ചത്തീസ്ഗഡിൽ ഏറ്റുമുട്ടൽ; മൂന്നു മാവോയിസ്റ്റുകൾ കൊല്ലപ്പെട്ടു |

Click here for detailed news of all items

ചത്തീസ്ഗഡിൽ ഏറ്റുമുട്ടൽ; മൂന്നു മാവോയിസ്റ്റുകൾ കൊല്ലപ്പെട്ടു

Sunday, January 21, 2024 1:09 AM IST

റായ്പുർ: ചത്തീസ്ഗഡില്‍ സുരക്ഷാസേനയുമായുണ്ടായ ഏറ്റുമുട്ടലില്‍ രണ്ട് വനിതകള്‍ ഉള്‍പ്പടെ മൂന്ന് മാവോയിസ്റ്റുകള്‍ കൊല്ലപ്പെട്ടു. ബിജാപുര്‍ ജില്ലയില്‍ ശനിയാഴ്ച രാവിലെയാണ് ഏറ്റുമുട്ടലുണ്ടായത്.

ബസഗുഡ പോലീസ് സ്‌റ്റേഷന്‍ പരിധിയിലെ വനമേഖലയായ ബേലം ഗുട്ടയിലാണ് സംഭവം. സംസ്ഥാന പോലീസിന്‍റെ ജില്ലാ റിസർവ് ഗാർഡിലെ (ഡിആർജി) ഉദ്യോഗസ്ഥരും സിആർപിഎഫിന്‍റെ എലൈറ്റ് യൂണിറ്റായ കമാൻഡോ ബറ്റാലിയൻ ഫോർ റെസലൂട്ട് ആക്ഷൻ (കോബ്രാ)യുമാണ് ഓപ്പറേഷൻ നടത്തിയത്.

മുതിർന്ന മാവോയിസ്റ്റ് നേതാക്കളായ വിനോദ് വർമ, രാജു പുനെം, വിശ്വനാഥ്, ഗുഡ്ഡു തേലം എന്നിവരുൾപ്പെടെ മദ്ദേഡ് ഏരിയ കമ്മിറ്റിയിലെ മാവോയിസ്റ്റ് കേഡർമാർ ബാലം നേദ്ര വനത്തിൽ ഉണ്ടെന്ന് സുരക്ഷാ സേനയ്ക്ക് രഹസ്യാന്വേഷണ വിവരം ലഭിച്ചിരുന്നു.

തുടർന്ന് നടത്തിയ പരിശോധനയ്ക്കിടെ മാവോയിസ്റ്റുകൾ സുരക്ഷാസേനയ്ക്ക് നേരെ വെടിയുതിർത്തു. ഉദ്യോഗസ്ഥർ നടത്തിയ പ്രത്യാക്രമണത്തിലാണ് മാവോയിസ്റ്റുകൾ കൊല്ലപ്പെട്ടത്. പ്രദേശത്ത് നിന്നും സ്‌ഫോടകവസ്തുക്കൾ, ആയുധങ്ങൾ, മാവോയിസ്റ്റ് യൂണിഫോമുകൾ തുടങ്ങിയവ കണ്ടെത്തിയിരുന്നു.

കൊല്ലപ്പെട്ട മാവോയിസ്റ്റുകളെ പറ്റിയുള്ള വിവരം ഇതുവരെ കണ്ടെത്താനായിട്ടില്ല, സമീപ പ്രദേശങ്ങളിൽ തെരച്ചിൽ നടക്കുന്നുണ്ടെന്ന് ഉദ്യോഗസ്ഥർ പറഞ്ഞു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.