ബാഴ്‌സ കോപ്പ : Deepika.com Sports News |

Click here for detailed news of all items

ബാഴ്‌സ കോപ്പ

Monday, April 28, 2025 1:55 AM IST

സെവിയ്യ: കോപ്പ ഡെല്‍ റേ ഫുട്‌ബോള്‍ ഫൈനലില്‍ അരങ്ങേറിയ എല്‍ ക്ലാസിക്കോയില്‍ എഫ്‌സി ബാഴ്‌സലോണയ്ക്കു ജയം. അധിക സമയത്തേക്കു നീണ്ട ക്ലാസിക് പോരാട്ടത്തില്‍ 3-2നായിരുന്നു ബാഴ്‌സ ജയം സ്വന്തമാക്കിയത്.

28-ാം മിനിറ്റില്‍ പെദ്രിയുടെ ഗോളില്‍ ബാഴ്‌സലോണ ലീഡ് നേടി. ലാമിയന്‍ യമാലായിരുന്നു അസിസ്റ്റ് നടത്തിയത്. റയല്‍ മാഡ്രിഡ് 70-ാം മിനിറ്റില്‍ കിലിയന്‍ എംബപ്പെയുടെ ഫ്രീകിക്ക് ഗോളിലൂടെ ഒപ്പമെത്തി. തുടര്‍ന്ന് 77-ാം മിനിറ്റില്‍ ഔറേലിയന്‍ ചാമേനിയുടെ ഹെഡര്‍ ഗോളില്‍ ലീഡും സ്വന്തമാക്കി. എന്നാല്‍, യമാലിന്‍റെ അസിസ്റ്റില്‍ 84-ാം മിനിറ്റില്‍ ഫെറാന്‍ ടോറസിന്‍റെ ഗോളിലൂടെ ബാഴ്‌സലോണ 2-2 സമനിലയില്‍. തുടര്‍ന്നു ഗോള്‍ പിറന്നില്ല. അതോടെ മത്സരം അധികസമയത്തേക്ക്. 116-ാം മിനിറ്റില്‍ ജൂള്‍സ് കൗണ്ടെ ബാഴ്‌സലോണയുടെ ജയം കുറിച്ച ഗോള്‍ സ്വന്തമാക്കി. ബാഴ്‌സയുടെ 32-ാം കോപ്പ കിരീടമാണ്.

ഫ്‌ളിക്‌സ് ക്ലാസിക്കോ

കഴിഞ്ഞ സീസണിലെ മൂന്ന് എല്‍ ക്ലാസിക്കോയിലും എഫ്‌സി ബാഴ്‌സലോണ പരാജയപ്പെട്ടിരുന്നു. എന്നാല്‍, ഈ സീസണില്‍ ഇതുവരെ മൂന്നു ക്ലാസിക്കോയിലും ഹന്‍സി ഫ്‌ളിക്കിന്‍റെ ശിക്ഷണത്തില്‍ ബാഴ്‌സലോണ ജയം സ്വന്തമാക്കി. 2024-25 സീസണില്‍ ഒരു ക്ലാസിക്കോകൂടി ബാക്കിയുണ്ട്.

റയല്‍ മാഡ്രിഡിന് എതിരായ ആദ്യ മൂന്നു മത്സരങ്ങള്‍ ജയിക്കുന്ന രണ്ടാമത് മാത്രം ബാഴ്‌സലോണ കോച്ചാണ് ഫ്‌ളിക്ക്. പെപ് ഗ്വാര്‍ഡിയോള മാത്രമേ മുമ്പ് ഈ നേട്ടം സ്വന്തമാക്കിയിട്ടുള്ളൂ.

ഹാട്രിക് ചുവപ്പ്

ക്ലൈമാക്‌സില്‍ മൂന്നു റയല്‍ മാഡ്രിഡ് താരങ്ങള്‍ക്കു ചുവപ്പുകാര്‍ഡ് ലഭിച്ചു. 120+4-ാം മിനിറ്റില്‍ എംബപ്പയെ വീഴ്ത്തിയതിനു ഫ്രീകിക്ക് അനുവദിക്കാത്തതില്‍ നടത്തിയ പ്രതിഷേധത്തിനാണ് സൈഡ് ബെഞ്ചില്‍ ഇരിക്കുകയായിരുന്ന അന്‍റോണിയോ റൂഡിഗര്‍, ലൂകാസ് വാസ്‌ക്വെസ് എന്നിവര്‍ക്കു ചുവപ്പു കാര്‍ഡ് ലഭിച്ചത്. റഫറിക്കുനേരെ കോപിച്ചതിനായിരുന്നു ബെല്ലിങ്ഗമിനു ചുവപ്പു കാര്‍ഡ്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.