സ്കൂൾ ഓഫ് ഹെൽത്ത് സയൻസസിലെ സ്വാശ്രയ എംഎസ് സി ഫുഡ് സയൻസ് ആൻഡ് ടെക്നോളജിക്ക് എൻട്രൻസ്, നോണ് എൻട്രൻസ് വിഭാഗത്തിൽ എസ് സി, എസ്ടിക്ക് സംവരണം ചെയ്ത സീറ്റുകൾ ഒഴിവുണ്ട്. അപേക്ഷിക്കാനുള്ള യോഗ്യത നോണ് എൻട്രൻസ് വിഭാഗത്തിൽ 50 ശതമാനം മാർക്കിൽ കുറയാത്ത കാലിക്കട്ട് സർവകലാശാലാ ബിഎസ് സി ഫുഡ് ടെക്നോളജി ബിരുദവും, എൻട്രൻസ് വിഭാഗത്തിൽ സയൻസ് ബിരുദവും. ബിരുദം അഥവാ പ്ലസ്ടു തലത്തിൽ ഗണിതം ഒരു വിഷയമായി പഠിച്ചിരിക്കണം. പ്രസ്തുത കോഴ്സിലേക്ക് പ്രവേശന പരീക്ഷ വിജയിക്കണം. മുന്പ് എൻട്രൻസ് പരീക്ഷയിൽ പങ്കെടുത്തവർക്കും അപേക്ഷിക്കാം. ഫോട്ടോയും എല്ലാ രേഖകളും സഹിതം സെപ്റ്റംബർ രണ്ടിന് രാവിലെ പത്തിന് സ്കൂൾ ഓഫ് ഹെൽത്ത് സയൻസസ് ഡയറക്ടർ മുന്പാകെ അഭിമുഖത്തിന് ഹാജരാകണം. ഫോണ്: 0494 2407345. സ്റ്റഡിമെറ്റീരിയിൽ തയ്യാറാക്കുന്നതിന് അധ്യാപകരിൽ നിന്ന് അപേക്ഷ ക്ഷണിച്ചു
വിദൂരപഠന വിദ്യാർഥികൾക്കായി സ്റ്റഡി മെറ്റീരിയിൽ തയ്യാറാക്കുന്നതിന് അഫിലിയേറ്റഡ് കോളജ് അധ്യാപകരിൽ നിന്ന് കാലിക്കട്ട് സർവകലാശാല അപേക്ഷ ക്ഷണിച്ചു. അപേക്ഷാ ഫോം www.universityofcalicut.info>Distance Education>Notificationൽ ലഭ്യമാണ്. അപേക്ഷ സെപ്റ്റംബർ 19നകം വിദൂരവിദ്യാഭ്യാസ വിഭാഗം ഡയറക്ടർക്ക് സമർപ്പിക്കണം.
വിദൂരവിദ്യാഭ്യാസ വിഭാഗം സ്റ്റഡി സെന്ററുകൾ തുടങ്ങുന്നതിന് അപേക്ഷ ക്ഷണിച്ചു
വിദൂരവിദ്യാഭ്യാസ വിഭാഗത്തിൽ രജിസ്റ്റർ ചെയ്ത വിദ്യാർഥികൾക്ക് കോണ്ടാക്ട് ക്ലാസുകൾ സംഘടിപ്പിക്കുന്നതിനും സ്റ്റഡിമെറ്റീരിയൽ ലഭ്യമാക്കുന്നതിനുമായി സ്റ്റഡി സെന്ററുകൾ ഏർപ്പെടുത്തുന്നു. സന്നദ്ധരായ അഫിലിയേറ്റഡ് കോളജുകളുടെ പ്രിൻസിപ്പൽമാർ സെപ്റ്റംബർ 19ന് മുന്പ് വിദൂരവിദ്യാഭ്യാസ വിഭാഗം ഡയറക്ടർക്ക് അപേക്ഷിക്കണം. അപേക്ഷാ ഫോം www.universityofcalicut.info>Distance Education>ൽ ലഭ്യമാണ്.
