നിർദിഷ്ട സാന്പത്തിക ഇടപാടുകളുടെ റിട്ടേണുകൾ ; കാലാവധി ജൂണ്‍ 30 വരെ ദീർഘിപ്പിച്ചു : Deepika.com Tax News

നിർദിഷ്ട സാന്പത്തിക ഇടപാടുകളുടെ റിട്ടേണുകൾ ; കാലാവധി ജൂണ്‍ 30 വരെ ദീർഘിപ്പിച്ചു

ആദായനികുതി നിയമം 285 ബിഎ അനുസരിച്ച് നിർദിഷ്ട സാന്പത്തിക ഇടപാടുകളുടെ വിശദവിവരങ്ങൾ നിർദേശിക്കപ്പെട്ട എല്ലാത്തരം നികുതിദായകരും സ്ഥാപനങ്ങളും ഫോം നന്പർ 61-എയിൽ മേയ് 31നു മുന്പ് ആദായനികുതി വകുപ്പിലെ ഇന്‍റലിജൻസ് ആൻഡ് ക്രിമിനൽ ഇൻവെസ്റ്റിഗേഷൻ ഡയറക്ടർ മുന്പാകെ ഡിജിറ്റൽ സിഗ്‌നേച്ചർ ഉപയോഗിച്ച് ഇലക്‌ട്രോണിക് മാർഗത്തിലൂടെ ഫയൽ ചെയ്യണമായിരുന്നു. എന്നാൽ, സിബിഡിറ്റി 2017 മേയ് 31ന് ഇറക്കിയ വിജ്ഞാപനം അനുസരിച്ച് 61 എ ഫയൽ ചെയ്യുന്നതിനുള്ള തീയതി ജൂൺ 30 വരെ ദീർഘിപ്പിച്ചിട്ടുണ്ട്. ഇനിയും ഫയൽ ചെയ്യാൻ സാധിക്കാതെ വന്നവർക്ക് ജൂണ്‍ 30നു മുന്പ് ഫയൽ ചെയ്യാം.

പ്രസ്തുത റിട്ടേണുകൾ ഫയൽ ചെയ്യാൻ ബാധ്യതയുള്ള നികുതിദായകരും സ്ഥാപനങ്ങളും ഇതിൽ വീഴ്ച വരുത്തിയാൽ താഴെപ്പറയുന്ന ശിക്ഷാനടപടികൾ നേരിടേണ്ടിവരും.
1) താമസിക്കുന്ന ഓരോ ദിവസത്തേക്കും പ്രതിദിനം 100 രൂപ പിഴ.

2) റിട്ടേണ്‍ ഫയൽ ചെയ്യേണ്ട നികുതിദായകർ ആദായനികുതി ഓഫീസിൽനിന്നു നോട്ടീസ് ലഭിച്ചതിനു ശേഷവും ഫയൽ ചെയ്യുന്നതിന് വീഴ്ച വരുത്തിയാൽ താമസം വരുത്തുന്ന ഓരോ ദിവസത്തേക്കും 500 രൂപ വീതം പിഴ ഈടാക്കുന്നതാണ്.

3) പ്രസ്തുത റിട്ടേണിൽ എന്തെങ്കിലും വിവരങ്ങൾ തെറ്റായി സമർപ്പിച്ചാൽ 50,000 രൂപയാണ് പിഴത്തുക.

‌നിർദിഷ്ട ഇടപാടുകൾ ഇല്ലെങ്കിലും നിർദേശിക്കപ്പെട്ട സ്ഥാപനങ്ങളും വ്യക്തികളും റിട്ടേണ്‍ സമർപ്പിക്കണമോ?

ആദായനികുതി നിയമം 285 ബിഎയും ആദായനികുതി റൂൾസിലെ 114 ഇയും അനുസരിച്ചാണ് നിർദേശിക്കപ്പെട്ട സ്ഥാപനങ്ങളും വ്യക്തികളും 2016-17 കാലഘട്ടത്തിലെ നിർദിഷ്ട സാന്പത്തിക ഇടപാടുകളുടെ റിട്ടേണ്‍ നിശ്ചിത സമയത്തിനുള്ളിൽ ഫയൽ ചെയ്യേണ്ടത്. അല്ലാത്ത പക്ഷം “ഇല്ല” എന്ന കാര്യം വ്യക്തമാക്കി റിട്ടേണുകൾ സമർപ്പിക്കേണ്ടതുണ്ടോ?
പ്രസ്തുത കാര്യത്തിൽ റിട്ടേണ്‍ സമർപ്പിക്കണം എന്നും സമർപ്പിക്കേണ്ട ആവശ്യമില്ല എന്നും ഉള്ള വാദങ്ങൾ ഉയർന്നുകേൾക്കുന്നുണ്ട്. എന്നാൽ, നിർദേശിക്കപ്പെട്ട വ്യക്തികളും സ്ഥാപനങ്ങളും റിപ്പോർട്ട് ചെയ്യപ്പെടേണ്ട സാന്പത്തിക ഇടപാടുകൾ ആ വർഷം നടത്തിയിട്ടില്ലെങ്കിൽ 61-എയിലുള്ള സാന്പത്തിക റിട്ടേണുകൾ സമർപ്പിക്കേണ്ട ആവശ്യമില്ലെന്നാണ് പൊതുവേയുള്ള അഭിപ്രായം. ഇതിന് ഉപോത്ബലകമായി താഴെപ്പറയുന്ന കാരണങ്ങൾ സൂചിപ്പിക്കുന്നു.

