സഫലമായതു സഭയുടെ പ്രാർഥനകളും പ്രയത്നങ്ങളും

കൊച്ചി: മലയാളിയായ സലേഷ്യൻ വൈദികൻ യമനിൽ ബന്ദിയാക്കപ്പെട്ടതറിഞ്ഞ നാൾ മുതൽ ഒന്നര വർഷക്കാലം പ്രാർഥനകളും പ്രയത്നങ്ങളുമായി കാത്തിരുന്ന കത്തോലിക്കാസഭയ്ക്ക് ആഹ്ലാദനിമിഷങ്ങൾ. കുടുംബങ്ങളിൽ മുതൽ സഭാതലങ്ങളിൽ വരെ കഴിഞ്ഞ ഒന്നര വർഷത്തിനിടെ ഫാ. ടോം ഉഴുന്നാലിലിനായി പ്രാർഥനാദിനാചരണങ്ങളും അനുബന്ധ പരിപാടികളും നടന്നു.

സീറോ മലബാർ സഭയിൽ ദേവാലയങ്ങളിലും സന്യാസഭവനങ്ങളിലും അർപ്പിച്ച ദിവ്യബലികളിൽ ഫാ. ഉഴുന്നാലിലിന്‍റെ മോചനം നിയോഗമാക്കി പ്രത്യേക പ്രാർഥനകൾ ഉണ്ടായിരുന്നു.

ജനുവരി 12നു സഭയുടെ സിനഡിലെ 57 മെത്രാന്മാർ എറണാകുളം സെന്‍റ് മേരീസ് കത്തീഡ്രൽ ബസിലിക്കയിൽ ഒരുമിച്ചുകൂടി പ്രത്യേക പ്രാർഥനാശുശ്രൂഷ നടത്തി. തലശേരി ആർച്ച്ബിഷപ് മാർ ജോർജ് ഞെരളക്കാട്ടാണു പ്രാർഥന നയിച്ചത്. ആർച്ച്ബിഷപ്പുമാരായ മാർ ആൻഡ്രൂസ് താഴത്ത്, മാർ മാത്യു മൂലക്കാട്ട്, മാർ ജോസഫ് പെരുന്തോട്ടം, മാർ ജോർജ് വലിയമറ്റം, മാർ ജേക്കബ് തൂങ്കുഴി, മാർ കുര്യാക്കോസ് ഭരണികുളങ്ങര എന്നിവരുൾപ്പെടെ 57 മെത്രാന്മാർ മേജർ ആർച്ച്ബിഷപ് കർദിനാൾ മാർ ജോർജ് ആലഞ്ചേരിക്കൊപ്പം പ്രാർഥനയിൽ പങ്കെടുത്തു.

സിബിസിഐ പ്രസിഡന്‍റ് കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവ, സീറോ മലബാർ സഭയുടെ മേജർ ആർച്ച്ബിഷപ് കർദിനാൾ മാർ ജോർജ് ആലഞ്ചേരി എന്നിവരുടെ നേതൃത്വത്തിൽ മെത്രാൻ സംഘം പ്രധാനമന്ത്രിയെയും വിദേശകാര്യ മന്ത്രിയെയും സന്ദർശിച്ചു ഫാ. ടോം ഉഴുന്നാലിലിന്‍റെ മോചനം വേഗത്തിലാക്കണമെന്ന് ആവശ്യപ്പെട്ടിരുന്നു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.