സർക്കാരിന്‍റെ പ്രത്യേക ഉത്തരവ് നേടേണ്ടിവരും : Deepika.com Tax News

Services & Questions

സർക്കാരിന്‍റെ പ്രത്യേക ഉത്തരവ് നേടേണ്ടിവരും

ഗവ. സ്കൂളിൽ പാർട്ട് ടൈം സ്വീപ്പറായി ജോലിയിൽ പ്രവേശിച്ചു. 11 വർഷം കഴിഞ്ഞപ്പോൾ പ്യൂണായി പ്രമോഷൻ ലഭിച്ചു. ഏകദേശം നാലു വർഷത്തിലധികം ഈ ജോലിയിൽ തുടർന്നു. എന്‍റെ അമ്മ സ്റ്റേറ്റ് ബാങ്കിലെ പാർട്ട്ടൈം സ്വീപ്പറായിരുന്നു. അമ്മ പെട്ടെന്ന് മരണപ്പെട്ടപ്പോൾ എനിക്ക് ബാങ്കിലെ സ്വീപ്പറുടെ ജോലി തന്നു. പ്യൂണിന്‍റെ ശന്പളത്തേക്കാൾ കൂടുതൽ ശന്പളം ലഭിച്ചതുകൊണ്ട് ഞാൻ ബാങ്കിലെ ജോലി സ്വീകരിച്ചു. എട്ടു വർഷത്തെ ബാങ്കിലെ ജോലിക്കിടെയുണ്ടായ ഒരു സാന്പത്തിക പ്രശ്നം മൂലം എന്നെ ബാങ്കിൽനിന്നു പിരിച്ചുവിട്ടു. പിന്നീട് ജോലി ലഭിച്ചില്ല. എനിക്കിപ്പോൾ 70 വയസുണ്ട്. മുന്പ് സ്കൂളിൽ ജോലി ചെയ്തതിന്‍റെ അടിസ്ഥാനത്തിൽ എനിക്ക് പെൻഷന് അർഹതയുണ്ടോ? ഇതു സംബന്ധിച്ച് ആർക്കാണ് അപേക്ഷ നൽകേണ്ടത്?
എം. രാമചന്ദ്രൻ, കുറവിലങ്ങാട്

താങ്കൾ സ്കൂളിലെ ജോലി ഉപേക്ഷിച്ചുപോയത് ഏതു രീതിയിലാണെന്ന് വ്യക്തമല്ല. രേഖാമൂലമുള്ള അനുമതി കൂടാതെയാണ് ജോലി ഉപേക്ഷിച്ചതെന്നു കരുതുന്നു. അതുപോലെ ജോലി രാജിവച്ചുപോയാലും പെൻഷൻ ലഭിക്കാൻ അർഹതയില്ല. ജോലിയിൽനിന്ന് അറിയിപ്പോടെ റിലീവ് ചെയ്തുപോയതായിരുന്നുവെങ്കിൽ മറ്റേതെങ്കിലും തരത്തിലുള്ള മാർഗങ്ങൾ സ്വീകരിക്കാമായിരുന്നു. ഇപ്പോഴത്തെ പ്രത്യേക സാഹചര്യത്തിൽ വിശദമായ വിവരം കാണിച്ചുകൊണ്ട് സർക്കാരിലേക്ക് അപേക്ഷ സമർപ്പിക്കുക. സർക്കാരിന്‍റെ പ്രത്യേക ഉത്തരവ് മുഖേന മാത്രമേ ഏതെങ്കിലും തരത്തിലുള്ള പെൻഷന് അർഹത ലഭിക്കുകയുള്ളൂ.