അപ്ഡേറ്റഡ് റിട്ടേണുകളുടെ ഫയലിംഗിന് അവസരം : Deepika.com Tax News

അപ്ഡേറ്റഡ് റിട്ടേണുകളുടെ ഫയലിംഗിന് അവസരം

2022ലെ ഫിനാൻസ് ആക്ടിൽ ആദായനികുതി നിയമത്തിൽ അപ്ഡേറ്റഡ് റിട്ടേണുകൾ ഫയൽ ചെയ്യുന്നതിന് അവസരം ഒരുക്കിയിട്ടുണ്ട്. അതിനുവേണ്ടി നികുതിനിയമത്തിൽ 139(8എ) എന്ന വകുപ്പ് കൂട്ടിച്ചേർത്തു. ഇതു 01-04-2022 മുതൽ പ്രാബല്യത്തിൽ വന്നു. റൂൾ 12 എ.സി. അനുസരിച്ച് ഐടിആർയു എന്ന പേരിൽ പുതിയ റിട്ടേണ്‍ ഫോമും നിലവിൽ വന്നു.

പുതിയ നിയമം അനുസരിച്ച് നികുതിദായകർക്ക് അസസ്മെന്‍റ് വർഷം കഴിഞ്ഞ് 24 മാസത്തിനകം അപ്ഡേറ്റഡ് റിട്ടേണുകൾ ഫയൽ ചെയ്യാൻ സാധിക്കും. ഫയൽ ചെയ്ത റിട്ടേണിൽ എന്തെങ്കിലും കുറ്റങ്ങളോ കുറവുകളോ ഉണ്ടെങ്കിൽ അധികനികുതി അടച്ച് അപ്ഡേറ്റഡ് റിട്ടേണുകൾ ഫയൽ ചെയ്യാവുന്നതാണ്.

അപ്ഡേറ്റഡ് റിട്ടേണുകൾ ഫയൽ ചെയ്യുന്നതിന്

സാന്പത്തികവർഷം 2019-20 ലെ റിട്ടേണ്‍ ആണ് അപ്ഡേറ്റഡ് ചെയ്യേണ്ടത് എന്നു കരുതുക. 2019-20 സാന്പത്തികവർഷത്തിന്‍റെ അസസ്മെന്‍റ് വർഷം കഴിയുന്നതു 2021 മാർച്ച് 31 ന് ആണ്. ആ ദിവസം കഴിഞ്ഞ് 24 മാസത്തേക്ക് 2019-20 ലെ റിട്ടേണുകൾ അപ്ഡേറ്റ് ചെയ്ത് ഫയൽ ചെയ്യാൻ അവസരം ഉണ്ട്. അതായത് 2023 മാർച്ച് 31 വരെ പ്രസ്തുത അപ്ഡേറ്റഡ് റിട്ടേണുകൾ ഫയൽ ചെയ്യാൻ സാധിക്കും. പക്ഷേ ഒരു നിബന്ധന ഉണ്ട്.

അസസ്‌മെന്‍റ് വർഷം കഴിഞ്ഞ് 12 മാസത്തിനകം അപ്ഡേറ്റഡ് റിട്ടേണ്‍ ഫയൽ ചെയ്യുകയാണെങ്കിൽ അടയ്ക്കുന്ന നികുതിയുടെയും പലിശയുടെയും ഫീസിന്‍റെയും സർചാർജിന്‍റെയും 25 ശതമാനം അധികനികുതി അടയ്ക്കണം.

12 മാസം കഴിഞ്ഞ് 24 മാസത്തിനകം ആണ് അപ്ഡേറ്റ് ചെയ്യുന്നതെങ്കിൽ പ്രസ്തുത നികുതിയുടെയും പലിശയുടെയും ഫീസിന്‍റെയും 50ശതമാനം വരുന്ന തുക അധിക നികുതി ആയി അടയ്ക്കണം. ഒരു നികുതിദായകന് ഒരു വർഷത്തേക്ക് ഒരു അപ്ഡേറ്റഡ് റിട്ടേണ്‍ മാത്രമേ ഫയൽ ചെയ്യുവാൻ സാധിക്കുകയുള്ളൂ.

