നാല് ആയുർവേദ കോളജുകളിൽ പുതിയ പിജി കോഴ്സുകൾ അനുവദിച്ചു
തൃശൂർ: സംസ്ഥാനത്തെ നാല് ആയുർവേദ കോളജുകളിൽ പുതിയതായി രണ്ടു ബിരുദാനന്തര ബിരുദ കോഴ്സുകൾ വീതം മൊത്തം മുപ്പതു സീറ്റുകൾ ആരംഭിക്കുന്നതിനു ആരോഗ്യശാസ്ത്ര സർവകലാശാല അനുമതി നൽകി.
തൃപ്പുണിത്തുറ ഗവൺമെന്റ് ആയുർവേദ കോളജിൽ പ്രസൂതിതന്ത്രം, കായചികിത്സാ വിഭാഗങ്ങളിൽ നാലു സീറ്റു വീതവും, കോട്ടയ്ക്കൽ വൈദ്യരത്നം പി.എസ്. വാരിയർ ആയുർവേദ കോളജിൽ ശല്യതന്ത്രം, ബേസിക് പ്രിൻസിപ്പൽ വിഭാഗങ്ങളിൽ മൂന്നു സീറ്റുവീതവും, പുത്തൂർ ശ്രീനാരായണ ഇൻസ്റ്റിറ്റ്യൂട്ട് ഓഫ് ആയുർവേദിക് സ്റ്റഡീസ് ആൻഡ് റിസർച്ചിൽ കായചികിത്സാ, ശല്യതന്ത്രം വിഭാഗങ്ങളിൽ അഞ്ചു സീറ്റുവീതവും, ഷൊർണൂർ പിഎൻഎൻഎം ആയുർവേദ മെഡിക്കൽ കോളജിലെ പ്രസൂതിതന്ത്രം, കായചികിത്സാ വിഭാഗങ്ങളിൽ മൂന്നു സീറ്റു വീതവും ആരംഭിക്കുന്നതിനാണ് സെൻട്രൽ കൗണ്സിൽ ഓഫ് ഇന്ത്യൻ മെഡിസിന്റെ അംഗീകാരത്തോടെ ആരോഗ്യ സർവകലാശാല അനുമതി നല്കിയത്.
പരീക്ഷാ അപേക്ഷ
2017 ഡിസംബർ 11 മുതലാരംഭിക്കുന്ന രണ്ടാംവർഷ ഫാം ഡി പോസ്റ്റ് ബാക്കുലറേറ്റ് ഡിഗ്രി സപ്ലിമെന്ററി പരീക്ഷയ്ക്ക് 2017 നവംബർ 13 മുതൽ 20 വരെ ഓണ്ലൈനായി രജിസ്റ്റർ ചെയ്യാം. പേപ്പറൊന്നിനു 100 രൂപ ഫൈനോടുകൂടി നവംബർ 21 വരെയും, 300 രൂപ സൂപ്പർ ഫൈനോടുകൂടി നവംബർ 22 വരെയും ഓണ്ലൈൻ രജിസ്ട്രേഷൻ നടത്താം.
2017 ഡിസംബർ എട്ടു മുതലാരംഭിക്കുന്ന മൂന്നാംവർഷ ഫാം ഡി ഡിഗ്രി സപ്ലിമെന്ററി പരീക്ഷയ്ക്ക് നവംബർ എട്ടുമുതൽ 18 വരെ ഓണ്ലൈനായി രജിസ്റ്റർ ചെയ്യാം. പേപ്പറൊന്നിനു 100 രൂപ ഫൈനോടുകൂടി നവംബർ 20 വരെയും, 300 രൂപ സൂപ്പർഫൈനോടുകൂടി നവംബർ 21 വരെയും ഓണ്ലൈൻ രജിസ്ട്രേഷൻ നടത്താം.
പ്രാക്ടിക്കൽ പരീക്ഷാ തീയതി
2017 നവംബർ 14 മുതലാരംഭിക്കുന്ന ഒന്നാംവർഷ എംഎസ്സി നഴ്സിംഗ് ഡിഗ്രി റെഗുലർ/സപ്ലിമെന്ററി പ്രാക്ടിക്കൽ പരീക്ഷാ ടൈംടേബിൾ പ്രസിദ്ധീകരിച്ചു.