1) ഇപ്പോൾ നിർദേശിച്ചിരിക്കുന്ന സാന്പത്തിക റിട്ടേണുകൾ (സ്റ്റേറ്റ്മെന്‍റ് ഓഫ് ഫിനാൻഷൽ ട്രാൻസാക്‌ഷൻ - എസ്എഫ്ടി) കഴിഞ്ഞവർഷം വരെ ഉണ്ടായിരുന്ന ആന്വൽ ഇൻഫർമേഷൻ റിട്ടേണുകളുടെ (എഐആർ) തുടർച്ചയാണ്. പ്രധാനമായും അവയുടെ പേര് മാറിയതല്ലാതെ കാര്യമായ വ്യതിയാനങ്ങൾ വരുത്തിയിട്ടില്ല. ആന്വൽ ഇൻഫർമേഷൻ റിട്ടേണുകൾ പ്രസ്തുത വ്യക്തികൾക്കും സ്ഥാപനങ്ങൾക്കും ബാധകമല്ലെങ്കിൽ “ഇല്ല” എന്നുള്ള വിവരം സൂചിപ്പിച്ച് ഫയൽ ചെയ്യേണ്ട ആവശ്യമില്ല.

2) ആദായനികുതി നിയമം 285 ബിഎ-യിൽ വ്യക്തമാക്കിയിരിക്കുന്നത്, നിർദേശിക്കപ്പെട്ട വ്യക്തികളും സ്ഥാപനങ്ങളും റിപ്പോർട്ട് ചെയ്യപ്പെടേണ്ട ഇടപാടുകൾ നടത്തിയിട്ടുണ്ടെങ്കിൽ മാത്രമേ പ്രസ്തുത ഇടപാടുകളുടെ വിശദവിവരങ്ങൾ സമർപ്പിക്കേണ്ടതുള്ളൂ എന്നതാണ്. അതിനാൽ റിപ്പോർട്ട് ചെയ്യപ്പെടേണ്ട ഇടപാടുകൾ മേൽപ്പറഞ്ഞ നിർദേശിക്കപ്പെട്ട വ്യക്തികളും സ്ഥാപനങ്ങളും നടത്തിയിട്ടില്ലെങ്കിൽ ആദായനികുതി നിയമം 285-ബിഎ അനുസരിച്ചുള്ള റിട്ടേണുകളും സമർപ്പിക്കേണ്ടതില്ല.

3) നിർദേശിക്കപ്പെട്ട വ്യക്തികളും സ്ഥാപനങ്ങളും നിർദിഷ്ട സാന്പത്തിക ഇടപാടുകൾ രജിസ്റ്റർ ചെയ്യുകയോ അവരുടെ ബുക്കുകളിൽ റിക്കാർഡ് ചെയ്യുകയോ ചെയ്താൽ മാത്രമേ ആദായനികുതി റൂൾസിലെ 114-ഇ അനുസരിച്ച് പ്രസ്തുത സാന്പത്തിക റിട്ടേണ്‍ ഫോം നന്പർ 61 എയിൽ സമർപ്പിക്കേണ്ടതുള്ളൂ. പ്രസ്തുത റൂൾ അനുസരിച്ച് നിർദിഷ്ട സാന്പത്തിക ഇടപാടുകൾ രജിസ്റ്റർ ചെയ്യുകയോ ബുക്കുകളിൽ റിക്കാർഡ് ചെയ്യുകയോ ചെയ്യാത്തവർ റിട്ടേണ്‍ സമർപ്പിക്കേണ്ട ആവശ്യമില്ല. നിർദിഷ്ട സാന്പത്തിക ഇടപാടുകൾ നടത്തിയിട്ടില്ലെങ്കിലും നിർദേശിക്കപ്പെട്ട വ്യക്തികൾ പ്രസ്തുത സാന്പത്തിക റിട്ടേണ്‍ ഫോം 61 എയിൽ ഫയൽ ചെയ്യണമെന്ന് ആദായനികുതി റൂൾസിലെ 114 ഇയിൽ ഒരിടത്തും സൂചിപ്പിച്ചിട്ടില്ല.
4) കൂടാതെ, ആദായനികുതി ഡിപ്പാർട്ട്മെന്‍റിലെ സർക്കുലറുകളും വിജ്ഞാപനങ്ങളും അനുസരിച്ചും നിർദിഷ്ട ഇടപാടുകൾ നടത്താത്ത നിർദേശിക്കപ്പെട്ട വ്യക്തികളും സ്ഥാപനങ്ങളും റിട്ടേണ്‍ ഫയൽ ചെയ്യണമെന്ന് ഒരിടത്തും സൂചിപ്പിച്ചിട്ടില്ല.