അതായത് 2019-20 സാന്പത്തിക വർഷത്തിലെ ആണ് റിട്ടേണ്‍ അപ്ഡേറ്റ് ചെയ്ത് ഇപ്പോൾ ഫയൽ ചെയ്യുന്നതെങ്കിൽ അസസ്‌മെന്‍റ് വർഷം കഴിഞ്ഞ് 12 മാസം കഴിഞ്ഞതിനാൽ യഥാർഥ നികുതിയും പലിശയും ഫീസും സർചാർജും കണക്ക് കൂട്ടിയതിനുശേഷം അതിന്‍റെ 50% വരുന്ന തുക അധികനികുതി അടച്ചുവേണം 2023 മാർച്ച് 31 വരെ ഫയൽ ചെയ്യാവുന്നത്.

എന്നാൽ ഇത് 2020-21 സാന്പത്തികവർഷത്തിലെ റിട്ടേണ്‍ ആണെങ്കിൽ പ്രസ്തുത തുകയുടെ 25% മാത്രം അധികനികുതി അല്ലെങ്കിൽ പലിശയായി അടച്ച് 2023 മാർച്ച് 31 വരെ ഫയൽ ചെയ്യാവുന്നതാണ്. യഥാർത്ഥ നികുതി കണക്കാക്കുന്പോൾ ടിഡിഎസ് പിടിച്ചതും മുൻകൂർ നികുതി അടച്ചതും ഒക്കെ പരിഗണിക്കണം.

ഐടിആർയു ഫയൽ ചെയ്യുന്പോൾ

ഐടിആർ-യു ഫയൽ ചെയ്യുന്പോൾ നികുതിദായകൻ ഓരോ ഹെഡിലും ഉണ്ടായ അധികവരുമാനം മാത്രം സൂചിപ്പിച്ച് നികുതി അടച്ചാൽ മതി. സാധാരണ ടാക്സ് റിട്ടേണ്‍ ഫയൽ ചെയ്യുന്ന സമയത്ത് കാണിക്കുന്നതുപോലെ വിശദീകരണങ്ങൾ ഒന്നും ആവശ്യമില്ല. കൂടാതെ അപ്ഡേറ്റഡ് റിട്ടേണ്‍ ഫയൽ ചെയ്യേണ്ടിവന്ന ആവശ്യകതയെപ്പറ്റിയും സൂചിപ്പിക്കണം. നികുതി അടച്ച ചെല്ലാന്‍റെ വിവരങ്ങളും റിട്ടേണിനൊപ്പം സൂചിപ്പിക്കണം.

അപ്ഡേറ്റഡ് റിട്ടേണിന്‍റെ വെരിഫിക്കേഷൻ

ടാക്സ് ഓഡിറ്റ് ഉള്ള കേസുകളിൽ ഡിജിറ്റൽ സിഗ്നേച്ചർ ഉപയോഗിച്ചുവേണം അപ്ഡേറ്റഡ് റിട്ടേണുകൾ വെരിഫൈ ചെയ്യേണ്ടത്. ടാക്സ് ഓഡിറ്റ് ഇല്ലാത്ത കേസുകളിൽ ഇലക്‌ട്രോണിക് വെരിഫിക്കേഷൻ കോഡ് ഉപയോഗിച്ച് വെരിഫൈ ചെയ്യാവുന്നതാണ്. എന്നാൽ അക്നോളജ്മെന്‍റ് ബാംഗ്ലൂർക്ക് അയച്ചുകൊടുത്ത് വെരിഫൈ ചെയ്യുന്ന രീതി അപ്ഡേറ്റഡ് റിട്ടേണുകൾക്ക് ബാധകമല്ല. സാധാരണ റിട്ടേണുകൾ കൂടാതെയാണ് അപ്ഡേറ്റഡ് റിട്ടേണുകൾ.

