പാസ്ബുക്കും എസ്എൽഐ പ്രീമിയവും ആവശ്യമാണ് : Deepika.com Tax News

Services & Questions

പാസ്ബുക്കും എസ്എൽഐ പ്രീമിയവും ആവശ്യമാണ്

ആർടി ഓഫീസിൽനിന്ന് 31/5/2017ൽ ഓഫീസ് അന്‍റൻഡറായി വിരമിച്ചു. എന്‍റെ പിഎഫ് ക്ലോസ് ചെയ്തുകിട്ടി. എന്നാൽ സ്റ്റേറ്റ് ലൈഫ് ഇൻഷ്വറൻസ് (എസ്എൽഐ) പോളിസി മാത്രം ക്ലോസ് ചെയ്തിട്ടില്ല. കാരണം പറഞ്ഞത് പാസ് ബുക്ക് പൂർണമായും വരവ് വച്ചിട്ടില്ലെന്നാണ്.അതുപോലെ എസ്എൽഐ യുടെ പ്രീമിയം പാസ്ബുക്കിനോടൊപ്പം കാണാനില്ല എന്നുമാണ്. പാസ്ബുക്ക് പ്രകാരം ഏകദേശം 30,000രൂപയ്ക്ക് മുകളിൽ എനിക്ക് കിട്ടാനുണ്ട്. എസ്എൽഐ ക്ലോസ് ചെയ്ത് തുക കിട്ടാൻ ഞാൻ ആരെയാണ് സമീപിക്കേണ്ടത്?
എം.എസ്. പീതാംബരൻ,
നെടുംകുന്നം

സ്റ്റേറ്റ് ലൈഫ് ഇൻഷ്വറൻസ് പോളിസി ക്ലോസ് ചെയ്യുന്നതിനു പാസ്ബുക്കും എസ്എൽഐ പ്രീമിയവും ആവശ്യമാണ്. വിവിധ ഓഫീസുകളിൽ ജോലി ചെയ്തപ്പോൾ ശന്പളത്തിൽനിന്നു പിടിച്ച തുക അറിയുന്നതിനാണ് പാസ് ബുക്ക് പൂർണമായും പൂരിപ്പിക്കേണ്ടത്. അതാത് ഓഫീസുകളിലെ ഓഫീസ് മേധാവികൾ തുക വരവുവച്ച പാസ്ബുക്കിൽ ഒപ്പുവയ്ക്കേണ്ടതാണ്. ഓഫീസ് സീൽ ഉണ്ടായിരിക്കണം. എസ് എൽഐ പ്രീമിയം നഷ്ടപ്പെട്ടുപോയതുകൊണ്ട് പകരമായി 500രൂപയുടെ മുദ്രപ്പത്രത്തിൽ സത്യവാങ്മൂലം തയാറാക്കി പോളിസി ഉടമ ഒപ്പുവയ്ക്കുകയും ഇത് ഏതെങ്കിലും രണ്ട് സർക്കാർ ജീവനക്കാർ സാക്ഷ്യപ്പെടുത്തുകയും വേണം. (അവസാനം ജോലി ചെയ്ത ഓഫീസിലാണെങ്കിൽ ഏറ്റവും നന്ന്) പിന്നീട് ഈ സത്യവാങ്മൂലവും എസ്എൽഐ ക്ലോഷറിനുള്ള അപേക്ഷയും സഹിതം അവസാനം ജോലി ചെയ്ത ഓഫീസ് മുഖേന എസ്എൽഐ ഓഫീസിലേക്ക് അയച്ചുകൊടുക്കുകയാണ് വേണ്ടത്. എസ്എൽഐ ക്ലോഷറിന്‍റെ തുക ഉടമയുടെ ബാങ്ക് അക്കൗണ്ടിൽ ക്രഡിറ്റു ചെയ്യുന്നതാണ്.