2022ന്‍റെ രഹസ്യം
ആ​ന​ത്താ​വ​ള​ത്തി​ന് അ​ടു​ത്തു​കൂ​ടി ന​ട​ന്നു​പോ​യ വ​ഴി​പോ​ക്ക​ന് ഒ​രു സം​ശ​യം. ആ​ന​ക​ളൊ​ന്നും കൂ​ട്ടി​ല​ല്ല. കാ​ലി​ൽ വ​ലി​യ ച​ങ്ങ​ല​ക​ളു​മി​ല്ല. എ​ന്നി​ട്ടും അ​വ താ​വ​ള​ത്തി​ൽ​നി​ന്നു പു​റ​ത്തു​പോ​കാ​തെ അ​നു​സ​ര​ണ​യോ​ടെ പാ​പ്പാ​ന്മാരു​ടെ ആ​ജ്ഞ​ക​ള​നു​സ​രി​ച്ച് പെ​രു​മാ​റു​ന്നു.

അ​വ​യു​ടെ കാ​ലു​ക​ളി​ൽ ഉ​ള്ള​ത് ചെ​റി​യൊ​രു ക​യ​ർ മാ​ത്രം. ഇ​ത്ര​യും വലിയ ആ​ന​ക​ൾ ഒ​ന്നു ശ്ര​മി​ച്ചാ​ൽ പൊ​ട്ടി​പ്പോ​കാ​വു​ന്ന​ത്ര​യേ​യു​ള്ളൂ ആ ​ക​യ​ർ. പ​ക്ഷേ, അ​വി​ടെ ഒ​ന്നും സം​ഭ​വി​ക്കു​ന്നി​ല്ല. കാ​ഴ്ച​ക്കാ​ര​ന് അ​തി​ശ​യ​മാ​യി. എ​ന്തു​കൊ​ണ്ടാ​ണ് ഈ ​ആ​ന​ക​ളൊ​ന്നും നി​സാ​ര​മാ​യ ഒ​രു ക​യ​റി​ന്‍റെ ബ​ന്ധ​ന​ത്തി​ൽ ഇ​ത്ര അ​നു​സ​ര​ണ​യോ​ടെ പെ​രു​മാ​റു​ന്ന​ത്. ചെ​റുക​യ​റു​ക​ൾ പൊ​ട്ടി​ക്കു​ന്നി​ല്ലെ​ന്നു മാ​ത്ര​മ​ല്ല, അ​തി​നു ശ്ര​മി​ക്കു​ന്നു​പോ​ലു​മി​ല്ല.

ഇ​തൊ​ന്ന് അ​റി​യ​ണ​മ​ല്ലോ​യെ​ന്നു ക​രു​തി വ​ഴി​പോ​ക്ക​ൻ ആ​ന​ത്താ​വ​ള​ത്തി​ലെ പാ​പ്പാ​ന്മാ​രി​ൽ ഒ​രാ​ളു​ടെ അ​ടു​ത്തെ​ത്തി.

നി​ങ്ങ​ൾ​ക്കി​ത് എ​ങ്ങ​നെ സാ​ധി​ക്കു​ന്നു? ഈ ​ചെ​റി​യ ക​യ​ർ​കൊ​ണ്ട് ഇ​ത്ര ശ​ക്തി​യു​ള്ള ആ​ന​ക​ളെ എ​ങ്ങ​നെ ബ​ന്ധി​ച്ചു നി​ർ​ത്തു​ന്നു‍? അ​വ ചെ​റു​താ​യൊ​ന്നു ശ്ര​മി​ച്ചാ​ൽ കാ​ലി​ലെ ക​യ​ർ പൊ​ട്ടി​പ്പോ​കി​ല്ലേ? അ​വ​യെ​ല്ലാം ര​ക്ഷ​പ്പെ​ടി​ല്ലേ?

ഹേ​യ്, അ​തൊ​ന്നും സം​ഭ​വി​ക്കി​ല്ല. ഈ ​ആ​ന​ക​ളൊ​ക്കെ കു​ട്ടി​യാ​ന​ക​ളാ​യി​രു​ന്ന​പ്പോ​ൾ എ​ത്തി​യ​താ​ണി​വി​ടെ. അ​ന്ന് അ​വ​യ്ക്കു ക​യ​റു​ക​ൾ മ​തി​യാ​യി​രു​ന്നു. ആ​ന​ക​ൾ വ​ലു​താ​യ​പ്പോ​ഴും ക​യ​റു​ക​ൾ മാ​റ്റി​യി​ല്ല. അ​വ​യു​ടെ മ​ന​സ് ആ ​രീ​തി​യി​ൽ പ​രു​വ​പ്പെ​ടു​ത്തി​യി​രിക്കുക​യാ​ണു ഞ​ങ്ങ​ൾ. ത​ങ്ങ​ൾ വ​ലു​താ​യെ​ന്നോ ക​രു​ത്ത് കൂ​ടി​യെ​ന്നോ അ​വ ചി​ന്തി​ക്കു​ന്നി​ല്ല.