നിലവിൽ നിർദിഷ്ട സമയത്ത് ഫയൽ ചെയ്യുന്ന 139(1) വകുപ്പനുസരിച്ചുള്ള ഒറിജിനൽ റിട്ടേണുകൾ, 139(4) അനുസരിച്ച് താമസിച്ചു ഫയൽ ചെയ്യുന്ന ബിലേറ്റഡ് റിട്ടേണുകൾ, 139 (5) അനുസരിച്ച് ഫയൽ ചെയ്യുന്ന റിവൈസ്ഡ് റിട്ടേണുകൾ എന്നിവ കൂടാതെ ആണ് അതിന് ശേഷം 139 (8എ) അനുസരിച്ച് അപ്ഡേറ്റഡ് റിട്ടേണുകൾ ഫയൽ ചെയ്യാവുന്നത്.

ആദ്യത്തെ 3 റിട്ടേണുകൾ ഫയൽ ചെയ്യാവുന്ന സമയത്ത് അപ്ഡേറ്റഡ് റിട്ടേണുകൾ ഫയൽ ചെയ്യാൻ സാധ്യമല്ല. അതുപോലെ തന്നെ അപ്ഡേറ്റഡ് റിട്ടേണുകൾ ഫയൽ ചെയ്യുവാൻ സാധിക്കുന്ന പീരിയഡിൽ ആദ്യത്തെ 3 റിട്ടേണുകളും ഫയൽ ചെയ്യുവാനും സാധിക്കില്ല. ആദ്യത്തെ അപ്ഡേറ്റഡ് റിട്ടേണുകൾ വരുന്നത് 2019-20 സാന്പത്തികവർഷത്തിൽ മാത്രമാണ്.

ടാക്സ് ബാധ്യത കുറയ്ക്കുവാനോ റീഫണ്ട് നേടുവാനോ സാധിക്കില്ല

നികുതി ബാധ്യത കുറയ്ക്കുവാനോ റീഫണ്ട് തുക വർധിപ്പിക്കുവാനോ അപ്ഡേറ്റഡ് റിട്ടേണുകൾ ഫയൽ ചെയ്യുവാൻ സാധ്യമല്ല. ചുരുക്കിപ്പറഞ്ഞാൽ നികുതിവകുപ്പിന് ബെനഫിറ്റ് കിട്ടുന്ന കാര്യമാണെങ്കിൽ മാത്രമേ അപ്ഡേറ്റഡ് റിട്ടേണുകൾ ഫയൽ ചെയ്യുവാൻ സാധിക്കുകയുള്ളൂ. നികുതിദായകന് പ്രയോജനം ലഭിക്കുന്ന റീഫണ്ട് വർദ്ധിപ്പിക്കുക, നഷ്ടം ക്യാരിഫോർവേർഡ് ചെയ്യുക മുതലായവ അപ്ഡേറ്റഡ് റിട്ടേണുകൾകൊണ്ട് സാധിക്കില്ല.

നികുതിദായകർക്ക് ഏതെങ്കിലും വരുമാനം നികുതി അടയ്ക്കുന്നതിൽ നിന്ന് വിട്ടുപോയി എന്ന് പിന്നീട് മനസിലായ സാഹചര്യത്തിലോ അല്ലെങ്കിൽ, അർഹത ഇല്ലാത്ത ക്യാരിഫോർവേർഡ് ക്ലെയിം ചെയ്തിട്ടുണ്ടെങ്കിൽ തിരുത്തുന്നതിനോ ഉള്ള അവസരമായി അപ്ഡേറ്റഡ് റിട്ടേണ്‍ ഫയലിംഗിനെ കാണാവുന്നതാണ്.