പ്രാക്ടിക്കൽ പരീക്ഷകൾ മാറ്റി
നവംബർ ഒന്ന്, മൂന്ന് തീയതികളിൽ യൂണിവേഴ്സിറ്റി കോളജിൽ നടത്താൻ നിശ്ചയിച്ചിരുന്ന നാലാം സെമസ്റ്റർ എംഎസ്സി ഫിസിക്സ് പ്രാക്ടിക്കൽ പരീക്ഷകൾ 14, 15 തീയതികളിൽ യൂണിവേഴ്സിറ്റി കോളജിൽ നടത്തും. നവംബർ ഒന്നിന് നടത്താനിരുന്ന നാലാം സെമസ്റ്റർ എംഎസ്സി ജിയോളജി പ്രാക്ടിക്കൽ പരീക്ഷ ആറിന് അതത് കോളജിൽ നടത്തും.
ഹിയറിംഗിന് ഹാജരാകണം
വിദ്യാർഥികളിൽ നിന്നും ലഭിച്ച പരാതികളുടെ അടിസ്ഥാനത്തിൽ സിന്ഡിക്കേറ്റിന്റെ അഫിലിയേഷൻ കമ്മിറ്റി ഇന്നു രാവിലെ 10.30ന് ചെറുവാരക്കോണം സിഎസ്ഐ ഇൻസ്റ്റിറ്റ്യൂട്ട് ഓഫ് ലീഗൽ സ്റ്റഡീസിൽ നടത്തുന്ന ഹിയറിംഗിന് പരാതിക്കാർ തെളിവുകൾ സഹിതം നേരിട്ട് ഹാജരാകണം.
ബിഎ/ബിഎസ്സി/ബികോം പരീക്ഷകേന്ദ്രങ്ങൾ
നവംബർ മൂന്നിന് ആരംഭിക്കുന്ന നാലാം സെമസ്റ്റർ ബിഎ/ബിഎസ്സി/ബികോം (സിബിസിഎസ്എസ് എഫ്ഡിപി 2011, 2012 അഡ്മിഷൻ, 2010 അഡ്മിഷൻ മേഴ്സിചാൻസ്) കൂടാതെ നവംബർ ആറിന് ആരംഭിക്കുന്ന രണ്ടാം സെമസ്റ്റർ ബിഎ/ബിഎസ്സി/ബികോം (സിബിസിഎസ്എസ് എഫ്ഡിപി 2011, 2012 അഡ്മിഷൻ, 2010 അഡ്മിഷൻ മേഴ്സിചാൻസ്) പരീക്ഷകൾക്ക് തിരുവനന്തപുരം ജില്ലയ്ക്ക് എംജി കോളജും, കൊല്ലം ജില്ലയ്ക്ക് കൊല്ലം ടികെഎം കോളജ് ഓഫ് ആർട്സ് ആൻഡ് സയൻസും, ആലപ്പുഴ പത്തനംതിട്ട ജില്ലകൾക്ക് ആലപ്പുഴ എസ്ഡി കോളജ് എന്നിങ്ങനെ പരീക്ഷാ കേന്ദ്രങ്ങൾ പരിമിതപ്പെടുത്തിയിരിക്കുന്നു. കുട്ടികൾ പരീക്ഷാകേന്ദ്രമായി രജിസ്റ്റർ ചെയ്ത കോളജുകളിൽ നിന്നും ഹാൾടിക്കറ്റ് കൈപ്പറ്റി മേൽപറഞ്ഞ നിർദിഷ്ട പരീക്ഷാകേന്ദ്രങ്ങളിൽ പരീക്ഷ എഴുതേണ്ടതാണ്. വിശദമായ ടൈംടേബിളും നിർദിഷ്ട പരീക്ഷാകേന്ദ്രങ്ങളിലേക്ക് അലോട്ട് ചെയ്തിട്ടുള്ള കോളജുകളുടെ വിവരങ്ങളും സർവകലാശാല വെബ്സൈറ്റിൽ ലഭിക്കും.
ബിഎസ്സി/ബിസിഎ പരീക്ഷാകേന്ദ്രങ്ങൾ
കേരള സർവകലാശാല വിദൂരവിദ്യാഭ്യാസ വിഭാഗം നവംബർ ആറിന് ആരംഭിക്കുന്ന രണ്ടാം വർഷ ആനുവൽ സകീം ബിഎസ്സി കംപ്യൂട്ടർ സയൻസ് /ബിസിഎ (എസ്ഡിഇ) സപ്ലിമെന്ററി (പഴയ സ്കീമും പുതിയ സ്കീമും) പരീക്ഷകൾക്ക് തിരുവനന്തപുരം പരീക്ഷാകേന്ദ്രമായി ആവശ്യപ്പെട്ട വിദ്യാർഥികൾ എസ്ഡിഇ പാളയം സെന്ററിൽ നിന്നും, കൊല്ലം പരീക്ഷാകേന്ദ്രമായി ആവശ്യപ്പെട്ട വിദ്യാർഥികൾ ഫാത്തിമ മെമ്മോറിയൽ ട്രെയിനിംഗ് കോളജ്, വടക്കേവിള സെന്ററിൽ നിന്നും ഹാൾടിക്കറ്റ് വാങ്ങി അതാത് സെന്ററിൽ തന്നെ പരീക്ഷ എഴുതണം. ആലപ്പുഴയിലും മറ്റു ജില്ലകളിലും അപേക്ഷിച്ച വിദ്യാർഥികൾ എസ്എൻ കോളജ് ചേർത്തല സെന്ററിൽ നിന്നും ഹാൾടിക്കറ്റ് വാങ്ങി അതേ സെന്ററിൽ പരീക്ഷ എഴുതണം. ഓണ്ലൈനായി അപേക്ഷിച്ച വിദ്യാർഥികൾ ഡൗണ്ലോഡ് ചെയ്ത് എടുത്ത ഹാൾടിക്കറ്റും തിരിച്ചറിയൽ രേഖയുമായി പരീക്ഷയ്ക്ക് ഹാജരാകണം.
ബിടെക് പരീക്ഷ
ഏഴാം സെമസ്റ്റർ ബിടെക് ഡിഗ്രി (2013 സ്കീം) (സപ്ലിമെന്ററി നവംബർ 2017) പരീക്ഷയ്ക്ക് പിഴകൂടാതെ നവംബർ ആറ് (50 രൂപ പിഴയോടെ നവംബർ എട്ട്, 125 രൂപ പിഴയോടെ നവംബർ പത്ത് ) വരെ ഓണ്ലൈനായി ഫീസടച്ച് രജിസ്റ്റർ ചെയ്യാം. സെഷണൽ ഇംപ്രൂവ്മെന്റായി പ്രസ്തുത പരീക്ഷ എഴുതുന്നവർ സർവകലാശാലയിൽ നേരിട്ട് അപേക്ഷിക്കണം. വിശദവിവരങ്ങൾ വെബ്സൈറ്റിൽ.