റിസോഴ്സ് പേഴ്സണ്: അപേക്ഷ ക്ഷണിച്ചു
വിദൂരപഠന വിഭാഗത്തിന് കീഴിൽ രജിസ്റ്റർ ചെയ്ത വിദ്യാർഥികൾക്ക് കോണ്ടാക്ട് ക്ലാസ് നടത്തുന്നതിന് റിസോഴ്സ് പേഴ്സണാകുന്നതിന് വേണ്ടി കോളജ് അധ്യാപകരിൽ നിന്ന് അപേക്ഷ ക്ഷണിച്ചു. അപേക്ഷാ ഫോം www.universityofcalicut.info>Distance Education>Notification ൽ ലഭ്യമാണ്. അപേക്ഷ സെപ്റ്റംബർ 19നകം വിദൂരവിദ്യാഭ്യാസ വിഭാഗം ഡയറക്ടർക്ക് സമർപ്പിക്കണം. ഫോണ്: 0494 2400288, 2407356.
സിഡിഎംആർപിയിൽ കരാർ നിയമനം: അപേക്ഷ ക്ഷണിച്ചു
സൈക്കോളജി പഠനവകുപ്പിലെ സിഡിഎംആർപിയിൽ ഒഴിവുള്ള ഡവലപ്മെന്റൽ സൈക്കോ തെറാപ്പിസ്റ്റ് (ഒന്ന്), സ്പീച്ച്ലാംഗ്വേജ് പാത്തോളജിസ്റ്റ് ആൻഡ് ഓഡിയോളജിസ്റ്റ് (രണ്ട്) തസ്തികകളിലേക്ക് കരാർ നിയമനത്തിന് അപേക്ഷ ക്ഷണിച്ചു. ബയോഡാറ്റ, യോഗ്യതാ സർട്ടിഫിക്കറ്റുകളുടെ പകർപ്പ് സഹിതം ഡയരക്ടർ, സിഡിഎംആർപി, ഡിപ്പാർട്ടുമെന്റ് ഓഫ് സൈക്കോളജി, കാലിക്കട്ട് യൂണിവേഴ്സിറ്റി പിഒ, 673635 എന്ന വിലാസത്തിൽ സെപ്റ്റംബർ 16ന് രണ്ട് മണിക്കകം സമർപ്പിക്കണം. യോഗ്യത, മറ്റ് വിവരങ്ങൾ എന്നിവ വെബ്സൈറ്റിൽ.
എംഎസ് സി കംപ്യൂട്ടർ സയൻസ് മൂന്നാംഘട്ട അലോട്ട്മെന്റ്
എംഎസ് സി കംപ്യൂട്ടർ സയൻസ് പ്രവേശനം മൂന്നാംഘട്ട അലോട്ട്മെന്റ് സെപ്റ്റംബർ 14ന് രാവിലെ 10.30ന് സർവകലാശാലാ സെമിനാർ കോംപ്ലക്സിൽ നടക്കും. അലോട്ട്മെന്റിന് ഹാജരാകുന്നവർ എല്ലാ രേഖകളും സഹിതം ഹാജരാകണം. ഒഴിവുവിവരങ്ങൾ www.cuonline.ac.in വെബ്സൈറ്റിൽ. എസ് സി, എസ്ടി ഉൾപ്പെടെ സംവരണ വിഭാഗങ്ങളുടെ അഭാവത്തിൽ പ്രസ്തുത ഒഴിവുകൾ സംവരണ നിയമപ്രകാരം മറ്റ് വിഭാഗങ്ങൾക്ക് മാറ്റി നൽകും. ഫോണ് : 0494 2407325, 2407017.
ബിടെക് ആറാം സെമസ്റ്റർ റഗുലർ പരീക്ഷ
ആറാം സെമസ്റ്റർ ബിടെക് (2014 സ്കീം) പേപ്പർ ഇസി 14602 ഒപ്റ്റിക്കൽ കമ്യൂണിക്കേഷൻ റഗുലർ പരീക്ഷ സെപ്റ്റംബർ 15ന് സർവകലാശാലാ എൻജിനിയറിംഗ് കോളജ് (സിയുഐഇടി), തൃശൂർ ഗവണ്മെന്റ് എൻജിനിയറിംഗ് കോളജ്, പാലക്കാട്, ശ്രീകൃഷ്ണപുരം ഗവണ്മെന്റ് എൻജിനിയറിംഗ് കോളജ് എന്നിവിടങ്ങളിൽ മാത്രം രാവിലെ 9.30 മുതൽ 12.30 വരെ നടക്കും.
