വില കുറച്ചു കാണിച്ചു; പൃഥ്വിരാജിന്റെ കാറിന്റെ രജിസ്ട്രേഷൻ തടഞ്ഞു
Friday, November 8, 2019 1:00 PM IST
നടൻ പൃഥ്വിരാജിന്റെ ഉടമസ്ഥതയിലുള്ള പുതിയ ആഡംബര കാറിന്റെ രജിസ്ട്രേഷൻ തടഞ്ഞു. കാറിന്റെ യഥാർഥ വിലയിൽ നിന്നും 30 ലക്ഷം രൂപ കുറച്ചുകാട്ടി ഡീലർ രജിസ്ട്രേഷന് ശ്രമിച്ചപ്പോഴാണ് മോട്ടോർ വാഹന വകുപ്പ് രജിസ്ട്രേഷൻ തടഞ്ഞത്.
എറണാകുളം ആർടി ഓഫീസിൽ ഓണ്ലൈനായി സമർപ്പിച്ച അപേക്ഷയിൽ കാറിന്റെ വില 1.34 കോടി എന്നാണ് രേഖപ്പെടുത്തിയത്. എന്നാൽ പരിശോധനയിൽ കാറിന്റെ യഥാർഥ വില 1.64 കോടിയാണെന്ന് കണ്ടെത്തുകയായിരുന്നു. തുടർന്നാണ് രജിസ്ട്രേഷൻ തടഞ്ഞത്.
എന്നാൽ സെലിബ്രിറ്റി ഡിസ്കൗണ്ട് ഇനത്തിൽ വില കുറച്ചുവെന്നാണ് ഡീലർ പറയുന്നത്. ഡിസ്കൗണ്ട് നൽകിയാലും ആഡംബര കാറുകൾക്ക് യഥാർഥ വിലയുടെ 21 ശതമാനം നികുതിയായി അടയ്ക്കണമെന്നാണ് നിയമം.
ഇനിയും ഒമ്പത് ലക്ഷം രൂപകൂടി അടയ്ക്കാതെ രജിസ്ട്രേഷൻ നൽകാനാവില്ലെന്നാണ് മോട്ടോർവാഹന വകുപ്പ് വ്യക്തമാക്കുന്നത്. നികുതിയിളവിനായി ഡീലർ ബില്ലിൽ തിരുത്തൽ നടത്തിയത് പൃഥ്വി അറിയണമെന്നില്ലന്നും ഉദ്യോഗസ്ഥർ വ്യക്തമാക്കുന്നു.