ്രബന്ധങ്ങൾ, ചർച്ചകൾ, തിയറ്റർ വർക്ഷോപ്പ്, സിന്പോസിയം, കലാസാംസ്കാരിക പരിപാടികൾ എന്നിവ ഉണ്ടാകും.
ഇന്ന് നടക്കാനിരുന്ന സോഷ്യോളജി പരീക്ഷ മാറ്റി
ഇന്ന് നടത്താനിരുന്ന കോളജ്, വിദൂരവിദ്യാഭ്യാസം, പ്രൈവറ്റ് രജിസ്ട്രേഷൻ ഒന്നാം സെമസ്റ്റർ യുജി (സിയുസിബിസിഎസ്എസ്) സോഷ്യോളജി മെയിനും ഡബിൾ മെയിനും പേപ്പർ എസ്ഒസി1ബി.01/എസ്ഒഎം 1ബി 01 സോഷ്യോളജി കോർമെത്തഡോളജി ആൻഡ് പേഴ്സ്പെക്ടീവ്സ് ഓഫ് സോഷ്യൽ സയൻസസ് റഗുലർ/സപ്ലിമെന്ററി/ഇംപ്രൂവ്മെന്റ് പരീക്ഷ മാറ്റി. മറ്റ് പരീക്ഷകൾക്ക് മാറ്റമില്ല. പുതുക്കിയ തിയതി പിന്നീട് അറിയിക്കും.
ബികോം/ബിബിഎ പരീക്ഷാ അപേക്ഷ
വിദൂരവിദ്യാഭ്യാസം/പ്രൈവറ്റ് രജിസ്ട്രേഷൻ ആറാം സെമസ്റ്റർ ബികോം/ബിബിഎ (സിയുസിബിസിഎസ്എസ്, 2014 മുതൽ പ്രവേശനം) റഗുലർ/സപ്ലിമെന്ററി/ഇംപ്രൂവ്മെന്റ് പരീക്ഷക്ക് സൂപ്പർ ഫൈനോടെ മാർച്ച് മൂന്ന് വരെ അപേക്ഷിക്കാം.
പരീക്ഷാഫലം
2017 ജൂണിൽ നടത്തിയ രണ്ടാം സെമസ്റ്റർ എംബിഇ (സിയുസിഎസ്എസ്) പരീക്ഷാഫലം വെബ്സൈറ്റിൽ. പുനർമൂല്യനിർണയത്തിന് 14 വരെ അപേക്ഷിക്കാം.
2017 ജൂണിൽ നടത്തിയ രണ്ടാം സെമസ്റ്റർ എംഎ ഇക്കണോമിക്സ്, എംഎ അപ്ലൈഡ് ഇക്കണോമിക്സ് (സിയുസിഎസ്എസ്) പരീക്ഷാഫലം വെബ്സൈറ്റിൽ. പുനർമൂല്യനിർണയത്തിന് 13 വരെ അപേക്ഷിക്കാം.
2017 നവംബറിൽ നടത്തിയ മൂന്നാം സെമസ്റ്റർ എംഎ പൊളിറ്റിക്കൽ സയൻസ് (സിസിഎസ്എസ്) പരീക്ഷാഫലം വെബ്സൈറ്റിൽ.
എംഎ ഇംഗ്ളീഷ് മൂല്യനിർണയ ക്യാന്പ്
മൂന്നാം സെമസ്റ്റർ എംഎ ഇംഗ്ളീഷ് (സിയുസിഎസ്എസ്) പരീക്ഷയുടെ മൂല്യനിർണയ ക്യാന്പ് ആറ് മുതൽ ദേവഗിരി സെന്റ് ജോസഫ്സ് കോളജിലും (നോർത്ത് സോണ് ), പാലക്കാട് മേഴ്സി കോളജിലും (സൗത്ത് സോണ് ) നടക്കും. പിജി ക്ലാസുകളിൽ ഒരു വർഷത്തിൽ കൂടുതൽ അധ്യാപന പരിചയമുള്ളവർ ക്യാന്പിൽ പങ്കെടുക്കണമെന്ന് പരീക്ഷാ കണ്ട്രോളർ അറിയിച്ചു.
ഒറിജിനൽ ഡിഗ്രി സർട്ടിഫിക്കറ്റിന് ഓണ്ലൈൻ അപേക്ഷ
ഒറിജിനൽ ഡിഗ്രി സർട്ടിഫിക്കറ്റ് ലഭിക്കുന്നതിന് അപേക്ഷ ഓണ്ലൈനായി സമർപ്പിക്കുന്നതിനുള്ള വിശദാംശങ്ങൾ www.dconline.uoc.ac.in എന്ന വെബ് അഡ്രസിൽ ലഭ്യമാണ്. സർവകലാശാലാ വെബ്സൈറ്റിലും ഈ ലിങ്ക് ലഭ്യമാണ്. സിയുസിബിസിഎസ്എസ്, സിയുസിഎസ്എസ് എന്നീ വിഭാഗങ്ങളിലെ വിദ്യാർഥികൾ ഒറിജിനൽ ഡിഗ്രി സർട്ടിഫിക്കറ്റ് ലഭിക്കുന്നതിന് ഇന്ന് മുതൽ ഓണ്ലൈനായി മാത്രം അപേക്ഷിക്കണം. ഇതിന് മറ്റ് തരത്തിലുള്ള അപേക്ഷ സ്വീകരിക്കുന്നതല്ല. അപേക്ഷയോടൊപ്പം ആവശ്യമായ രേഖകൾ സ്കാൻ ചെയ്ത് അപ്ലോഡ് ചെയ്യണം. രേഖകളുടെ പകർപ്പ് പരിശോധനക്കായി അപേക്ഷയുടെ പ്രിന്റൗട്ടിന്റെ കൂടെ നിർബന്ധമായും അയക്കണം.
