ജോലിക്ക് അർഹതയുണ്ട് : Deepika.com Tax News

Services & Questions

ജോലിക്ക് അർഹതയുണ്ട്

വില്ലേജ് ഓഫീസിൽ പാർട്ട്ടൈം സ്വീപ്പറായി ജോലി ചെയ്തുവരവേ ഏപ്രിൽ 10ന് ഞങ്ങളുടെ അമ്മ മരിച്ചു. മരിക്കുന്ന സമയത്ത് 68 വയസായിരുന്നു പ്രായം. ഞങ്ങളുടെ അച്ഛൻ 10 വർഷം മുന്പ് മരിച്ചതാണ്. 32ഉം 24ഉം വയസുള്ള രണ്ട് ആണ്‍മക്കളാണ് ആശ്രിതരായുള്ളത്. മുപ്പത്തിരണ്ടുകാരനായ മൂത്ത ആൾ വികലാംഗനാണ്. ഞങ്ങൾ രണ്ടുപേരും അമ്മയെ ആശ്രയിച്ചാണ് കഴിഞ്ഞിരുന്നത്. ഞങ്ങൾ രണ്ടുപേരും എസ്എസ്എൽസി പാസായിട്ടുണ്ട്. തൊഴിൽരഹിതരായ ഞങ്ങൾക്ക് ഫാമിലി പെൻഷൻ, ആശ്രിത നിയമനപ്രകാരം ജോലി എന്നിവയ്ക്ക് അർഹതയില്ലേ?
വി.കെ. സതീശൻ, തൊടുപുഴ

സർവീസിലിരുന്നു മരണമടഞ്ഞ ജീവനക്കാരന്‍റെ അല്ലെങ്കിൽ ജീവനക്കാരിയുടെ ആശ്രിതർക്ക് ആശ്രിത നിയമനപ്രകാരം യോഗ്യതയുടെ അടിസ്ഥാനത്തിൽ ജോലിക്ക് അർഹതയുണ്ട്. രണ്ടുപേരിൽ ഒരാൾക്ക് ഓഫീസ് അറ്റൻഡന്‍റ്, ക്ലർക്ക് എന്നിവയിൽ ഏതെങ്കിലും തസ്തികയിൽ നിയമനത്തിന് അർഹതയുണ്ട്. ഫാമിലി പെൻഷനു 25 വയസിൽ താഴെ പ്രായമുള്ള അവിവാഹിതരായ മക്കൾക്ക് അർഹതയുണ്ട്. 25 വയസുവരെയേ ഫാമിലി പെൻഷന് അർഹതയുള്ളൂ. 40 ശതമാനത്തിൽ അധികം വികലാംഗരായ മക്കൾക്ക് അവിവാഹിതരായി തുടർന്നാൽ ആജീവനാന്തം ഫാമിലി പെൻഷന് അർഹതയുണ്ട്. രണ്ടു മക്കളുടേയും യോജിച്ചുള്ള തീരുമാനത്തിന്‍റെ അടിസ്ഥാനത്തിലാണ് ഇതു ലഭിക്കുക. വിദ്യാഭ്യാസ യോഗ്യത തെളിയിക്കുന്ന സർട്ടിഫിക്കറ്റ്, പ്രായം തെളിയിക്കുന്നതിനുള്ള സർട്ടിഫിക്കറ്റ്, അവകാശികളും ആശ്രിതരുമായിരുന്നു എന്നു തെളിയിക്കുന്ന സർട്ടിഫിക്കറ്റ് എന്നിവ ഈ രണ്ടു കാര്യങ്ങൾക്കും ആവശ്യമാണ്. അവസാനം ജോലി ചെയ്തിരുന്ന ഓഫീസുമായി ബന്ധപ്പെട്ട് തീരുമാനം എടുക്കുക.