ഓ... മുംബൈ... : Deepika.com Sports News |

Click here for detailed news of all items

ഓ... മുംബൈ...

Sunday, May 5, 2024 1:31 AM IST

കോൽക്കത്ത: ഐഎസ്എൽ ഫുട്ബോൾ 2023-24 സീസണ്‍ ചാന്പ്യൻഷിപ്പ് മുംബൈ സിറ്റി എഫ്സിക്ക്. കോൽക്കത്തയിലെ സാൾട്ട് ലേക്ക് സ്റ്റേഡിയത്തിൽനടന്ന ഫൈനൽ പോരാട്ടത്തിൽ 3-1ന് ആതിഥേയരായ മോഹൻ ബഗാൻ സൂപ്പർ ജയന്‍റിനെയാണ് മുംബൈ സിറ്റി തകർത്തത്.

2023-24 ലീഗ് വിന്നേഴ്സ് ഷീൽഡ് ജേതാക്കളായ മോഹൻ ബഗാന്‍റെ ട്രിപ്പിൾ കിരീട സ്വപ്നം മുംബൈ സിറ്റി തകർത്തു. സീസണിലെ ഡ്യൂറൻഡ് കപ്പിലും ബഗാനായിരുന്നു മുത്തംവച്ചത്.

ഒരു ഗോളിനു പിന്നിൽനിന്നശേഷമാണ് മുംബൈ സിറ്റിയുടെ തിരിച്ചുവരവ് ജയം. 44-ാം മിനിറ്റിൽ ജേസണ്‍ കമ്മിൻസിന്‍റെ (44’) ഗോളിൽ മോഹൻ ബഗാൻ ലീഡ് നേടി. എന്നാൽ, പെരേര ഡിയസിലൂടെ 53-ാം മിനിറ്റിൽ മുംബൈ ഒപ്പമെത്തി.

തുടർന്ന് 81-ാം മിനിറ്റിൽ ബിപിൻ സിംഗിലൂടെ മുംബൈ ലീഡ് നേടി. ഗോൾ തിരിച്ചടിക്കാൻ കിണഞ്ഞുശ്രമിച്ച മോഹൻ ബഗാന്‍റെ സമനില സ്വപ്നങ്ങൾക്കുമേൽ കരിനിഴലായി ജാകൂബ് വൊജ്തൂസിലൂടെ (90+7’) മുംബൈ സിറ്റി കിരീടം ഉറപ്പിച്ചു. ഐഎസ്എൽ കപ്പിൽ മുംബൈ സിറ്റി രണ്ടാം തവണയാണ് മുത്തംവയ്ക്കുന്നത്.

ഫൈനലിൽ വീണ്ടും ബഗാൻ വീണു

ഐഎസ്എൽ കിരീട പോരാട്ടത്തിൽ മുംബൈ സിറ്റിക്കു മുന്നിൽ മോഹൻ ബഗാൻ വീഴുന്നത് ഇത് രണ്ടാം തവണയാണ്. 2020-21 സീസണിൽ മുംബൈ സിറ്റി ആദ്യ ചാന്പ്യൻഷിപ്പ് ഉയർത്തിയപ്പോഴും ഫൈനലിൽ മോഹൻ ബഗാനെയായിരുന്നു കീഴടക്കിയത്. അന്ന് എടികെ മോഹൻ ബഗാൻ എന്നായിരുന്നു ടീമിന്‍റെ പേര്. 2020-21 സീസണിൽ ലീഗ് വിന്നേഴ്സ് ഷീൽഡും മുംബൈ സിറ്റിക്കായിരുന്നു.

2023-24 ലീഗ് വിന്നേഴ്സ് ഷീൽഡ് ആർക്കെന്ന് നിശ്ചയിച്ച പോരാട്ടത്തിൽ മുംബൈ സിറ്റിയെ മോഹൻ ബഗാൻ 2-1നു കീഴടക്കിയിരുന്നു. സാൾട്ട് ലേക്ക് സ്റ്റേഡിയത്തിൽ ഏപ്രിൽ 15നായിരുന്നു ലീഗ് റൗണ്ടിലെ ആ പോരാട്ടം. അന്നേറ്റ തോൽവിക്കും ഷീൽഡ് നഷ്ടത്തിനും അതേ സ്റ്റേഡിയത്തിൽവച്ചുതന്നെ മുംബൈക്കാർ പകരം വീട്ടി.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.