ബസും ജീപ്പും കൂട്ടിയിടിച്ച് രണ്ടുപേർ മരിച്ചു : Deepika.com Kerala News |

Click here for detailed news of all items

ബസും ജീപ്പും കൂട്ടിയിടിച്ച് രണ്ടുപേർ മരിച്ചു

Saturday, May 4, 2024 12:40 AM IST

തൃശൂർ: മുത്തുള്ളിയാൽ ഗ്ലോബൽ സ്കൂളിനു സമീപം ജീപ്പ് സ്വകാര്യബസിലേക്ക് ഇടിച്ചുകയറി രണ്ടുപേർ മരിച്ചു. ബസ് യാത്രക്കാരായ 12 പേർക്കു പരിക്കേറ്റു. ജീപ്പ് യാത്രക്കാരായ അങ്കമാലി മഞ്ഞപ്ര സ്വദേശി അവൂപ്പാടന്‌ ബിജു ദേവസി (44), ഇതരസംസ്ഥാന തൊഴിലാളി സന്തോഷ് പ്രധാൻ (28) എന്നിവരാണ് മരിച്ചത്.

ഇന്നലെ ഉച്ചകഴിഞ്ഞു മൂന്നുമണിയോടെയായിരുന്നു അപകടം. തൃശൂരിൽനിന്ന് തൃപ്രയാറിലേക്കു പോകുകയായിരുന്ന സ്വകാര്യബസിൽ എതിർദിശയിൽനിന്നു വന്നിരുന്ന ജീപ്പ് കൂട്ടിയിടിക്കുകയായിരുന്നു. ജീപ്പിന്‍റെ ഉള്ളിൽ അകപ്പെട്ട ഇരുവരെയും നാട്ടുകാരും പോലീസും ചേർന്ന് ജീപ്പിന്‍റെ ഒരുവശം വെട്ടിപ്പൊളിച്ചാണ് പുറത്തെടുത്തത്.

ബസ് യാത്രക്കാരായ ചിറയ്ക്കൽ വാക്കറ വീട്ടിൽ മുഹമ്മദ് ബഷീർ (64), പടിഞ്ഞാട്ടുമുറി കറപ്പൻ വീട്ടിൽ അബ്ദുള്ള (74), ഇഞ്ചമുടി മുറിപറമ്പിൽ ലക്ഷ്മിക്കുട്ടി (76), ഇഞ്ചമുടി വെള്ളലാംപറമ്പിൽ സുബിത (37) എന്നിവരെ കൂർക്കഞ്ചേരി എലൈറ്റ് ആശുപത്രിയിലും ഇഞ്ചമുടി ഞാറ്റുവെട്ടി ദിലീപിന്‍റെ ഭാര്യ ഷീബ(53), മകൾ അമൃത(15), മണലൂർ പുത്തൻപുരയ്ക്കൽ മോഹനൻ(58), ഭാര്യ ശ്യാമ(50), പൊന്നൂക്കര തെക്കുംപുറം ബിജുവിന്‍റെ ഭാര്യ രേഷ്മ(33), മക്കളായ ഭവീഷ് കൃഷ്ണ(12), ഭദ്രശ്രീ(10), അവിണിശേരി കുന്നത്തുവളപ്പിൽ അനിൽകുമാറിന്‍റെ ഭാര്യ അംബിക(49) എന്നിവരെ പഴുവിലിലെ സ്വകാര്യ ആശുപത്രിയിലും പ്രവേശിപ്പിച്ചു.

അപകടത്തെതുടർന്ന് തൃശൂർ - തൃപ്രയാർ റോഡിൽ വാഹനഗതാഗതം തടസപ്പെട്ടു. മൃതദേഹങ്ങൾ എലൈറ്റ് ആശുപത്രിയിൽ സൂക്ഷിച്ചിരിക്കുകയാണ്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.