പ​ണ്ട​ത്തെ​പ്പോ​ലെ ഇ​ന്നും ഈ ​നി​സാ​ര ക​യ​റു​ക​ൾ ത​ങ്ങ​ൾ​ക്കു പൊ​ട്ടി​ക്കാ​നാ​വി​ല്ലെ​ന്നാ​ണ് പാ​വം ആ​ന​ക​ളു​ടെ വി​ചാ​രം. അ​തു​കൊ​ണ്ട് അ​വ അ​തി​നു ശ്ര​മി​ക്കാ​റു​മി​ല്ല; അ​ത്രത​ന്നെ.

കാ​ര്യ​ങ്ങ​ൾ തി​രി​ച്ച​റി​ഞ്ഞ വ​ഴി​പോ​ക്ക​ൻ എ​ന്തോ ചി​ന്തി​ച്ചു​റ​പ്പി​ച്ച മ​ട്ടി​ൽ ത​ന്‍റെ യാ​ത്ര തു​ട​ർ​ന്നു.
പ​ണ്ടേ, പ്ര​ചാ​ര​ത്തി​ലു​ള്ള ഒ​രു നാ​ടോ​ടി​ക്ക​ഥ​യാ​ണി​ത്. പ​ല​രും കേ​ട്ടി​ട്ടു​മു​ണ്ടാ​കും.

എ​ങ്കി​ലും ഒ​ന്നു​കൂ​ടി ഓ​ർ​മി​ക്കാ​ൻ പ​റ്റി​യ സ​മ​യ​മാ​ണി​ത്. എ​ത്ര പു​തു​വ​ത്സ​ര​ങ്ങ​ൾ വ​ന്നാ​ലും മാ​റ്റ​ങ്ങ​ൾ ഉ​ണ്ടാ​കാ​ത്ത​തി​ന്‍റെ കാ​ര​ണ​മെ​ന്തെ​ന്നു മ​ന​സി​ലാ​ക്കാ​ൻ പ​റ്റി​യ ക​ഥ.

2021 ക​ട​ന്നു​പോ​യി​ട്ട് മ​ണി​ക്കൂ​റു​ക​ളേ ആ​യി​ട്ടു​ള്ളൂ. എ​ങ്കി​ലും അ​തു ക​ട​ന്നു​പോ​യി എ​ന്ന​താ​ണ് യാ​ഥാ​ർ​ഥ്യം. പു​തു​വ​ർ​ഷം വ​ന്നി​ട്ടും അ​ത്ര​യും സ​മ​യ​മാ​യി. ന​മ്മു​ടെ പൂ​മു​ഖ​ത്തു​ത​ന്നെ നി​ല്പുണ്ട്.

ക​ഴി​ഞ്ഞ വ​ർ​ഷ​ത്തെ സ​ന്തോ​ഷ​ങ്ങ​ളു​ടെ​യും ആ​ഘോ​ഷ​ങ്ങ​ളു​ടെ​യും കാ​ര്യം പ​റ​യേ​ണ്ട കാ​ര്യ​മി​ല്ല. അ​ത് അ​വി​ടെ​വ​ച്ചു തീ​ർ​ന്നു. പ​ക്ഷേ, ദു​രി​ത​ങ്ങ​ളും മു​റി​വു​ക​ളും പ​ല​യി​ട​ത്തും ബാ​ക്കി​യാ​ണ്. രാ​ത്രി​യു​ടെ മ​റ​പ​റ്റി 2021 ഇ​റ​ങ്ങി​പ്പോ​യി​ട്ടും പ​ഴ​യ മു​റി​വു​ക​ളു​ടെ ബ​ന്ധ​ന​ങ്ങ​ളി​ൽ കി​ട​ക്കു​ക​യാ​ണ് മി​ക്ക​വ​രും. സ്വ​ന്തം ക​രു​ത്ത​റി​ഞ്ഞാ​ൽ തീ​ർ​ക്കാ​വു​ന്ന മു​റി​വു​ക​ളും വേ​ദ​ന​ക​ളു​മാ​ണ് കൂ​ടു​ത​ലും. ഒ​ന്നു ശ്ര​മി​ച്ചാ​ൽ പൊ​ട്ടി​ക്കാ​വു​ന്ന ക​യ​റു​ക​ൾ!


