രാമനവമി ആഘോഷത്തിനിടെയുണ്ടായ വർഗീയ കലാപം; 11പേർ കൂടി അറസ്റ്റിൽ‌ |

Click here for detailed news of all items

രാമനവമി ആഘോഷത്തിനിടെയുണ്ടായ വർഗീയ കലാപം; 11പേർ കൂടി അറസ്റ്റിൽ‌

Wednesday, March 20, 2024 6:25 AM IST

കോൽക്കത്ത: പശ്ചിമ ബംഗാളിൽ കഴിഞ്ഞ വർഷം മാർച്ചിൽ രാമനവമി ആഘോഷത്തിനിടെയുണ്ടായ വർഗീയ കലാപവുമായി ബന്ധപ്പെട്ട ഗൂഢാലോചനയിൽ 11 പ്രതികൾ കൂടി അറസ്റ്റിലായി. എൻഐഎ ആണ് ഇവരെ പിടികൂടിയത്.

ഇതോടെ 2023 ഏപ്രിൽ 27 ന് എൻഐഎയ്ക്ക് കൈമാറിയ ആറ് കേസുകളിൽ അറസ്റ്റിലായവരുടെ എണ്ണം 16 ആയി.

2023 മാർച്ച് 30ന് ഹൗറ പോലീസ് കമ്മീഷണറേറ്റിലെ ഷിബ്പൂരിൽ രാമനവമി ഘോഷയാത്രയ്ക്കിടെ ഒരു പ്രത്യേക സമുദായത്തിലെ അംഗങ്ങൾക്ക് നേരെ ഗൂഢാലോചന നടത്തുകയും ആക്രമണം നടത്തുകയും ചെയ്തവരിൽ ഈ 11 പ്രതികളും ഉൾപ്പെടുന്നുവെന്ന് എൻഐഎ അറിയിച്ചു. വിവിധ സ്ഥലങ്ങളിൽ നിന്ന് പിടിച്ചെടുത്ത വീഡിയോ ദൃശ്യങ്ങളിൽ നിന്നാണ് പ്രതികളെ തിരിച്ചറിഞ്ഞത്.‌

ഷമീം അഹമ്മദ് എന്ന ബാരെ, ബൽവന്ത് സിംഗ്, മെഹ്മൂദ് ആലം, സോനു എന്ന മെഹ്ഫൂസ് ആലം, ഡാനിഷ് എന്ന ഷംഷാദ് ആലം, മുഹമ്മദ് അലി എന്ന സൂരജ്, സലിം ജാവേദ് എന്ന ജവാദ്, സർഫറാസ് ആലം എന്ന ഖാൻ, ലാലൻ, ഫിറോജർ, ഫിറോജർ എന്നിവരാണ് അറസ്റ്റിലായ 11 പ്രതികൾ. ഇവരെല്ലാം ഹൗറയിലെ ഷിബ്പൂർ സ്വദേശികളാണ്.

ഹൗറയിലെ പിഎം ബസ്തിയിലെ ഷിബ്പൂരിലെ നാലാമത്തെ ബൈ ലെയ്‌നിലെ ആക്രമണത്തെ തുടർന്നുണ്ടായ വർഗീയ കലാപത്തിന്‍റെ പശ്ചാത്തലത്തിൽ പശ്ചിമ ബംഗാൾ പോലീസ് 36 പേർക്കെതിരെയാണ് ആദ്യം കേസ് രജിസ്റ്റർ ചെയ്തത്.

2023 ഏപ്രിൽ 27ന് കോൽക്കത്ത ഹൈക്കോടതിയാണ് രാമനവമി ആഘോഷത്തിനിടെയുണ്ടായ വർഗീയ കലാപവുമായി ബന്ധപ്പെട്ട എല്ലാ കേസുകളും എൻഐഎയ്ക്ക് കൈമാറാൻ ഉത്തരവിട്ടത്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.