മോദിയുടെ ഓട്ടോഗ്രാഫ് ലഭിച്ച പെണ്‍കുട്ടി സോഷ്യൽമീഡിയായിൽ താരം; റീത്തയെ തേടി വിവാഹാലോചനകൾ

പ്രധാനമന്ത്രി നരേന്ദ്രമോദി പങ്കെടുത്ത സമ്മേളനത്തിനിടെ പന്തൽ തകർന്നു വീണ് നിരവധിയാളുകളെ ആശുപത്രിയിൽ പ്രവേശിപ്പിച്ചിരുന്നു. മോദി ആശുപത്രിയിൽ എത്തി ഇവരെയെല്ലാം സന്ദർശിച്ചുവെന്നുള്ളതാണ് പരിക്കേറ്റവരെ ഏറ്റവുമധികം സന്തോഷിപ്പിച്ചത്. മോദി ആശുപത്രിയിൽ സന്ദർശനത്തിന് എത്തിയപ്പോൾ വെസ്റ്റ്ബംഗാളിലെ മിഡ്നാപൂരിലുള്ള ബംങ്ക്വാര സ്വദേശികളായ റീത്ത മുദി തന്‍റെ മനസിലെ ഒരു ആഗ്രഹം അദ്ദേഹത്തെ അറിയിച്ചു.

പ്രധാനമന്ത്രിയുടെ ഒരു ഓട്ടോഗ്രാഫായിരുന്നു റീത്തയുടെ ആ ആഗ്രഹം. ആവശ്യപ്പെട്ടയുടൻ തന്നെ അദ്ദേഹം അത് നൽകുകയും ചെയ്തു. ഇതിന്‍റെ ചിത്രങ്ങൾ സോഷ്യൽമീഡിയായിൽ വൈറലായിരുന്നു. ഇപ്പോഴിതാ ഈ ഓട്ടോഗ്രാഫ് ലഭിച്ച അനിതയ്ക്ക് ഇപ്പോൾ സാമൂഹ്യമാധ്യമങ്ങളിൽ താരപരിവേഷമാണ്.

കഴിഞ്ഞ പത്തു ദിവസങ്ങൾകൊണ്ട് ജീവിതം മാറിമറിഞ്ഞുവെന്നാണ് റീത്ത മുദി പറയുന്നത്. അമ്മയ്ക്കും സഹോദരിക്കുമൊപ്പമാണ് റീത്ത, മോദി പങ്കെടുക്കുന്ന സമ്മേളന സ്ഥലമായ മിഡ്നാപൂരിൽ പോയത്. സമ്മേളനം തുടങ്ങി അൽപ്പ സമയത്തിനു ശേഷം പന്തൽ തകർന്നു വീഴുകയായിരുന്നു. പരിക്കേറ്റവരെയെല്ലാം സമീപത്തെ ആശുപത്രിയിലേക്കു മാറ്റുകയും ചെയ്തു.

ഞാൻ ഒരു ഓട്ടോഗ്രാഫ് ആവശ്യപ്പെട്ടപ്പോൾ അതു നൽകാൻ മോദി അൽപ്പം മടിച്ചെന്ന് റീത്ത പറയുന്നു. എന്നാൽ ഞാൻ വീണ്ടും നിർബന്ധിച്ചപ്പോൾ ചിരിച്ചുകൊണ്ട് യാതൊരു മടിയും കൂടാതെ അദ്ദേഹം ഓട്ടോഗ്രാഫ് നൽകുകയായിരുന്നു. അദ്ദേഹത്തിനൊപ്പം നിന്നയാളാണ് ഓട്ടോഗ്രാഫെഴുതുവാൻ പേപ്പർ നൽകിയതെന്ന് റീത്ത പറഞ്ഞു.

അദ്ദേഹം പോയതിനു ശേഷം നിരവധിയാളുകൾ ഈ ഓട്ടോഗ്രാഫ് കാണുവാൻ എത്തി. മാത്രമല്ല ഈ കുറഞ്ഞ ദിവസത്തിനുള്ളിൽ റീത്തയ്ക്ക് രണ്ടു കല്യാണാലോചനകളും വന്നു. എന്നാൽ മാതാപിതാക്കൾ തീരുമാനിക്കുമ്പോഴേ ഞാൻ അതിനെ കുറിച്ച് ആലോചിക്കുന്നുള്ളുവെന്ന് റീത്ത പറയുന്നു. ബങ്ക്വാര ക്രസ്ത്യൻ കോളജിൽ രണ്ടാം വർഷ ബിരുദ വിദ്യാർഥിനിയാണ് റീത്ത.