ഒന്നാം വർഷ ബിരൂദ പ്രവേശനം: ഓണ്ലൈൻ അപേക്ഷയിൽ തിരുത്തലിന് അവസരം
സർവകലാശാലയോട് അഫിലിയേറ്റ് ചെയ്തിട്ടുള്ള ആർട്സ് ആൻഡ് സയൻസ് കോളജുകളിൽ (ഗവ., എയ്ഡഡ്, സ്വാശ്രയ, ഐഎച്ച്ആർഡി) ഒന്നാം വർഷ ബിരുദ പ്രവേശനത്തിന് അപേക്ഷിച്ചിട്ടുള്ള വിദ്യാർഥികൾക്ക് ഓണ്ലൈൻ അപേക്ഷയിൽ തിരുത്തൽ വരുത്തുവാൻ അവസരം നൽകുന്നു. 24നു വൈകുന്നേരം അഞ്ചു മുതൽ 27 നു വൈകുന്നേരം അഞ്ചു വരെ ഓണ്ലൈൻ അപേക്ഷയിൽ മാറ്റങ്ങൾ വരുത്താം. പുതിയ ഓപ്ഷനുകൾ ചേർക്കാനും ഹയർ ഓപ്ഷനുകൾ ക്യാൻസൽ ചെയ്യാനും ഓപ്ഷനുകൾ പുനഃക്രമീകരിക്കുന്നതിനും ഓണ്ലൈൻ അപേക്ഷയിൽ എന്തെങ്കിലും തിരുത്തലുകൾ വരുത്തുവാനും ഉണ്ടെങ്കിൽ ഈ അവസരം പ്രയോജനപ്പെടുത്താവുന്നതാണ്. 27 നു വൈകുന്നേരം അഞ്ചിനു ശേഷം ഓണ്ലൈൻ അപേക്ഷയിൽ യാതൊരു വിധത്തിലുള്ള തിരുത്തലുകളും അനുവദിക്കുന്നതല്ല. ഓരോ കോളജുകളിലും നിലവിലുള്ള ഒഴിവുകളും ഏറ്റവും ഒടുവിൽ പ്രവേശനം ലഭിച്ച കുട്ടിയുടെ ഇൻഡക്സ് മാർക്ക് എന്നിവ വെബ്സൈറ്റിൽ പ്രസിദ്ധപ്പെടുത്തും. വിദ്യാർഥികൾക്ക് തങ്ങളുടെ ഇൻഡക്സ് മാർക്ക് ഈ വിവരവുമായി താരതമ്യപ്പെടുത്തി ഓപ്ഷനുകൾ ക്രമീകരിക്കാവുന്നതാണ്. ഇത്തരത്തിൽ വരുത്തിയ മാറ്റങ്ങൾ എല്ലാം പരിഗണിച്ച് 31 നു നാലാം സപ്ലിമെന്ററി അലോട്ട്മെന്റ് പ്രസിദ്ധപ്പെടുത്തും. ഒന്നാം ഓപ്ഷൻ തന്നെ ലഭിച്ച വിദ്യാർഥികൾക്ക് തിരുത്തലിന് അവസരം ഇല്ല. പ്രവേശനം നേടിക്കഴിഞ്ഞ വിദ്യാർഥികൾക്ക് ഹയർ ഓപ്ഷനുകളിൽ മാറ്റം വരുത്താം. ഇപ്പോൾ ലഭിച്ച കോളജ്, കോഴ്സ് എന്നിവയിൽ തൃപ്തരാണെങ്കിൽ ഹയർ ഓപ്ഷനുകൾ ക്യാൻസൽ ചെയ്യണം.
പിജി ഡിപ്ലോമ ഇൻ ഇംഗ്ലീഷ് ഫോർ കമ്യൂണിക്കേഷൻ കോഴ്സ്: അഡ്മിഷൻ
ഇൻസ്റ്റിറ്റ്യൂട്ട് ഓഫ് ഇംഗ്ലീഷ് നടത്തുന്ന പോസ്റ്റ് ഗ്രാജുവേറ്റ് ഡിപ്ലോമ ഇൻ ഇംഗ്ലീഷ് ഫോർ കമ്യൂണിക്കേഷൻ കോഴ്സിലേക്കുള്ള അഡ്മിഷൻ27ന് രാവിലെ 10.00ന് പാളയത്തുള്ള ഇംഗ്ലീഷ് പഠന വകുപ്പിൽ നടക്കും. മെമോ കാർഡ് ലഭിക്കാത്തവർ ഇൻസ്റ്റിറ്റ്യൂട്ട് ഓഫ് ഇംഗ്ലീഷ് ഓഫീസുമായി 25നകം ബന്ധപ്പെടുക.
ബിഎ/ ബിഎസ്സി/ ബികോം/ ബിബിഎ/ ബിസിഎ/ ബിഎസ്ഡബ്ലിയു/ ബിവോക്/ ബിപിഎ ടൈംടേബിൾ
25 മുതൽ ആരംഭിക്കുന്ന രണ്ടാം സെമസ്റ്റർ കരിയർ റിലേറ്റഡ് ബിഎ/ ബിഎസ്സി/ ബികോം/ ബിബിഎ/ ബിസിഎ/ ബിഎസ്ഡബ്ലിയു/ ബിവോക്/ ബിപിഎ (റഗുലർ, ഇംപ്രൂവ്മെന്റ് ആൻഡ് സപ്ലിമെന്ററി) പരീക്ഷകളുടെ വിശദമായ ടൈംടേബിൾ വെബ്സൈറ്റിൽ.
ബിബിഎ ഫലം
ഏപ്രിലിൽ നടത്തിയ ആറാം സെമസ്റ്റർ (കരിയർ റിലേറ്റഡ് സിബിസിഎസ്എസ് 2013, 2014 സ്കീം ബിബിഎ പരീക്ഷയുടെ ഫലം വെബ്സൈറ്റിൽ.