ആരോഗ്യ സർവകലാശാല പരീക്ഷാ മൂല്യനിർണയം ഡിജിറ്റൽ സംവിധാനത്തിലേക്ക്
തൃശൂർ: കേരള ആരോഗ്യശാസ്ത്ര സർവകലാശാല മെഡിക്കൽ ബിരുദാനന്തര ബിരുദ തിയറി പരീക്ഷ മൂല്യനിർണയം ഡിജിറ്റൽ സംവിധാനത്തിലേക്ക്. പരീക്ഷകൾ നടക്കുന്ന 255 കേന്ദ്രങ്ങളിലേക്ക് ഉത്തരപുസ്തകങ്ങൾ അയച്ചുകൊടുത്ത് അവ ഡിജിറ്റൽ സംവിധാനങ്ങൾ ഉപയോഗപ്പെടുത്തി മൂല്യനിർണയഫലം ലഭ്യമാക്കുന്ന സംവിധാനമാണ് നടപ്പിലാക്കുന്നത്.
കോവിഡ് വെല്ലുവിളിയുടെ സാഹചര്യത്തിൽ ആവശ്യമായ മെഡിക്കൽ ബിരുദാനന്തര ബിരുദധാരികളെ താമസം കൂടാതെ കേരളസമൂഹത്തിലേക്കു ലഭ്യമാക്കുക എന്ന ലക്ഷ്യം മുൻനിർത്തിയാണ് സർവകലാശാല ഈ സാങ്കേതിക വിദ്യ ആവിഷ്കരിച്ചു നടപ്പിലാക്കുന്നത്. ഇതിനുവേണ്ടിയുള്ള സോഫ്റ്റ്വെയർ സർവകലാശാല സ്വന്തമായാണ് വികസിപ്പിച്ചെടുത്തത്.
വൈസ് ചാൻസിലർ ഡോ. മോഹനൻ കുന്നുമ്മൽ പരിശീലന പരിപാടിയുടെ ഉദ്ഘാടനം നിർവഹിച്ചു. സംരംഭത്തിൽ എല്ലാ അധ്യാപകരുടെയും സഹകരണം വൈസ് ചാൻസലർ അഭ്യർത്ഥിച്ചു. പരിശീലന പരിപാടിയിൽ പ്രോ വൈസ് ചാൻസലർ ഡോ. സി.പി. വിജയൻ, രജിസ്ട്രാർ ഡോ. എ.കെ മനോജ് കുമാർ, പരീക്ഷാ കണ്ട്രോളർ ഡോ. എസ്. അനിൽകുമാർ തുടങ്ങിയവർ പങ്കെടുത്തു.