പരീക്ഷ
കാലിക്കട്ട് സർവകലാശാല രണ്ടാം സെമസ്റ്റർ എംഎസ് സി റേഡിയേഷൻ ഫിസിക്സ് റഗുലർ, സപ്ലിമെന്ററി, ഇംപ്രൂവ്മെന്റ് പരീക്ഷ സെപ്റ്റംബർ 13ന് ആരംഭിക്കും.
പരീക്ഷാഫലം
2016 ഡിസംബറിൽ നടത്തിയ ഒന്ന്, മൂന്ന് സെമസ്റ്റർ എംഎസ് സി അപ്ലൈഡ് സുവോളജി (സിസിഎസ്എസ്) പരീക്ഷാഫലം വെബ്സൈറ്റിൽ.
2016 ഡിസംബറിൽ നടത്തിയ ഒന്ന്, മൂന്ന് സെമസ്റ്റർ എംഎസ് സി ജിയോഗ്രഫി (സിയുസിഎസ്എസ്) പരീക്ഷാഫലം വെബ്സൈറ്റിൽ. പുനർമൂല്യനിർണയത്തിന് സെപ്റ്റംബർ 16 വരെ അപേക്ഷിക്കാം.
2016 ഡിസംബറിൽ നടത്തിയ ഒന്നാം സെമസ്റ്റർ എംഎ ഇംന്തീഷ് (സിയുസിഎസ്എസ്) പരീക്ഷാഫലം വെബ്സൈറ്റിൽ. പുനർമൂല്യനിർണയത്തിന് സെപ്റ്റംബർ 19 വരെ അപേക്ഷിക്കാം.
എംസിഎ പ്രവേശനം സീറ്റ് ഒഴിവ്
സിസിഎസ്ഐടിയിൽ (സർവകലാശാലാ കാന്പസ്, വടകര, തൃശൂർ ജോണ് മത്തായി സെന്റർ എന്നിവ ഒഴികെ) എംസിഎക്ക് ഒഴിവുള്ള സീറ്റുകളിലേക്ക് രണ്ടാം പ്രവേശന പരീക്ഷയ്ക്ക് ഓണ്ലൈൻ അപേക്ഷ ക്ഷണിച്ചു. അവസാന തിയതി സെപ്റ്റംബർ എട്ട്. ഹാൾടിക്കറ്റ് സെപ്റ്റംബർ 14ന് ലഭ്യമാവും. പ്രവേശന പരീക്ഷ സെപ്റ്റംബർ 16ന് രാവിലെ 11ന് നടക്കും.
സ്പോർട്സ് ഹോസ്റ്റൽ നിയമസഭാ സ്പീക്കർ ഉദ്ഘാടനം ചെയ്തു
തേഞ്ഞിപ്പലം: ചിൽഡ്രൻസ് സ്പോർട്സ് പാർക്ക് ഉൾപ്പെടെയുള്ള സ്പോർട്സ് കോംപ്ലക്സ് സ്ഥാപിക്കുന്നതിന് സംസ്ഥാനത്തെ ഒന്പത് ജില്ലകളിൽ ഭരണാനുമതി നൽകികഴിഞ്ഞതായി നിയമസഭാ സ്പീക്കർ പി. ശ്രീരാമകൃഷ്ണൻ പറഞ്ഞു. കാലിക്കട്ട് സർവകലാശാലയിൽ നിർമിച്ച സ്പോർട്സ് ഹോസ്റ്റൽ ഉദ്ഘാടനം ചെയ്യുകയായിരുന്നു അദ്ദേഹം.
