ഹരിയാനയിൽ ബസിനു തീപിടിച്ച് ഒന്പതുപേർ വെന്തു മരിച്ചു : Deepika.com National News |

നൂഹ്: ഹരിയാനയിലെ നൂഹിൽ ബസിന് തീപിടിച്ച് അഞ്ച് സ്ത്രീകൾ ഉൾപ്പെടെ ഒന്പതുപേർ വെന്തുമരിച്ചു. 17 പേർക്കു പരിക്കേറ്റു.

നൂഹിലെ ദുലാവത്തിൽ കുണ്ടലി-മനേസർ-പൽവാൾ (കെഎംപി) എക്സ്പ്രസ് ഹൈവേയിൽ ഇന്നലെ പുലർച്ചെ രണ്ടുമണിയോടെയാണു ദുരന്തം. ഉത്തർപ്രദേശിലെ മഥുര, വൃന്ദാവൻ എന്നിവിടങ്ങളിൽനിന്ന് തീർഥയാത്ര കഴിഞ്ഞുവരികയായിരുന്ന സംഘം സഞ്ചരിച്ച ടൂറിസ്റ്റ് ബസാണ് അപകടത്തിൽപ്പെട്ടത്.

ബസിൽ അറുപതോളം യാത്രക്കാരുണ്ടായിരുന്നെന്നാണ് വിവരം. പഞ്ചാബിലെ ഹോഷിയർപുർ, ലുധിയാന എന്നിവിടങ്ങളിൽനിന്നുള്ളവരാണ് ഇവർ. എല്ലാവരും ഒരു കുടുംബത്തിൽപ്പെട്ടവരാണ്. 10 ദിവസത്തെ തീർഥാടനയാത്രയ്ക്ക് പോയതായിരുന്നു കുടുംബാംഗങ്ങൾ.

പുലർച്ചെ 1.30ഓടെ ബസിൽനിന്ന് പുക ഉയർന്നതായി അപകടത്തിൽനിന്ന് രക്ഷപ്പെട്ടവർ പറഞ്ഞു. ബസിൽനിന്ന് തീ ഉയരുന്നത് കണ്ട മോട്ടോർ സൈക്കിൾ യാത്രികൻ ബസിനെ പിന്തുടർന്ന് ഡ്രൈവറെ വിവരമറിയിച്ചിരുന്നു. ഡ്രൈവർ ബസ് നിർത്തിയെങ്കിലും പെട്ടെന്ന് തീ പടരുകയായിരുന്നു.

ബസിലെ എസിയിലുണ്ടായ ഷോർട്ട്സർക്യൂട്ടാണ് അപകടകാരണമെന്ന് സംശയമുണ്ട്. ഇക്കാര്യം സ്ഥിരീകരിച്ചിട്ടില്ല. അപകടസ്ഥലത്തുനിന്നും മുങ്ങിയ ബസ് ഡ്രൈവർക്കെതിരേ കേസെടുത്തതായി പോലീസ് അറിയിച്ചു. വിവരം അറിയിച്ചിട്ടും മൂന്നു മണിക്കൂറിനുശേഷമാണ് രക്ഷാപ്രവർത്തകർ എത്തിയതെന്ന ആരോപണവുമുണ്ട്.