ക​ഴി​ഞ്ഞ വ​ർ​ഷം ശ്ര​മി​ക്കാ​തി​രു​ന്ന​തു​കൊ​ണ്ടോ ചെ​റി​യ പ​രാ​ജ​യ​ങ്ങ​ൾ ഉ​ണ്ടാ​യ​തു​കൊ​ണ്ടോ പു​തു​വ​ർ​ഷ​ത്തി​ലും ശ്ര​മി​ക്ക​രു​തെ​ന്നി​ല്ല.പ​ഠ​ന​ത്തി​ലും പ​രീ​ക്ഷ​യി​ലും ബി​സി​ന​സി​ലും രോ​ഗ​ങ്ങ​ളി​ലും വ്യ​ക്തി​ബ​ന്ധ​ങ്ങ​ളി​ലും ചി​ന്ത​ക​ളി​ലു​മൊ​ക്കെ ഒ​രു പു​തി​യ ശ്ര​മം ന​ട​ത്താ​ൻ ഇ​തി​ലും ന​ല്ലൊ​രു ദി​വ​സ​മി​ല്ല. ഇ​ന്നു മു​ത​ൽ ഞാ​ൻ ശ്ര​മി​ക്കാ​ൻ പോ​കു​ന്നു​വെ​ന്ന് ആ​ത്മാ​ർ​ഥ​മാ​യ ഒ​രു തീ​രു​മാ​ന​മെ​ടു​ക്കു​ക​യും അ​തി​ൽ ഉ​റ​ച്ചു​നി​ന്ന് അ​ധ്വാ​നി​ക്കു​കയും ചെ​യ്താ​ൽ നമുക്കും ഇ​തൊ​രു പു​തുവ​ർ​ഷം ത​ന്നെ​യാ​യി​രി​ക്കും.

ഒ​ന്നാം തീ​യ​തി​യാ​യി. മ​ധു​ര​ത്തി​നു പ​റ്റി​യ ദി​വ​സം. മ​ന​സി​ലൊ​രു ല​ഡു പൊ​ട്ടാ​ൻ ഇ​ന്നു​ത​ന്നെ ഒ​രു തീ​രു​മാ​ന​മെ​ടു​ത്താ​ൽ മ​തി. ല​ഡു​വി​ൽ ക​ല്ലു ക​ടി​ക്കു​ന്ന​ത് അ​സം​ഭാ​വ്യ​മാ​ണെ​ന്നു ക​രു​ത​രു​തെ​ന്നു മാ​ത്രം.

ഏ​തൊ​രു തീ​രു​മാ​ന​ത്തി​ൽ​നി​ന്നും ന​മ്മെ പി​ന്തി​രി​പ്പി​ക്കു​ന്ന​ത് ത​ട​സ​ങ്ങ​ളാ​ണ്. ത​ട​സ​ങ്ങ​ളി​ല്ലാ​തെ വി​ജ​യ​മു​ണ്ടാ​കു​മെ​ന്നു നാം ​തെ​റ്റി​ദ്ധ​രി​ച്ച​തു മാ​ത്ര​മാ​ണു കു​ഴ​പ്പ​ങ്ങ​ളു​ടെ കാ​ര​ണ​ങ്ങ​ളി​ലൊ​ന്ന്. ഇ​ന്ന​ലെ രാ​ത്രി​യി​ലു​ണ്ടാ​യി​രു​ന്ന അ​തേ ത​ട​സ​ങ്ങ​ൾ ഇ​ന്നു രാ​വി​ലെ​യും നാം ​വ​ഴി​യി​ലി​റ​ങ്ങി​യാ​ൽ കാ​ണും.