ദേശീയ യുവജനോത്സവത്തിലെ വിജയികൾക്ക് സ്വീകരണം നൽകി
തേഞ്ഞിപ്പലം: അന്തർ സർവകലാശാലാ ദേശീയ യുവജനോത്സവത്തിൽ പങ്കെടുത്ത എല്ലാ ഇനങ്ങളിലും ഒന്നാം സ്ഥാനം നേടിയ കാലിക്കട്ട് സർവകലാശാലാ കലാസംഘത്തിന് ഉജ്വല സ്വീകരണം നൽകി. വെസ്റ്റേണ് ഇൻസ്ട്രുമെന്റൽ (സോളോ)ആന്റണി വർഗീസ് (കൊടകര സഹൃദയ കോളജ് ഓഫ് അഡ്വാൻസ്ഡ് സ്റ്റഡീസ്), വെസ്റ്റേണ് ഇൻസ്ട്രുമെന്റൽ (സോളോ) അക്കന്പനിസ്റ്റ്ആശിഷ് രമേഷ് (കൊടകര സഹൃദയ കോളജ് ഓഫ് അഡ്വാൻസ്ഡ് സ്റ്റഡീസ്), ക്ലാസിക്കൽ ഇൻസ്ട്രുമെന്റൽ (സോളോ) പെർകഷൻകെ.എസ്.വിഗ്നേഷ് (കൊടകര സഹൃദയ കോളജ് ഓഫ് അഡ്വാൻസ്ഡ് സ്റ്റഡീസ്), സ്പോട്ട് പെയിന്റിംഗ്ജെ.എസ്.ശീതൾ (ദേവഗിരി സെന്റ് ജോസഫ്സ് കോളജ്), ക്ലേ മോഡലിംഗ് ഒ.എസ്. വിശാഖ് (തൃശൂർ ശ്രീ കേരളവർമ്മ കോളജ്) എന്നിവരാണ് ഒന്നാം സ്ഥാനം നേടിയത്.
വൈസ് ചാൻസലർ ഡോ.കെ. മുഹമ്മദ് ബഷീർ വിജയികൾക്ക് ഉപഹാരങ്ങളും സർട്ടിഫിക്കറ്റുകളും നൽകി. പങ്കെടുത്ത എല്ലാ ഇനങ്ങളിലും ഒന്നാം സ്ഥാനം നേടിയ കാലിക്കട്ട് ടീം ദേശീയ തലത്തിൽ തന്നെ ശ്രദ്ധേയമായി. സുവർണ ജുബിലി വർഷത്തിലെ ഉജ്വല നേട്ടം നിലനിർത്താനും വരും വർഷങ്ങളിൽ കൂടുതൽ പ്രതിഭകളെ ദേശീയ തല മത്സരങ്ങളിൽ പങ്കെടുപ്പിക്കാനും നടപടിയെടുക്കുമെന്ന് വൈസ് ചാൻസലർ പറഞ്ഞു. പ്രോവൈസ് ചാൻസലർ ഡോ.പി. മോഹൻ, സിൻഡിക്കറ്റ് അംഗം ഡോ.ടി.എം. വിജയൻ, ജോയിന്റ് രജിസ്ട്രാർമാരായ വേലായുധൻ മുടിക്കുന്നത്ത്, കെ.കെ. സുരേഷ്, പി.പി. അജിത, വിദ്യാർഥിക്ഷേമ ഡീൻ പി.വി. വൽസരാജ്, അസിസ്റ്റന്റ് രജിസ്ട്രാർ കൃഷ്ണൻ തിരുക്കൻ, യൂണിവേഴ്സിറ്റി യൂണിയൻ ചെയർമാൻ പി.സുജ തുടങ്ങിയവർ പങ്കെടുത്തു.
