എടത്വ പള്ളിയില് പ്രധാന തിരുനാള് ഇന്ന്; എട്ടാമിടം 14ന്
Wednesday, May 7, 2025 2:08 AM IST
എടത്വ: ചരിത്ര പ്രസിദ്ധമായ എടത്വ സെന്റ് ജോര്ജ് ഫൊറോന പള്ളിയില് വിശുദ്ധ ഗീവര്ഗീസ് സഹദായുടെ പ്രധാന തിരുനാള് പ്രദക്ഷിണം ഇന്ന് നടക്കും. പുലര്ച്ചെ 4.30ന് തിരുക്കര്മങ്ങള് ആരംഭിക്കും.
5.45ന് ചങ്ങനാശേരി ആര്ച്ച്ബിഷപ് എമിരിറ്റസ് മാര് ജോസഫ് പെരുന്തോട്ടത്തിന്റെ കാര്മികത്വത്തില് സപ്രാ, മധ്യസ്ഥ പ്രാര്ഥന, ലദീഞ്ഞ്, വിശുദ്ധ കുര്ബാന. 4.30, 7.30, ഒന്പത്, 10.30, 12, 1.30 എന്നീ സമയങ്ങളില് തമിഴിലും മലയാളത്തിലുമുള്ള കുര്ബാനകള്ക്ക് ശേഷം ഉച്ചകഴിഞ്ഞ് മൂന്നിന് തൂത്തുക്കുടി ബിഷപ് ഡോ. സ്റ്റീഫന് ആന്റണി പിള്ളൈയുടെ മുഖ്യകാര്മികത്വത്തില് ആഘോഷമായ തമിഴ് വിശുദ്ധ കുര്ബാനയ്ക്ക് ശേഷം നാലിന് പ്രസിദ്ധമായ തിരുനാള് പ്രദക്ഷിണം നടക്കും. ഫാ. ആന്ഡ്രൂസ് കുന്നത്ത് കാര്മികത്വം വഹിക്കും.
കന്യാകുമാരി ചിന്നമുട്ടം തുറക്കാരാണ് വിശുദ്ധ ഗീവര്ഗീസിന്റെ തിരുസ്വരൂപം വഹിക്കുന്നത്. ആയിരക്കണക്കിന് വിശ്വാസികള് അകമ്പടി സേവിക്കും.
പ്രദക്ഷിണത്തിന് ശേഷം അവകാശ നേര്ച്ചകളായ ഉപ്പ്, മുളക്, മലര്, വലയില് ചേര്ക്കാനുള്ള തലനൂല് എന്നിവ വികാരി ഫാ. ഫിലിപ്പ് വൈക്കത്തുകാരനില്നിന്ന് സ്വീകരിച്ചാണ് ചിന്നമുട്ടം തുറക്കാര് മടങ്ങുന്നത്.
കൊടിയേറ്റ് ദിനം മുതല് പള്ളിയും പരിസര പ്രദേശങ്ങളിലും വിശ്വാസികള് തമ്പടിച്ചു വരുകയായിരുന്നു. തദ്ദേശിയരും തമിഴ്നാട്ടുകാരും മാത്രമല്ല കര്ണാടക, ആന്ധ്ര, മുബൈ, ശ്രീലങ്ക എന്നിവിടങ്ങളില്നിന്നു നിരവധി വിശ്വാസികള് എടത്വ പള്ളിയില് എത്തുന്നുണ്ട്. പ്രധാന തിരുനാള് പ്രദക്ഷിണം കഴിയുന്നതോടെ ഇടവക വിശ്വാസികളുടെ തിരുനാള് ആരംഭിക്കും. 14ന് എട്ടാമിടത്തോടെ തിരുനാള് സമാപിക്കും.