രാമായണ പാരായണം എന്തിന് ‍?

"അദ്ധ്യാത്മരാമായണമിദമെത്രയു-
മത്ത്യുത്തമോത്തമം മ്യത്യുഞ്ജയപ്രോക്തം
അദ്ധ്യയനം ചെയ്കിൽ മർത്ത്യനു ജൻമനാ-
മുക്തി സിദ്ധിക്കുമതിനില്ല സംശയം'

രാമായണ പാരായണത്തിലെ മഹത്വം മേൽവരികളിൽ നിന്നും നമുക്ക് മനസിലാക്കാൻ സാധിക്കുന്നു.

രാവണകോട്ട തകർത്ത്, രാവണവധം ചെയ്ത് വിഭീഷണനെ ചക്രവർത്തിയായി വാഴിച്ച്, തന്‍റെ പട്ടാഭിഷേകവും കഴിഞ്ഞ് രാമന്‍റെ കഥ സാധാരണ മനസുകളിൽ എന്ത് പരിവർത്തനം ഉണ്ടാക്കി എന്ന് ചിന്തിക്കാം നമുക്ക്. ധർമിഷ്ഠനായ രാമന്‍റെ കഥ തലമുറകളായി പാടിക്കൊണ്ടിരിക്കുന്നു. ഇനിയും തുടർന്നു കൊണ്ടേയിരിക്കും.വാല്മീകിയുടെ സ്വന്തം വാക്കുകൾ തന്നെ നമുക്ക് പരിശോധിക്കാം.

"യാവത് സ്ഥ്യാസന്തഗിരിയ:
സരിതശ്ചമഹീതലേ
നാവത് രാമായണ കഥാ
ലോകേഷു പ്രചരിഷ്യതി'

ആദികവിയുടെ ദൃഢമാർന്ന പ്രവചനം. ലോകത്തിൽ മലകളും നദികളും ഏതുവരെ നിലനിൽക്കുന്നുവോ അതുവരെ രാമായണ കഥ ലോകത്തിൽ പ്രചരിച്ചുകൊണ്ടേയിരിക്കും.

ധർമിഷ്ഠനായ രാമന്‍റെ കഥ തലമുറകളായി ഏറ്റുപാടുന്നു. രാമന്‍റെ ഓരോ പ്രവൃത്തിയും മനസിനെ ശുദ്ധമാക്കാൻ സഹായിക്കുന്നു. വെറുപ്പും വിദ്വേഷവും മാറ്റി സ്നേഹമുള്ളൊരു തലമുറയ്ക്ക് മനസിൽ സ്ഥാനമുണ്ടാകുന്നു. പരമാത്മശക്തിയോട് അടുപ്പം ഉണ്ടാകുന്നു. ദുഃഖങ്ങളെ നേരിടാനും പരസ്പര സ്നേഹത്തിനും ശക്തിയുണ്ടാക്കിത്തരുന്നു.

ഇന്നത്തെ സമൂഹം നേരിടുന്ന, എല്ലാറ്റിലും നിന്നുള്ള ഒളിച്ചോട്ടത്തിൽ നിന്നും പിൻതിരിയാനുള്ള ശക്തി പകർന്നു ലഭിക്കുന്നു. പ്രശ്നങ്ങളെ സധൈര്യം നേരിടാനുള്ള കരുത്ത് ലഭിക്കുന്നു. കർമഫലങ്ങൾ തേടിയെത്തും എന്ന തിരിച്ചറിവ് തന്നെയാണ് രാമായണ പാരായണത്തിലെ ഏറ്റവും വലിയ പാഠം. മനസിന്‍റെ നിയന്ത്രണം പരമാത്മാവാണെന്ന തിരിച്ചറിവ് ആരോഗ്യത്തോടെയുള്ള മനസും ശരീരവും നേടിത്തരുന്നു. ആഗ്രഹങ്ങൾക്ക് അറുതിയുണ്ടാകുന്നു. അനാവശ്യ ഭയങ്ങൾ നീങ്ങുന്നു. സജ്ജനസംഗമം ഉണ്ടാകുന്നു.

ചുരുക്കത്തിൽ നമ്മെ നിയന്ത്രിക്കേണ്ടത് ഇന്ദ്രിയങ്ങളല്ല പരമാത്മാവാണെന്ന ബോധം ഉണ്ടാക്കുന്നു. അതുതന്നെയാണ് രാമായണ പാരായണത്തിന്‍റെ ആത്യന്തിക ലക്ഷ്യം. പരമാത്മാവിനെ അനന്യഭക്തിയോടെ ശരീരക്ഷേത്രത്തിൽ പ്രതിഷ്ഠിച്ചാൽ ഒന്നുകൊണ്ടും ഭയമോ ദുഃഖമോ ഉണ്ടാകില്ല.

സി.കെ. ഗോപാലകൃഷ്ണൻ മാസ്റ്റർ

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.