വിദൂരവിദ്യാഭ്യാസം: ശിൽപശാല ആരംഭിച്ചു
കോഴിക്കോട്: ഡിജിറ്റൽ സാങ്കേതികവിദ്യ പരമാവധി പ്രയോജനപ്പെടുത്തികൊണ്ട് കാലിക്കട്ട് സർവകലാശാലാ വിദൂരപഠന വിഭാഗത്തിന്റെ പ്രവർത്തന മികവ് ഉയർത്തുമെന്ന് പ്രോവൈസ് ചാൻസലർ ഡോ. പി. മോഹൻ പറഞ്ഞു. പഠനസാമഗ്രികൾ തയ്യാറാക്കുന്നതിൽ അധ്യാപകർക്ക് വിദഗ്ധ പരിശീലനം നൽകുന്നതിനായി സംഘടിപ്പിച്ച "അധ്യാപനവും പഠനവും വിദൂരവിദ്യാഭ്യാസ രീതിയിൽ’ എന്ന വിഷയത്തിലെ ത്രിദിന ശിൽപശാല ഉദ്ഘാടനം ചെയ്യുകയായിരുന്നു അദ്ദേഹം. റഗുലർ വിദ്യാർഥികളുടെയും വിദൂരവിദ്യാർഥികളുടെയും പഠനസാമഗ്രികൾ തദനുസൃതമായ ഭിന്നശൈലികളിലാവണം തയ്യാറാക്കേണ്ടത്. ലളിതമായ ശൈലി പിന്തുടരാൻ പ്രത്യേക ശ്രദ്ധചെലുത്തേണ്ടതുണ്ട്. പ്രതിവർഷം അന്പതിനായിരം വിദ്യാർഥികൾ വിദൂരപഠന വിഭാഗത്തിൽ രജിസ്റ്റർ ചെയ്യുന്നുണ്ട്. ഇവർക്ക് ഏറ്റവും മികച്ച സംവിധാനങ്ങൾ ഒരുക്കാൻ സർവകലാശാല പ്രതിജ്ഞാബദ്ധമാണെന്നും പ്രോവൈസ് ചാൻസലർ പറഞ്ഞു. ഇഗ്നോയുടെ സഹകരണത്തോടെയാണ് ശിൽപശാല സംഘടിപ്പിക്കുന്നത്. മലേഷ്യയിലെ വാവാസാൻ ഓപ്പണ് യൂണിവേഴ്സിറ്റിയിലെ മുൻ വൈസ് ചാൻസലർ ഡോ. മോഹൻ ബി മേനോൻ മുഖ്യപ്രഭാഷണം നടത്തി. ഡോ. കെ.എം. അനിൽ, ഡോ. എം. രാജേഷ്, ഡോ. ശ്രീകല തുടങ്ങിയവർ പങ്കെടുത്തു.
അഖിലേന്ത്യാ അന്തർസർവകലാശാലാ പുരുഷ നെറ്റ്ബോൾ:
കാലിക്കറ്റ് റണ്ണറപ്പ്
കോഴിക്കോട്: അഖിലേന്ത്യാ അന്തർസർവകലാശാലാ പുരുഷ നെറ്റ്ബോൾ ചാന്പ്യൻഷിപ്പിൽ കാലിക്കട്ട് റണ്ണറപ്പ്. മാംഗ്ളൂർ സർവകലാശാലാ ഉജ്ജൈൻ ശ്രീധർമ്മസ്ഥല മജ്ഞു നാഗേശ്വര കോളജിൽ വെച്ച് നടന്ന മത്സരത്തിൽ ആതിഥേയരായ മാംന്തൂർ സർവകലാശാലയാണ് കാലിക്കട്ടിനെ പരാജയപ്പെടുത്തിയത്. സ്കോർ 5337. കഴിഞ്ഞവർഷവും കാലിക്കട്ടിനായിരുന്നു രണ്ടാം സ്ഥാനം. വനിതാ വിഭാഗത്തിലും അഖിലേന്ത്യാ അന്തർസർവകലാശാലാ ചാന്പ്യൻഷിപ്പിൽ കാലിക്കട്ട് റണ്ണറപ്പായിരുന്നു.
ഡോ. അനിൽ വള്ളത്തോളിന് യാത്രയയപ്പ് നൽകി
കോഴിക്കോട്: മലയാളം സർവകലാശാലാ വൈസ് ചാൻസലറായി നിയമിതനായ ഡോ. അനിൽ വള്ളത്തോളിന് കാലിക്കട്ട് സർവകലാശാലാ സമൂഹം സ്നേഹനിർഭരമായ യാത്രയയപ്പ് നൽകി. വൈസ് ചാൻസലർ ഡോ. കെ. മുഹമ്മദ് ബഷീർ, പ്രോവൈസ് ചാൻസലർ ഡോ. പി. മോഹൻ, മലയാള പഠനവകുപ്പ് മേധാവി ഡോ. ഉമർ തമേൽ, അധ്യാപകർ, ജീവനക്കാർ, വിദ്യാർഥികൾ തുടങ്ങിയവർ സംബന്ധിച്ചു. വൈസ് ചാൻസലർ ഡോ. കെ. മുഹമ്മദ് ബഷീർ ഉപഹാരം സമർപ്പിച്ചു. മലയാള പഠനവകുപ്പിന്റെ ആഭിമുഖ്യത്തിലും യാത്രയയപ്പ് നൽകി. സർവകലാശാലാ സർവീസിൽ നിന്നും വിരമിച്ച എ. സുഗന്ധി, എ.പി. ബാലകൃഷ്ണൻ, പി.ആർ. സാധന എന്നിവർക്കും യാത്രയയപ്പ് നൽകി.