നിയോഗങ്ങൾ വിസ്മരിക്കുന്നവർ ദൈവത്തിൽ നിന്നകന്നുപോകുന്നു: റവ റോബിൻ വർഗീസ് : Deepika.com Nri News Americas

ഡാളസ് : ക്രിസ്തുവിനു വേണ്ടി ജീവിതം സമർപ്പിക്കപ്പെട്ടവരാണ് ഓരോരുത്തരുമെന്ന് അവകാശപ്പെടുമ്പോഴും നമ്മിൽ ഭരമേല്പിക്കപെട്ട നിയോഗം എന്താണെന്ന് തിരിച്ചറിയാതെ ആത്മീയ മണ്ഡലത്തിൽ നിന്നും ഒളിച്ചോടുന്നവരാണ് എന്ന യാഥാർഥ്യം വിസ്മരിക്കാവുന്നതല്ലെന്ന് റവ. റോബിൻ വർഗീസ്.

ജൂൺ 16 തിങ്കളാഴ്ച വൈകുന്നേരം 7:30 ന് സൂം വഴി സംഘടിപ്പിച്ച മാർത്തോമ്മാ നോർത്ത് അമേരിക്ക ഭദ്രാസനം സൗത്ത് വെസ്റ്റ് റീജണൽ സന്നദ്ധ സുവിശേഷക സംഘം 'അറ്റ് ദി ക്രോസ്' എന്ന വിഷയത്തിൽ നോഹയുടെ ജീവിതത്തെ ആസ്പദമാക്കി മുഖ്യപ്രഭാഷണം നിർവഹിക്കുകയായിരുന്നു റവ. റോബിൻ വർഗീസ്.

ദൈവത്തിൽ നിന്ന് ഒളിച്ചോടുന്നവർ ശിക്ഷാവിധിയിൽ അകപ്പെടും. ദൈവിക കൽപന ലംഘിച്ചു യാത്ര തിരിച്ച യോനയുടെ ജീവിതത്തിൽ അനുഭവിക്കേണ്ടി വന്ന ദുരന്തവും എന്നാൽ താൻ ചെയ്തു പോയ തെറ്റുകൾ മനസിലാക്കി ദൈവസന്നിധിയിൽ ഏറ്റുപറഞ്ഞ് വീണ്ടും ജീവിതത്തിലേക്ക് മടങ്ങി വരുവാൻ ദൈവം യോനാക്ക് അവസരം നൽകി. വ്യത്യസ്ത ജീവിത അവസ്ഥകളിൽ താൻ എവിടെയായിരുന്നു എന്നുള്ള തിരിച്ചറിവ് വിശ്വാസിക്കുണ്ടാകേണ്ടത് അനിവാര്യമാണെന്നും അദ്ദേഹം പറഞ്ഞു.

സമ്മേളനത്തിൽ ഫാർമേഴ്സ് എംടിസി വികാരി റവ. എബ്രഹാം വി സാംസൺ അധ്യക്ഷത വഹിച്ചു. റവ. ഉമ്മൻപ്രാരംഭ പ്രാർഥന നടത്തി. ഡാളസ് സെഹിയോൻ എംടിസി (പ്ലാനോ)യിലെ മോൻസി വർഗീസ് ഗാനം ആലപിച്ചു. സൗത്ത് വെസ്റ്റ് റീജനൽ സന്നദ്ധ സുവിശേഷക സംഘത്തിന്റെ ട്രഷറർ ഷേർലി സിലാസ് സ്വാഗതം പറഞ്ഞു. ഡാലസ് സെഹിയോൻ എംടിസി (പ്ലാനോ)യിലെ മാത്യു ലൂക്കോസ്, ആലിയമ്മ ഇടിക്കുള എന്നിവർ മധ്യസ്ഥ പ്രാർഥനക്ക് നേതൃത്വം നൽകി.

പാരിഷ് മിഷൻ സെക്രട്ടറിമാരായ റോബി ചേലങ്കരി, സാം അലക്സ്, ഷിർലി സിലാസ് എന്നിവർ സമ്മേളനത്തിന് നേതൃത്വം നൽകി. സൗത്ത് വെസ്റ്റ് റീജനൽ സന്നദ്ധ സുവിശേഷക സംഘത്തിന്റെ വൈസ് പ്രസിഡന്റ് സാം അലക്സ് നന്ദി പറഞ്ഞു. റവ. ജോസഫ് ചാക്കോ സമാപന പ്രാർഥനയും ആശീർവാദവും നിർവഹിച്ചു.