സ്കൂൾ കലോത്സവത്തിന് ഇനി രണ്ടുനാൾ; കൊല്ലം ഉത്സവലഹരിയിൽ |

Click here for detailed news of all items

സ്കൂൾ കലോത്സവത്തിന് ഇനി രണ്ടുനാൾ; കൊല്ലം ഉത്സവലഹരിയിൽ

Tuesday, January 2, 2024 3:01 PM IST
എസ്.ആർ. സുധീർ കുമാർ

കൊല്ലം: ഒന്നര പതിറ്റാണ്ടിനുശേഷം കൊല്ലത്ത് വിരുന്നിന് എത്തുന്ന സംസ്ഥാന സ്കൂൾ കലോത്സവത്തിന് അരങ്ങുണരാൻ ഇനി രണ്ടുനാൾ. കൊല്ലം നഗരം അക്ഷരാർഥത്തിൽ ഉത്സവലഹരിയിൽ അമർന്നു കഴിഞ്ഞു.

ഏഷ്യാ വൻകരയിലെ ഏറ്റവും വലിയ കൗമാര കലാമേളയെ ദേശിംഗനാടിന്‍റെ ദേശീയ ഉത്സവമാക്കി മാറ്റിയുള്ള തയാറെടുപ്പുകളാണ് സംഘാടക സമിതിയുടെ നേതൃത്വത്തിൽ നടന്നു വരുന്നത്. നാടും നഗരവും കലോത്സവത്തിന്‍റെ പ്രചാരണ ബോർഡുകളും ആർച്ചുകളും കൊണ്ടുസമ്പന്നമാണ്.

പ്രധാന വേദിയുടെയും പന്തലിന്‍റെയും സമർപ്പണം ഇന്ന് രാവിലെ മന്ത്രി വി.ശിവൻ കുട്ടിയുടെ സാന്നിധ്യത്തിൽ ആശ്രാമം മൈതാനിയിൽ നടന്നു. കൊല്ലം ടൗൺ യുപിഎസിൽ ബുധനാഴ്ച രാവിലെ 10.30 മുതൽ രജിസ്ട്രേഷൻ ആരംഭിക്കും. ഓരോ ജില്ലയ്ക്കും പ്രത്യേക കൗണ്ടറുകൾ ഏർപ്പെടുത്തിയിട്ടുണ്ട്.

കലോത്സവത്തിന് എത്തുന്നവരെ സഹായിക്കാൻ കൊല്ലം റെയിൽവേ സ്റ്റേഷനിൽ ബുധനാഴ്ച മുതൽ എട്ടുവരെ ഹെൽപ്പ് ഡെസ്കിന്‍റെ പ്രവർത്തനം ഉണ്ടായിരിക്കും. മാത്രമല്ല, റെയിൽവേ സ്റ്റേഷനിലും കെഎസ്ആർടിസി ബസ് സ്റ്റാൻഡിലും എത്തുന്ന മത്സരാർഥികളെ രജിസ്ട്രേഷൻ കൗണ്ടർ, താമസ സ്ഥലം, ഭക്ഷണ പന്തൽ എന്നിവിടങ്ങളിലേക്ക് കൊണ്ടുപോകാൻ വാഹന സൗകര്യങ്ങളും ഏർപ്പാടാക്കിയിട്ടുണ്ട്. ഇതിനായി 30 വാഹനങ്ങൾ സദാ സമയവും സേവനത്തിന് ഉണ്ടാകും.

ഇത് കൂടാതെ വേദികളും അക്കോമഡേഷൻ സെന്‍ററുകളും പ്രോഗ്രാം ഓഫീസുകളും തമ്മിൽ ബന്ധിപ്പിച്ച് ക്യൂആർ കോഡ് സംവിധാനവും നിലവിൽ വന്നു. ഇന്ന് വൈകുന്നേരം കൊല്ലം നഗരത്തിൽ 500-ൽ അധികം വിദ്യാർഥികൾ പങ്കെടുക്കുന്ന റോഡ് ഷോ നടക്കും. ബുധനാഴ്ച മെഗാ റോഡ് ഷോയും സംഘടിപ്പിക്കും.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.