സെ​ഞ്ചു​റി​‍യോടെ വ​ഡ്ക​ർ, അ​ർ​ധ​സെ​ഞ്ചു​റി​യു​മാ​യി ദു​ബെ; കി​രീ​ട​പ്പോ​രാ​ട്ടം ആ​വേ​ശ​ത്തി​ലേ​ക്ക്

മുംബൈ: രഞ്ജി ട്രോഫി ഫൈനലില്‍ മുംബൈ-വിദർഭ പോരാട്ടം ആവേശകരമായ അന്ത്യത്തിലേക്ക്. മുംബൈ ഉയർത്തിയ 538 റൺസിന്‍റെ പടുകൂറ്റൻ വിജയലക്ഷ്യം പിന്തുടർന്ന് വിദർഭ പൊരുതുന്നു. അവസാന ദിനം ഒടുവില്‍ വിവരം ലഭിക്കുമ്പോള്‍ രണ്ടാം ഇന്നിംഗ്സില്‍ അഞ്ചു വിക്കറ്റ് നഷ്ടത്തില്‍ 333 റണ്‍സെന്ന നിലയിലാണ് വിദർഭ.

സെഞ്ചുറിയുമായി നായകൻ അക്ഷയ് വഡ്കറും (100) അർധസെഞ്ചുറിയുമായി ഹർഷ് ദുബെയുമാണ് (57) ക്രീസിൽ. അഞ്ചുവിക്കറ്റ് മാത്രം ശേഷിക്കേ ജയത്തിലേക്ക് 202 റൺസ് കൂടി വേണം. സ്കോർബോർഡ്: മുംബൈ- 224, 418, വിദർഭ- 105, അഞ്ചിന് 333.

നേരത്തെ, മുംബൈ ഉയർത്തിയ കൂറ്റൻ വിജയലക്ഷ്യം പിന്തുടർന്ന് ബാറ്റിംഗിനിറങ്ങി‍‍യ വിദർഭയ്ക്ക് സ്കോർ 64 റൺസിൽ നില്ക്കെ ഓപ്പണർമാരെ ഇരുവരെയും നഷ്ടമായി. 32 റൺസെടുത്ത അഥർവ തൈഡെയെ ഷംസ് മുലാനി വിക്കറ്റിനു മുന്നിൽ കുടുക്കിയപ്പോൾ 28 റൺസെടുത്ത ധ്രുവ് ഷോറെയെ തനുഷ് കോട്യാൻ‌ ബൗൾഡാക്കുകയായിരുന്നു.

പിന്നാലെ ക്രീസിൽ ഒന്നിച്ച കരുൺ‌ നായരും അമൻ മൊഖാഡെയും ചേർന്ന് കരുതലോടെ സ്കോർബോർഡ് മുന്നോട്ടുനയിച്ചു. ഇരുവരും ചേർന്ന് മൂന്നാം വിക്കറ്റിൽ 54 റൺസിന്‍റെ വിലപ്പെട്ട കൂട്ടുകെട്ട് പടുത്തുയർത്തി. സ്കോർ 118 റൺസിൽ നില്ക്കെ മൊഖാഡെയെ (32) വിക്കറ്റിനു മുന്നിൽ‌ കുടുക്കി മുഷീർ ഖാൻ കൂട്ടുകെട്ട് പൊളിച്ചു. പിന്നാലെ ഏഴുറൺസെടുത്ത യഷ് റാത്തോഡിനെ തനുഷ് കോട്യാനും പുറത്താക്കിയതോടെ നാലിന് 133 റൺസെന്ന നിലയിൽ വിദർഭ പതറി.

ഈസമയത്താണ് നായകൻ അക്ഷയ് വഡ്കറും കരുൺ നായരും ക്രീസിൽ ഒന്നിച്ചത്. ഇരുവരും ചേർന്ന് 90 റൺസിന്‍റെ കൂട്ടുകെട്ട് പടുത്തുയർത്തി. 74 റൺസെടുത്ത കരുൺ നായരെ മുഷീർ ഖാൻ പുറത്താക്കിയതോടെ അഞ്ചിന് 223 എന്ന നിലയിലായി വിദർഭ. അവിടെനിന്നാണ് വഡ്കറും ദുബെയും ചേർന്ന് ടീമിനെ തോളിലേറ്റിയത്.

അഞ്ചിന് 248 റൺസെന്ന നിലയിൽ അഞ്ചാംദിനം ബാറ്റിംഗ് പുനരാരംഭിച്ച വിദർഭയെ പെട്ടെന്ന് പുറത്താക്കി കിരീടത്തിലെത്താമെന്ന മുംബൈയുടെ കണക്കുകൂട്ടലാണ് പാളിയത്. അസാമാന്യ ചെറുത്തുനില്പ് കാഴ്ചവച്ച വഡ്കറും ദുബെയും ചേർന്ന് 90 റൺസിന്‍റെ അപരാജിത കൂട്ടുകെട്ട് പടുത്തുയർത്തിക്കഴിഞ്ഞു.

മുംബൈയ്ക്കു വേണ്ടി തനുഷ് കോട്യാൻ, മുഷീർ ഖാൻ എന്നിവർ രണ്ടുവിക്കറ്റ് വീതവും ഷംസ് മുലാനി ഒരു വിക്കറ്റും വീഴ്ത്തി.