മികച്ച കായിക സംസ്കാരം വളർത്തിയെടുക്കുന്നതിന് പശ്ചാത്തലമൊരുക്കാൻ ഇത് സഹായകമാകുമെന്നും സ്പീക്കർ പറഞ്ഞു. മെച്ചപ്പെട്ട കായിക സംസ്കാരം വളർത്തിയെടുക്കാൻ സർവകലാശാലകൾക്ക് സാധിക്കേണ്ടതുണ്ട്. ബാഴ്സിലോണ സർവകലാശാല ലോകത്തിന്റെ വിവിധ ഭാഗങ്ങളിലുള്ള നിയമസഭകളുടെയും പാർലിമെന്റിന്റെയും അധ്യക്ഷൻമാരുമായി നടത്തിയ കൂടിക്കാഴ്ചയിൽ പങ്കെടുക്കാൻ അവസരം ലഭിച്ചിരുന്നു. ഈ സമയത്ത് കാലിക്കട്ട് സർവകലാശാല സമർപ്പിച്ച പദ്ധതി ചർച്ചചെയ്തു. കാലിക്കട്ട് സർവകലാശാലയുമായി സഹകരണത്തിന് ബാഴ്സിലോണ സർവകലാശാല വാഗ്ദാനം നൽകിയതായി സ്പീക്കർ അറിയിച്ചു. മറ്റ് വിദേശ സർവകലാശാലകളുമായി സഹകരണത്തിന് പാതയൊരുക്കാനും ഇതുവഴി സാധ്യമാവുമെന്ന് അദ്ദേഹം പറഞ്ഞു.
പ്രശസ്ത സർവകലാശാലകളിലെ പ്രഗൽഭരായ പ്രഫസർമാരുടെ ക്ലാസുകൾ ലോകത്തിന്റെ വ്യത്യസ്ത കോണുകളിലുള്ള ലക്ഷകണക്കിന് വിദ്യാർഥികൾ ശ്രവിക്കുന്ന സന്പ്രദായം വ്യാപിച്ചുവരികയാണ്. ഹാർവാഡ് സർവകലാശാലയിലെ പ്രഫസർ ഒന്നരലക്ഷം പേർക്കാണ് ഇത്തരത്തിൽ ഒരേ സമയം ക്ലാസെടുത്തത്. പഠനമുറികളുടെയും ക്ലാസുകളുടെയും അന്തരീക്ഷം മാറുകയാണ്. അത്തരം സാഹചര്യംകൂടി വളർത്തിയെടുത്ത് കേരളത്തിലെ ഒന്നാം നന്പർ സർവകലാശാലയായി കാലിക്കട്ടിനെ മാറ്റിയെടുക്കാനുള്ള തീവ്രയത്ന പദ്ധതി എല്ലാവരും സഹകരിച്ചുകൊണ്ട് നടപ്പാക്കേണ്ടതുണ്ടെന്ന് സ്പീക്കർ പറഞ്ഞു.
വൈസ് ചാൻസലർ ഡോ.കെ. മുഹമ്മദ് ബഷീർ അധ്യക്ഷനായിരുന്നു. പി. അബ്ദുൾ ഹമീദ് എംഎൽഎ, സ്പോർട്സ് കൗണ്സിൽ പ്രസിഡന്റ് ടി.പി. ദാസൻ, പ്രോവൈസ് ചാൻസലർ ഡോ.പി. മോഹൻ, സിൻഡിക്കറ്റ് അംഗങ്ങളായ ഡോ.ടി.പി. അഹമ്മദ്, കെ.കെ. ഹനീഫ, ഒ. അബ്ദുൾ അലി, പി.എം. സലാഹുദ്ദീൻ, യൂണിവേഴ്സിറ്റി എൻജിനിയർ കെ.കെ. അബ്ദുൾ നാസിർ തുടങ്ങിയവർ പങ്കെടുത്തു.
കാലിക്കട്ട് സർവകലാശാലയുടെ രാജ്യാന്തര കായിക താരങ്ങളായ പി.യു. ചിത്ര, ജിസ്ന മാത്യു, അനു രാഘവൻ, മുഹമ്മദ് അനസ്, ഇർഫാൻ കോലോത്തുംതൊടി എന്നിവരെ ചടങ്ങിൽ ആദരിച്ചു. രജിസ്ട്രാർ ഡോ.ടി.എ.അബ്ദുൾ മജീദ്, കായിക പഠനവകുപ്പ് ഡയറക്ടർ ഡോ.വി.പി. സക്കീർ ഹുസൈൻ എന്നിവർ പ്രസംഗിച്ചു. 392 ലക്ഷം രൂപ ചെലവിൽ നിർമ്മിച്ച ഹോസ്റ്റലിൽ 248 പേർക്ക് താമസ സൗകര്യമുണ്ട്.
