റാഗിംഗ്: ഉടന്‍ തീരുമാനം വേണമെന്നു ഹൈക്കോടതി
Friday, March 28, 2025 3:15 AM IST
കൊച്ചി: കലാലയങ്ങളിലെ റാഗിംഗ് തടയുന്നതിന്‍റെ ഭാഗമായി സര്‍ക്കാര്‍ കര്‍മസമിതി രൂപീകരിച്ച് തുടര്‍നടപടികള്‍ സംബന്ധിച്ച് ഉടന്‍ തീരുമാനമെടുക്കണമെന്ന് ഹൈക്കോടതി.
സര്‍ക്കാര്‍തലത്തില്‍ നടപടികള്‍ സ്വീകരിക്കാനായി ആഭ്യന്തര അഡീ. ചീഫ് സെക്രട്ടറി ചെയര്‍മാനായി കര്‍മസമിതി രൂപീകരിച്ചതായി സര്‍ക്കാര്‍ അറിയിച്ചതിനെത്തുടര്‍ന്നാണ് ചീഫ് ജസ്റ്റീസ് നിധിന്‍ ജാംദാര്‍, ജസ്റ്റീസ് സി. ജയചന്ദ്രന്‍ എന്നിവരടങ്ങുന്ന ഡിവിഷന്‍ ബെഞ്ചിന്‍റെ നിര്‍ദേശം.
സംസ്ഥാനത്ത് റാഗിംഗ് വിരുദ്ധ നിയമങ്ങള്‍ കര്‍ശനമായി നടപ്പാക്കണമെന്നാവശ്യപ്പെട്ട് കേരള ലീഗല്‍ സര്‍വീസസ് അഥോറിറ്റി (കെല്‍സ) നല്‍കിയ പൊതുതാത്പര്യ ഹര്‍ജിയിലാണു നിര്‍ദേശം. ഉന്നതവിദ്യാഭ്യാസ, ആരോഗ്യക്ഷേമ പ്രിന്‍സിപ്പല്‍ സെക്രട്ടറിമാര്‍, സാമൂഹിക സുരക്ഷാ സെക്രട്ടറി, ലോ സെക്രട്ടറി, ആഭ്യന്തര വകുപ്പ് എഎസ്ഡിഎസ്, സംസ്ഥാന പോലീസ് മേധാവിയുടെ പ്രതിനിധി, ഉന്നതവിദ്യാഭ്യാസ കൗണ്‍സില്‍ മെംബര്‍ സെക്രട്ടറി പ്രഫ. രാജന്‍ വര്‍ഗീസ്, നുവാല്‍സ് മുന്‍ വൈസ് ചാന്‍സലര്‍ ഡോ. എന്‍.കെ. ജയകുമാര്‍, കേരള സര്‍വകലാശാല രജിസ്ട്രാര്‍ പ്രഫ. കെ.എസ്. അനില്‍കുമാര്‍, കാലിക്കട്ട് സര്‍വകലാശാല സൈക്കോളജി വകുപ്പിലെ പ്രഫസര്‍ പി.എ. ബേബി ശാരി, തിരുവനന്തപുരം മെഡിക്കല്‍ കോളജ് മനോരോഗ വിഭാഗം പ്രഫസര്‍ അരുണ്‍ പി. നായര്‍, കണ്ണൂര്‍ സര്‍വകലാശാല റിട്ട. സെക്‌ഷന്‍ ഓഫീസര്‍ വൈ. വിനോദ് കുമാര്‍ എന്നിവരാണു സമിതിയിലെ അംഗങ്ങള്‍.