ബിലാൽ ജോൺ കുരിശിങ്കൽ എന്ന കഥാപാത്രമായി മമ്മൂട്ടി തകർപ്പൻ പ്രകടനം കാഴ്ച വച്ച ചിത്രമായിരുന്നു ബിഗ് ബി. ചിത്രത്തിന്‍റെ രണ്ടാം ഭാഗം ബിലാലിനായുള്ള കാത്തിരിപ്പിലാണ് ആരാധകർ. ചിത്രത്തിന് രണ്ടാം ഭാഗമുണ്ടെന്ന കാര്യം സംവിധായകൻ അമൽ നീരദ് മുന്പേ തന്നെ പുറത്തു വിട്ടതാണ്. ഇപ്പോൾ ബിലാൽ എന്ന ചിത്രത്തെപ്പറ്റി പുതിയ വിവരങ്ങൾ പുറത്തുവിട്ടിരിക്കുകയാണ് ബിഗ്ബിയിലെ താരങ്ങളായ ബാലയും മംമ്താ മോഹൻദാസും.
ബിഗ്ബിയിൽ ബിലാൽ ജോൺ കുരിശിങ്കൽ എന്ന കഥാപാത്രത്തിന്‍റെ സഹോദരനായ മുരുകൻ എന്ന സ്റ്റണ്ട് മാസ്റ്ററുടെ വേഷം ചെയ്തത് ബാലയായിരുന്നു. റിമി എന്ന കഥാപാത്രത്തെയാണ് മംമ്ത മോഹൻദാസ് അവതരിപ്പിച്ചത്. ചിത്രത്തിന്‍റെ ഷൂട്ടിംഗ് ഉടൻ തുടങ്ങാൻ പോകുന്ന വിവരം ഫേസ്ബുക്കിൽ പോസ്റ്റ് ചെയ്ത വീഡിയോയിലാണ് ബാല അറിയിച്ചത്. ചിത്രത്തിനായി താൻ ബോഡി ബിൽഡിംഗ് നടത്തുകയാണെന്നും താരം പറയുന്നു.
താൻ ഒരുപാട് സ്‌നേഹിക്കുകയും ആരാധിക്കുകയും ചെയ്യുന്ന മമ്മുക്കയ്ക്കൊപ്പം ബിഗ് ബി പാര്‍ട്ട് 2 ബിലാലില്‍ അഭിനയിക്കുന്നുവെന്നാണ് ബാല അറിയിച്ചത്. ഷൂട്ടിംഗിന്‍റെ ഭാഗമായി ബോഡി ബില്‍ഡിംഗ് പരിശീലനം നടക്കുന്നുവെന്നും ബാല ഫേസ്ബുക്ക് വീഡിയോയിൽ പറയുന്നു. അതേ സമയം ബിലാലിൽ താനും അഭിനയിക്കുന്നുണ്ടെന്ന് അറിയിച്ചിരിക്കുകയാണ് മംമ്ത മോഹൻദാസ്.
ഒരു അഭിമുഖത്തിലാണ് മമ്മൂട്ടി സാറിന്‍റെ ബിലാലില്‍ ഞാനുമുണ്ട് അതിന്‍റെ ത്രില്ലിലാണ് എന്ന് മംമ്ത പറഞ്ഞത്. ഉണ്ണി ആർ, ഷറഫ്,സുഹാസ് എന്നിവർ ചേര്‍ന്നാണ് ബിലാലിന്‍റെ തിരക്കഥ രചിച്ചിരിക്കുന്നത്. പതിമൂന്ന് വർഷം മുന്പാണ് ബിഗ് ബി റിലീസ് ചെയ്തത്. സിനിമാട്ടോഗ്രാഫറായ അമൽ നീരദ് ആദ്യമായി സംവിധാനം ചെയ്ത ചിത്രമായിരുന്നു ബിഗ് ബി.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.