ഭിന്നശേഷിക്കാരായ കുട്ടികളുടെ ഓണാഘോഷം
തേഞ്ഞിപ്പലം: ഭിന്നശേഷിക്കാരുടെ ഉന്നമനത്തിനായി കാലിക്കട്ട് സർവകലാശാലാ മനഃശാസ്ത്ര വിഭാഗത്തിലെ കമ്യൂണിറ്റി ഡിസെബിലിറ്റി മാനേജ്മെന്റ് ആൻഡ് റിഹാബിലിറ്റേഷൻ പ്രോഗ്രാമിന്റെ ആഭിമുഖ്യത്തിൽ, പ്രത്യേക പരിഗണന അർഹിക്കുന്ന കുട്ടികൾക്കായി ഓണാഘോഷ പരിപാടികൾ സംഘടിപ്പിച്ചു.
സിഡിഎംആർപി മലപ്പുറം, കോഴിക്കോട് ജില്ലകളിലെ വിവിധ ക്ലിനിക്കുകളുടെ കീഴിലും മനഃശാസ്ത്ര വിഭാഗത്തിന് കീഴിലും ചികിത്സയും പരിശീലനവും ലഭിച്ചുകൊണ്ടിരിക്കുന്ന കുട്ടികളും രക്ഷിതാക്കളും പരിപാടിയിൽ പങ്കെടുത്തു.
ഇന്ത്യൻ നാടോടി കഥകൾ: സിന്പോസിയം സംഘടിപ്പിച്ചു
തേഞ്ഞിപ്പലം: കാലിക്കട്ട് സർവകലാശാലാ ഫോക്ലോർ പഠനവിഭാഗവും കേന്ദ്ര സാഹിത്യ അക്കാദമിയും സംയുക്തമായി ഇന്ത്യൻ നാടോടി കഥ: പ്രമേയങ്ങളും ജനുസുകളും എന്ന വിഷയത്തിൽ സിന്പോസിയം സംഘടിപ്പിച്ചു.
പ്രശസ്ത സാഹിത്യകാരൻ കെ.പി. രാമനുണ്ണി ഉദ്ഘാടനം ചെയ്തു. വൈസ് ചാൻസലർ ഡോ.കെ. മുഹമ്മദ് ബഷീർ അധ്യക്ഷനായിരുന്നു. ഡോ. അനിൽ വള്ളത്തോൾ, ഡോ.കെ.എം. അനിൽ, രാഘവൻ പയ്യനാട്, കെ.വി. ഷിനിമോൾ, രവീന്ദ്രനാഥ ശർമ്മ, ഉമർ തറമേൽ, അജു കെ. നാരായണൻ, സുനീഷ് വേലിക്കുനി, സുനിൽ ഞാളിയത്ത്, എൻ. മനോഹരൻ, ബി.എസ്. ശിവകുമാർ, വി. അർഷാദ്, ആർ.വി.എം. ദിവാകരൻ, എച്ച്.കെ. സന്തോഷ്, ഡോ.സി.കെ. ജിഷ തുടങ്ങിയവർ പങ്കെടുത്തു.
ബ്ലുവെയ്ൽ ഉയർത്തുന്ന വെല്ലുവിളി: സർവകലാശാലയിൽ സെമിനാർ
തേഞ്ഞിപ്പലം: കാലിക്കട്ട് സർവകലാശാലാ ലൈഫ്ലോംഗ് ലേണിംഗ് പഠനവകുപ്പും ഇന്ത്യൻ കൗണ്സലേഴ്സ് അസോസിയേഷന്റെയും (ഐസിഎ) സംയുക്താഭിമുഖ്യത്തിൽ ബ്ലുവെയ്ൽ ഉയർത്തുന്ന വെല്ലുവിളി എന്ന വിഷയത്തിൽ സെമിനാർ സംഘടിപ്പിക്കുന്നു.
സെപ്റ്റംബർ 16ന് രാവിലെ പത്തിന് മുതൽ വൈകുന്നേരം നാല് വരെ സെമിനാർ. യുവാക്കളിലും വിദ്യാർഥികളിലും വർധിച്ചുവരുന്ന ഓണ്ലൈൻ ഗെയിമുകളോടുള്ള ആസക്തിയും അതിന്റെ പ്രത്യാഘാതങ്ങളും പ്രതിവിധികളും ചർച്ചചെയ്യും. പങ്കെടുക്കാൻ താൽപ്പര്യമുള്ളവർ രജിസ്റ്റർ ചെയ്യണം. ഫോണ് : 9496843048, 9495493908.