ഹിറ്റ് കൂട്ടുകെട്ടിൽ കായംകുളം കൊച്ചുണ്ണി എത്തുന്നു; നായകൻ നിവിൻ
മലയാളത്തിന്റെ പ്രിയപ്പെട്ട കള്ളൻ കായംകുളം കൊച്ചുണ്ണിയായി പ്രിയതാരം നിവിൻ പോളി എത്തുന്നു. ബോബി–സഞ്ജയ് കൂട്ടുകെട്ടിന്റെ തിരക്കഥയിൽ റോഷൻ ആൻഡ്രൂസ് ഒരുക്കുന്ന ചിത്രം ശ്രീഗോകുലം മൂവീസാണ് നിർമിക്കുന്നത്. അതേസമയം, കായംകുളത്തെ കൊച്ചുണ്ണിയുടെ കഥയാണെങ്കിലും സിനിമയിൽ കായംകുളമായി വേഷമിടുന്നത് ശ്രീലങ്കൻ ഗ്രാമമാണ്. അടുത്ത വർഷം ചിത്രീകരണം ആരംഭിക്കുമെന്നാണ് വിവരം. 10– 12 കോടിയാണ് ചിത്രത്തിന്റെ ചെലവ് പ്രതീക്ഷിക്കുന്നത്.

ഒരു ത്രില്ലർ മൂഡിലായിരിക്കും ചിത്രം ഒരുക്കുന്നതെന്നാണ് സംവിധായകൻ നല്കുന്ന സൂചന. കള്ളനാകുന്നതിനു മുമ്പുള്ള കൊച്ചുണ്ണിയുടെ കഥയും ജീവിതവും പ്രണയവുമെല്ലാം ചിത്രത്തിൽ ഉണ്ടാകും. ചിത്രത്തിനായി ചരിത്ര വിദ്യാർഥികളുടെ നേതൃത്വത്തിൽ വലിയ ഗവേഷണം തന്നെ നടത്തിയിരുന്നു.

ഏതാനും ആക്ഷൻ സീനുകളും ചിത്രത്തിലുണ്ടാകുമെന്നാണ് അണിയറ പ്രവർത്തകർ പറയുന്നത്. ചിത്രത്തിലെ നായികയെ ഇതുവരെ തീരുമാനിച്ചിട്ടില്ല. കായംകുളം കൊച്ചുണ്ണിക്കു ശേഷം ഇതേ കൂട്ടുകെട്ടിൽ ഒരുങ്ങുന്ന അടുത്ത ബിഗ് ബജറ്റ് ചിത്രത്തിലും നിവിൻ പോളിയായിരിക്കും നായകൻ.

ഇതു രണ്ടാം തവണയാണ് കായംകുളം കൊച്ചുണ്ണിയുടെ കഥ സിനിമയാകുന്നത്. 1966ൽ പുറത്തിറങ്ങിയ കായംകുളം കൊച്ചുണ്ണിയിൽ സത്യനായിരുന്നു കൊച്ചുണ്ണിയായി എത്തിയത്.