ബിജെപിയെയും കോണ്‍ഗ്രസിനെയും പോലെയല്ല; ഞങ്ങള്‍ ജനങ്ങളുടെ ചെലവില്‍ ജനങ്ങള്‍ക്കായി പ്രവര്‍ത്തിക്കുന്ന പാര്‍ട്ടി: ഗോവിന്ദന്‍ |

ഇടുക്കി: ഇടുക്കി പാര്‍ലമെന്‍റ് മണ്ഡലത്തില്‍ എല്‍ഡിഎഫ് മികച്ച വിജയം നേടുമെന്ന് സിപിഎം സംസ്ഥാന സെക്രട്ടറി എം.വി.ഗോവിന്ദന്‍. ഡീന്‍ കുര്യാക്കോസ് എംപിയേക്കുറിച്ച് താന്‍ വ്യക്തിപാരമായി ഒന്നും പറയുന്നില്ല. തങ്ങള്‍ നയപരമായിട്ടാണ് കാര്യങ്ങള്‍ അവതരിപ്പിക്കുന്നത്. എംപിയെ മണ്ഡലത്തില്‍ കാണാറില്ലെന്ന് ജനങ്ങളില്‍ നിന്നും മനസിലാക്കിയെന്നും അദ്ദേഹം പറഞ്ഞു.

യുഡിഎഫ് എന്നത് ദുര്‍ബലമായ സംവിധാനമാണ്. ഭരണമുള്ളപ്പോഴും ഇല്ലാത്തപ്പോഴും എല്ലാക്കാലത്തും സജീവമായി മുന്നോട്ട് വന്നിട്ടുള്ളത് എല്‍ഡിഎഫ് ആണ്. വന്യജീവി പ്രശ്‌നത്തിലും ഇടപെട്ടിട്ടുള്ളത് സിപിഎം ആണ്. ഇനിയുമത് തുടരും. തെരഞ്ഞെടുപ്പില്‍ സമദൂരം എന്ന ഹൈറേഞ്ച് സംരക്ഷണ സമിതിയുടെ നിലപാട് ഗുണമാവുക എല്‍ഡിഎഫിനെന്നും അദ്ദേഹം അവകാശപ്പെട്ടു.

തങ്ങള്‍ ജനങ്ങളുടെ ചെലവില്‍ ജനങ്ങള്‍ക്കായി പ്രവര്‍ത്തിക്കുന്ന പാര്‍ട്ടിയാണ്. ജനങ്ങളില്‍ നിന്നാണ് സംഭാവന വാങ്ങാറുള്ളത്. എന്നാല്‍ ബിജെപിയും കോണ്‍ഗ്രസും മുതലാളിമാരുടെ കാശ് വാങ്ങിയാണ് പണിയെടുക്കുന്നത്.

"ഇന്ത്യ' സംവിധാനത്തിന്‍റെ ഭാഗമായിട്ടുള്ള റാലി മഹാരാഷ്ട്രയിലായാലും പഞ്ചാബിലായാലും ഡല്‍ഹിയിലായാലും തങ്ങള്‍ പങ്കെടുക്കും. എന്നാല്‍ "ഐക്യപ്രസ്ഥാനം' പറയുന്ന പ്രമുഖ നേതാക്കള്‍ കേരളത്തില്‍ വന്ന് മത്‌സരിക്കുന്ന പ്രശ്‌നം നിലനില്‍ക്കുന്നുണ്ടെന്നും ഗോവിന്ദന്‍ ചൂണ്ടിക്കാട്ടി.

"ഇത് ഉത്തരേന്ത്യ അല്ല കേരളമാണ്. വര്‍ഗീയ ധ്രുവീകരണങ്ങള്‍ വിലപ്പോകില്ല; ദോഷം ചെയ്യും' എന്ന സി.കെ. പത്മനാഭന്‍റെ വാക്കുകള്‍ ബിജെപിക്ക് തന്നെയുള്ള ഉപദേശമാണ്. എല്ലാവരും മതനിരപേക്ഷ നിലപാട് സ്വീകരിക്കണമെന്നാണ് സിപിഎമ്മിന്‍റെ പക്ഷം. എന്നാല്‍ ബിജെപി സ്വാഭാവികമായി ആ നിലപാടല്ല സ്വീകരിക്കുന്നതെന്നും ഗോവിന്ദന്‍ വിമര്‍ശിച്ചു.

ടൊവിനോയ്ക്കൊപ്പമുള്ള വി.എസ്.സുനിൽ കുമാറിന്‍റെ ചിത്രം വിവാദമായതിനെക്കുറിച്ച് തനിക്കറിയില്ല. ബിജെപിക്ക് കടന്നു ചെല്ലാന്‍ പറ്റാത്ത മേഖലയില്‍ ഉപജാപ സംഘത്തെ ഉപയോഗിച്ച് സ്വാധീനിക്കാന്‍ ശ്രമിക്കുന്നതിന്‍റെ തെളിവാണ് കലാമണ്ഡലം ഗോപി ആശാന്‍ വിഷയത്തില്‍ ഉണ്ടായതെന്നും അദ്ദേഹം പറഞ്ഞു.

വോട്ടെടുപ്പ് വെള്ളിയാഴ്ച ആയതില്‍ സമസ്തയടക്കമുള്ളവര്‍ തങ്ങളുടെ വിയോജിപ്പ് അറിയിച്ചിട്ടുണ്ട്. ഇക്കാര്യം വകുപ്പ്മന്ത്രി തെരഞ്ഞെടുപ്പ് കമ്മീഷനെ അറിയിക്കും. വിഷയത്തില്‍ തെരഞ്ഞെടുപ്പ് കമ്മീഷനാണ് അന്തിമ തീരുമാനമെടുക്കേണ്ടതെന്നും ഗോവിന്ദന്‍ വ്യക്തമാക്കി.