വേ​ദ​ന​ക​ളു​ടെ അ​തേ മെ​സേ​ജു​ക​ൾ മ​ന​സി​ലും ഫോ​ണി​ലെ വി​വി​ധ ആ​പ്പു​ക​ളി​ലും കി​ട​പ്പു​ണ്ട്. ന​ശി​പ്പി​ക്കാ​ൻ ശ്ര​മി​ക്കു​ന്ന വൈ​റ​സു​ക​ൾ ഒ​രു മാ​സ്കി​ന​പ്പു​റം ഈ ​പ്ര​ഭാ​ത​ത്തി​ലും കാ​ത്തി​രി​പ്പു​ണ്ട്. കു​രി​ശു പ​ണി​ത​വ​രും മു​ഖ​ത്തു തു​പ്പി​യ​വ​രു​മൊ​ക്കെ ഇ​വി​ടെ​ത്ത​ന്നെ​യു​ണ്ടാ​കും. ലോ​ക​ത്തി​ന് ഒ​രു മാ​റ്റ​വു​മു​ണ്ടാ​കി​ല്ല. ന​മ്മി​ലു​ണ്ടാ​കു​ന്ന മാ​റ്റം ലോ​ക​ത്തെ പു​തി​യൊ​രു രീ​തി​യി​ൽ കാ​ണാ​ൻ സ​ഹാ​യി​ക്കും. അ​തു മ​തി.

ശ്ര​മി​ച്ചു​കൊ​ണ്ടേ​യി​രി​ക്കു​ക. നേ​ടു​ന്ന​തു മാ​ത്ര​മ​ല്ല വി​ജ​യം; അ​തി​ലേ​ക്കു​ള്ള ശ്ര​മ​വും വി​ജ​യ​മാ​ണ്. എ​വ​റ​സ്റ്റ് കൊ​ടു​മു​ടി​യി​ൽ എ​ത്തി​യ​വ​ർ മാ​ത്ര​മ​ല്ല, വി​ജ​യി​ക​ൾ. അ​വി​ടേക്കു​ള്ള യാ​ത്ര​യി​ൽ വീ​ണു മ​രി​ച്ച​വ​രും വി​ജ​യി​ക​ളാ​ണ്.

കാ​ര​ണം, കോ​ടി​ക്ക​ണ​ക്കി​നു മ​നു​ഷ്യ​ർ​ക്കു ചി​ന്തി​ക്കാ​ൻ പോ​ലും പ​റ്റാ​തി​രു​ന്ന കാ​ര്യ​ത്തി​ന് ഇ​റ​ങ്ങി​പ്പു​റ​പ്പെ​ട്ട ധീ​ര​രാ​യി​രു​ന്നു അ​വ​ർ. ആ ​മൃ​ത​ദേ​ഹ​ങ്ങ​ളു​ടെ പോ​ലും ഏ​ഴ​യ​ല​ത്തു നി​ല്ക്കാ​ൻ യോ​ഗ്യ​ത​യി​ല്ലാ​ത്ത​വ​രാ​ണ് ഇ​പ്പോ​ഴും ജീ​വി​ച്ചി​രി​ക്കു​ന്ന ന​മ്മി​ൽ പ​ല​രും.

പ​രാ​ജ​യ​പ്പെ​ടാ​തി​രി​ക്കാ​നു​ള്ള ഏ​റ്റ​വും എ​ളു​പ്പ​മു​ള്ള മാ​ർ​ഗം ഒ​ന്നി​നും ഇ​റ​ങ്ങി​പ്പു​റ​പ്പെ​ടാ​തി​രി​ക്കു​ക എ​ന്ന​തു മാ​ത്ര​മാ​ണ്.

വി​ജ​യി​ക്കു​ന്പോ​ൾ ചി​രി​ക്കു​ന്ന​തി​നേ​ക്കാ​ൾ വ​ലി​യ ധീ​ര​ത, പ​രാ​ജ​യ​പ്പെ​ടു​ന്പോ​ൾ ത​ക​ർ​ന്നു പോ​കാ​തി​രി​ക്കു​ന്ന​താ​ണെ​ന്ന് ആ​ർ​ക്കാ​ണ​റി​യാ​ത്ത​ത്? ഉ​റ​ച്ച ശ്ര​മ​ങ്ങ​ൾ​ക്കി​ട​യി​ൽ പ​രാ​ജ​യ​പ്പെ​ടു​ന്ന​വരു​ടേ​തു​കൂ​ടി​യാ​ണ് വി​ജ​യം.

പ​ല​ർ​ക്കും അ​റി​യാ​ൻ പാ​ടി​ല്ലാ​ത്ത സ​ന്തോ​ഷ​ത്തി​ന്‍റെ ര​ഹ​സ്യ​മാ​ണ​ത്. 2022ന്‍റെ അ​ധ​ര​ങ്ങ​ൾ​ക്ക് ഈ ​പ്ര​ഭാ​ത​ത്തി​ൽ ന​മ്മു​ടെ കാ​തു​ക​ളോ​ടു പ​റ​യാ​നു​ള്ള ര​ഹ​സ്യം.

ഷി​മ്മി ജോ​സ്

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.