ഉദ്ഘാടനം സന്തോഷകരം
കൊച്ചി: വര്‍ണവിസ്മയങ്ങള്‍ തീര്‍ത്ത കലാവിരുന്നുകളോടെയാണ് സന്തോഷ് ട്രോഫിയുടെ ഉദ്ഘാടനച്ചടങ്ങുകള്‍ ആരംഭിച്ചത്. വൈകുന്നേരം 5.20ന് തുടങ്ങിയ ഉദ്്ഘാടന ചടങ്ങുകള്‍ 45 മിനിറ്റു നീണ്ടു. തുടര്‍ന്ന് സതേണ്‍ നേവല്‍ കമാന്‍ഡ് ഫ്ളാഗ് ഓഫീസര്‍ കമാന്‍ഡിംഗ് ഇന്‍ ചീഫ് വൈസ് അഡ്മിറല്‍ സതീഷ് സോണി മത്സരം ഉദ്ഘാടനം ചെയ്തു. നഗരത്തിലെ വിവിധ സ്കൂളുകളില്‍ നിന്നുള്ള വിദ്യാര്‍ഥികളുടെ മാസ്ഡ്രില്ലും നേവി ബാന്‍ഡുമായിരുന്നു ചടങ്ങിന്റെ പ്രധാന ആകര്‍ഷണം. കേരളം കേരളം എന്ന ഗാനത്തോടെ തുടങ്ങിയ ഡിസ്പ്ളേക്കൊടുവില്‍ മലയാളി മങ്ക നിലവിളക്കേന്തി മൈതാനമധ്യത്തിലെത്തി. ചുറ്റും താലപ്പൊലിയുമായി നൂറോളം വിദ്യാര്‍ഥികളും അണിനിരന്നു. ശിങ്കാരിമേളവും നാടന്‍ കലാരൂപങ്ങളും, തിരുവാതിര, മാര്‍ഗംകളി, ദഫ്മുട്ട്, ഒപ്പന, ചെണ്ടമേളം, പഞ്ചവാദ്യം എന്നിവയും ചടങ്ങിന് കൊഴുപ്പേകി. ബാന്റ് മേളത്തിന്റെ അകമ്പടിയോടെ കൊച്ചി രാജാവും പരിവാരങ്ങളും അരങ്ങിലെത്തി. തുടര്‍ന്ന് നടന്ന ബ്രസീലിയന്‍ ഗാനങ്ങള്‍ കോര്‍ത്തിണക്കിയ ഏറോബിക്സും, ഫോര്‍ട്ട്കൊച്ചിയിലെ കാര്‍ണിവലിലെ സര്‍ക്കസ് പ്രകടനങ്ങളെ അനുസ്മരിക്കുന്ന പിരമിഡിന്റെ അരങ്ങേറ്റവും ഗ്യാലറിക്ക് പുതിയ അനുഭവമായി.